1. Ndawa chani atumi okhulupirika wakumbuyo ambakwanisa kukhala olimba?

 BAIBOLO inena kawirikawiri va amuna okhulupirika wakumbuyo kuti wenze wamphanvu komasoti olimba. Koma podiya wale omwe enze olimba maninge, ambadzibvalini tene. Mwakulinganiza, pa vochitika vinango Mpfumu Davide ambadzibva ‘wolimba maninge ninge phiri,’ koma nthawe zinango iye ‘ambakhala wamantha.’ (Sal. 30:7) Pa nkhani ya Samisoni iye wenze na mphanvu maninge ndawa ambathandiziwa na mzimu uchena wa Mulungu, olo viri teno, iye ambadziwa kuti kusowa thandizo ya Yahova iye ‘adakaluza mphanvu zake ndipo adakakhalambo ninge munthu aliyese.’ (Ower. 14:5, 6; 16:17) Amuna mwawa enze wamphanvu ndawa yakuti Yahova ambawapasa mphanvu.

2. Ndawa chani Paulo adanena kuti pomwe ali wofoka ni pomwe ambakhala wamphanvu? (2 Akorinto 12:9, 10)

² Mtumi Paulo ambadziwambo kuti iye ambadekana mphanvu za Yahova. (Werengani 2 Akorinto 12:9, 10.) Ninge momwe viliri na azinji wa isepano, Paulo ambalimbana na mabvuto yazinji ya thanzi. (Agal. 4:13, 14) Ndipo nthawe zinango iye ambadekana kuchita khama kuti achite vinthu vabwino. (Aro. 7:18, 19) Nthawe zinango iye ambakhala na mantha na vinthu vomwe vidakamuchitikira. (2 Akor. 1:8, 9) Olo nteno Paulo pomwe wenze wofoka iye ambadzibva wolimba. Viri tene ndawa yakuti Yahova ambamupasa mphanvu zomwe iye ambadekana kuti akwanise kulimbana na mabvuto yake.

3. Ni mibvunzo yaponi yomwe tikambirane mu nkhani ino?

³ Yahova ankutipolomisa kuti adzatipase mphanvu zomwe tichadekana kuti tikwanise kupirira. (1 Pet. 5:10) Koma kuti titambire thandizo mweyi tichadekanambo kuchita mbali yathu.  Mwakulinganiza, motori ni womwe uchachitisa kuti karo ifambe, koma motolista akaleka kuponda aceleradori karo ingachokelini pomwe ili. Mwakulingana na vimwevi, Yahova ankufuna kutipasa mphanvu zomwe tichadekana. Koma tichadekana kuchita mbali yathu kuti titambire mphanvu mwezi. Ko Yahova atipasa chani kuti atilimbikise? Ko tichadekana kuchita chani peno tinkufuna kutambira mphanvu mweyizo? Tione midawiro ya mibvunzo mwaya pomwe tinkupfunzira momwe Yahova adalimbikisira mneneri Yona, Mariya amayi wake wa Yesu na mtumi Paulo. Tionepomwe momwe Yahova ankupitirizira kulimbikisa atumiki wake manjeuno.

4. Tingachite tani kuti titambire mphanvu za Yahova?

⁴ Njira ibodzi yomwe tingatambirire mphanvu kwa Yahova ni kumufenderera mpemphero. Yahova adzadawire mapemphero yathu pakutipasa ‘mphanvu zoposha zachibadwa.’ (2 Akor. 4:7) Tingatambirepomwe mphanvu zomwe tichadekana tikambawerenga Baibolo na kuganizira mozama vomwe tapfunzira. (Sal. 86:11) Mawu ya Yahova kwa isepano yomwe ni Baibolo ‘yatipasa mphanvu.’ (Aheb. 4:12) Tikambapemphera kwa Yahova na kuwerenga mawu yake, tidzatambire mphanvu zomwe tichadekana kuti tikwanise kupirira, kupitiriza kukhala wokondwa na kukwanilisa utumiki womwe tinkuona kuti ni woshupa. Manje onani momwe Yahova adalimbikisira mneneri Yona.

5. Ndawa chani Yona ambadekana kulimbikisiwa?

⁵ Mneneri Yona ambafunika kukhala wolimba ntima. Pambuyo pakuti watambira utumiki woshupa wa Yahova, Yona adathawira kutali maninge. Ndawa ya vimwevi iye wenze adakhala pang’ono kufa ndawa ya chimphepo champhanvu ndipo adayikha moyo wa wanthu anango pa ngozi. Pomwe ofambisa barko adamuthusa m’madzi iye adayenda ku malo yomwe ambaganizirakolini m’mimba mwa chintsomba chikulu. Ko munkuganiza kuti Yona adabva tani? Ko iye ambaganiza kuti adakafera m’mimba mwa ntsomba? Ko iye ambaganiza kuti wenze adasiyiwa na Yahova? Mosakayika Yona wenze na nkhawa maninge.

6. Ko nchani chomwe chidalimbikisa Yona pomwe wenze m’mimba mwa ntsomba? (Yona 2:1, 2, 7)

⁶ Ko Yona adachita chani kuti atambire mphanvu pomwe wenze yekhayekha m’mimba mwa chintsomba chinchire? Chinthu chakuyamba chomwe iye adachita ni kupemphera kwa Yahova. (Werengani Yona 2:1, 2, 7.) Yona wenze alibe kubvera Yahova, koma iye wenze na chitsimikizo chakuti Yahova abvesere pemphero yake yakudzichepesa na kulapa. Iye adaganizirapomwe mpfundo zinango za m’Malemba. Ko tinkudziwa tani vimwevi? Ndawa yakuti mpemphero yake yomwe idanembewa mu msolo 2 wa bukhu ya Yona, iye adaphatisa basa mawu yomwe yagumanika mu bukhu ya Masalimo. (Mwakulinganiza, linganizani lemba ya Yona 2:2, 5 na Masalimo 69:1; 86:7.) Vinkuwonekeratu kuti Yona ambayadziwa bwino Malemba, ndipo kuganizira mavesi mwaya pomwe ambagumana na mabvuto kudamutsimikizira kuti Yahova amuthandize. Yahova adapulumusa Yona ndipo patsogolo pake iye wenze wokonzeka kukwanirisa utumiki womwe Yahova wenze adamupasa.—Yona 2:10–3:4.

7-8. Ko nchani chomwe chidalimbikisa Zhiming pa nthawe yomwe ambagumana na mabvuto?

⁷ Chitsanzo cha Yona chingatithandize pomwe tinkugumana na mabvuto. Mwakulinganiza, m’bale munango wa ku Taiwan dzina yake Zhiming, b iye ashupika na mabvuto yazinji pa moyo wake. Kuyingizira pamwapo wanthu anango wa m’banja yake amuchitira vinthu voipa ndawa yakuti ni wa Mboni za Yahova. Ni  pemphero na pfunziro ya payekha yomwe imuthandiza kuti atambire mphanvu za Yahova. Iye adati: “Nthawe zinango pomwe mabvuto yangu yankuwoneka kuti yamalelini, inepano nikhala na nkhawa maninge mwakuti nikwanisalini kukhazikisa maganizo kuti nichite pfunziro ya panekha.” Olo viri teno Zhiming afokalini. Iye adati: “Choyambirira inepano nipemphera kwa Yahova, patsogolo pake niyikha mashikutadori m’matu nkuyamba kubvesera nyimbo zathu. Nthawe zinango niyimba mwakachetechete mpakana ntima wangu kubva bwino. Nikachita vimwevi niyamba kupfunzira.”

⁸ Pfunziro ya payekha idamuthandiza maninge Zhiming. Mwakulinganiza, pomwe operasau yake imbapola, mfulumero munango adamuuza kuti iye ambadekana kuyikhiwa magazi ndawa yakuti wenze na magazi yochepa. Usiku wakuti mangwana yake achitiwe operasau, Zhiming adawerenga nkhani ya mulongo munango yemwe adachitiwambo operasau ninge yake, vigawo vake va magazi yafuyira yenze yochepa kuposha yake, olo nteno iye alibe kubvuma kuyikhiwa magazi ndipo adatchira. Nkhani mweire idamulimbikisa Zhiming ndipo iye adapitiriza kukhala wokhulupirika.

9. Peno imwepo ndimwe okwinyirira na bvuto inango, ko mungachite chani? (Onani pomwe mafoto.)

⁹ Ko mudagumanako kale na mabvuto yoshupa maninge mpakana nkukangira kumufotokozera Yahova momwe munkubvera? Ko mudakhalako kale woneta mpakana kukangira kuchita pfunziro ya pamwekha? Kumbukirani kuti Yahova ankudziwa bwino vomwe munkugumananavo podiya muchichita pemphero yachigwato. Imwepo mudzakhale na chitsimikizo chakuti Yahova adzakupaseni vomwe munkudekana. (Aef. 3:20) Peno vowawa va nthupi panago va m’maganizo vinkukuchitisani kuti imwepo mukangire kuwerenga Baibolo, yesesani kubvesera Baibolo yotepa na nkhani zinango zofotokozera Baibolo. Ndipo vingakhalesoti vothandiza kubvesera nyimbo zanthu na kunyang’anira mavidiyo pa saiti ya jw.org. Mukambapemphera kwa Yahova na kufagafaga midawiro m’Baibolo na mu vofalisa vathu mudzakhale ninge munkumuchemera Yahova kuti akulimbikiseni ndipo iye adzakulimbikisenidi.

10. Ko abale na alongo wathu atilimbikisa tani?

¹⁰ Yahova angaphatise basa abale na alongo  wathu kuti atilimbikise. Iwo angakhale ‘thandizo yathu’ pa nthawe yomwe tinkugumana na mabvuto panango pomwe tinkushupika kukwanirisa utumiki wathu. (Akol. 4:10, 11) Isepano tichadekana azishamwali makamaka pa ‘nthawe ya mabvuto.’ (Miy. 17:17) Pomwe tinkudzibva ofoka, abale wathu angatithandize mwakuthupi, m’maganizo komasoti mwauzimu. Naboni tione momwe Mariya amayi wake wa Yesu adalimbikisiriwa na anzake.

11. Ndawa chani Mariya ambadekana kulimbikisiwa

¹¹ Mariya ambadekana mphanvu kuti akwanise kuchita vomwe Yahova ambafuna. Ganizirani momwe iye adakhalira na nkhawa pomwe adatambira udindo kuchokera kwa mngelo Gabirieli. Iye wenze wosalowolewa, koma mngelo adamuuza kuti adzakhale na mimba. Mariya ambadziwalini momwe angasamalilire mwana koma ambafunika kulera mwana yemwe ambadzakhala Mesiya. Pakuti iye wenze akanati wagonana na mwamuna aliyese, ko adakamuuza tani Yosefe mwamuna yemwe ambafuna kulowolana naye?—Luka 1:26-33.

12. Ko Mariya adakwanisa tani kukhala na mphanvu zomwe ambadekana? (Luka 1:39-45)

¹² Ko Mariya adakwanisa tani kukhala na mphanvu kuti akwanirise udindo woshupa moyu? Iye adakumbira thandizo ya anango. Mwakulinganiza, iye adakumbira mngelo Gabirieli kuti amufotokozere vizinji va udindo moyu. (Luka 1:34) Patsogolo pake iye adachita ulendo woyenda ‘ku dera ya maphiri’ ku Yuda kuti akagumane na m’bale wake Elizabeti. Ulendo moule udamuthandiza maninge. Elizabeti adamutembeja Mariya ndipo adauziriwa na Yahova kuti afotokoze va ulosi wa Mesiya. (Werengani Luka 1:39-45.) Mariya adafotokoza kuti Yahova wenze adachita vinthu ‘mwamphanvu na djanja yake.’ (Luka 1:46-51) Yahova adaphatisa basa mngelo Gabirieli na Elizabeti kuti alimbikise Mariya.

13. Ko nchani chidachitikira mulongo wa ku Bolivia pomwe adakumbira thandizo kwa abale na alongo?

¹³ Ninge Mariya, imwembo mungalimbikisiwe na anzanu omwe ankutumikira Yahova. Mulongo munango wa ku Bolivia dzina yake Dasuri iye ambadekana kulimbikisiwa. Pomwe ababa wake adagumanika na matenda yosamala na kugonesewa mu shipitali, Dasuri adayamba kukhala na udindo wowasamalira mofunisisa maninge. (1 Tim. 5:4) Koma ni nthawe zoselini pomwe venze vosashupa kuchita vimwevi. Iye adati: “Nthawe zizinji inepano nimbadzibva kuti ningakwaniselini kupitiriza.” Ko iye adakumbira thandizo? Pa kuyamba alibe. Iye adafotokoza kuti: “Inepano nimbafunalini kuboneresa abale, nimbaganiza kuti ‘ni Yahova yekha yemwe anganipase mphanvu zomwe nichadekana.’ Koma patsogolo pake inepano nidabvesa kuti kusauza abale va bvuto yangu, kuli ninge kumalisa bvuto mweyi nekha.” (Miy. 18:1) Dasuri adaganiza vonembera kalata azishamwali wake na kuwauza va bvuto yake. Iye adati: “Inepano nilibe chonena nikaganizira momwe abale adanilimbikisira, iwo ambanibweresera chakudya kushipitali, ndipo timbawerenga nawo pabodzi Malemba ya m’Baibolo yolimbikisa. Chenze chinthu chokomedza maninge kudziwa kuti nenzelini nekha. Inepano ninkuchitambo mbali ya banja yobverana ya Yahova. Banja yomwe ni yokonzeka kutithandiza, kulira nase pabodzi na kukhala nase pomwe tinkulimbana na mabvuto yathu.”

14. Ndawa chani tichadekana kubvuma thandizo ya akulu?

¹⁴ Njira inango yomwe Yahova atithandizira ni kuphatisa basa akulu. Iwo ni mphaso yomwe Yahova adatipasa kuti atithandize kuwona mabvuto yathu kukhala yosashupa. (Yes. 32:1, 2) Manje peno imwepo munankhawa, fotokozerani akulu va bvuto yanu. Ayi kunyalanyaza thandizo yomwe akulu angakupaseni, pa kuphatisa basa akulu, Yahova angakulimbikiseni imwepo.

15. Ko ni chidikhiro chiponi chomwe Akhrisitu tose tinacho?

¹⁵ Chidikhiro chathu cha m’Baibolo chingatilimbikise na kutipasa mphanvu. (Aro. 4:3, 18-20) Akhrisitu ose anachidikhiro chokomedza maninge chodzakhala na moyo mpakana kalekale pano pa dziko yapasi panango kudzulu. Chidikhiro chathu chitithandiza kupirira mabvuto, kulalikira ntontholo wabwino na kukwanirisa udindo wathu womwe tingakhale nawo mu mpingu. (1 Ates. 1:3) Ni chidikhiro chimwechi chomwe chidalimbikisa mtumi Paulo.

16. Ndawa chani Paulo ambadekana mphanvu?

¹⁶ Paulo ambadekana mphanvu. Mu kalata yake yomwe adanembera ku mpingu wa Akorinto, iye adadzilinganiza na mbiya ya dothi. Iye ‘ambapanikizika,’ ‘kumaliriwa nzelu,’ ‘kudzudziwa,’ ‘ambadzibva ninge wagonjesewa’ ndipo nthawe zizinji ambakhala pang’ono kufa. (2 Akor. 4:8-10) Paulo adanemba mawu mwaya pa ulendo wake wachitatu wa umishonale. Venze vowawa ndawa yakuti ambadziwa kuti pambuyo pa vimwevi agumanepomwe na mabvuto yoshupa maninge. Iye adakaukiriwa na gulu ya wanthu, kumangiwa, kuphwanyikiriwa na barko pa madzi ndipo adakakhala mu djeri kwa kanthawe.

17. Ko nchani chomwe chimbalimbikisa Paulo pa nthawe ya chidzudzo? (2 Akorinto 4:16-18)

¹⁷ Paulo wenze na mphanvu zizinji zokwanisira kupirira mabvuto mwaya, ndawa ambaganizira va chidikhiro chake cha kutsogolo. (Werengani 2 Akorinto 4:16-18.) Iye adauza wanthu wa ku Korinto kuti thupi yake yenze ‘yofoka,’ olo venze teno iye ambakhalalini wokhumudwa. Paulo ambaganizira va tsogolo yake. Chidikhiro chake chakudzulu cha moyo wosapera chenze ‘chidikhiro chikulu maninge na chodabwisa,’ ndawa ya vimwevi venze vobveka kuti iye agumane na mabvuto na chidzudzo. Paulo ambaganizira va chidikhiro chimwechi, ndawa ya vimwevi iye ‘ambakhala wamphanvu pa mabvuto ya ntsiku na ntsiku.’

18. Ko chidikhiro chidalimbikisa tani Tihomir na azibale wake?

¹⁸ Chidikhiro cha kutsogolo ndicho chidalimbikisa m’bale munango waku Bulgária, dzina  yake Tihomir. Magole yapita m’mbuyomu m’bale wake ng’ono dzina yake Zdravko, adafa pangozi. Ndawa ya vimwevi, Tihomir adakhala wokwinyilira maninge. Kuti alimbane na bvuto mweyi, iye na wa m’banja mwake adayamba kuganizira momwe kumukisiwa kwa akufa kudzakhalire. Iye adati: “Mwakulinganiza, timbaganizira va mbuto yomwe tidzagumane naye Zdravko, chakudya chomwe tidzamuphikire, wanthu omwe tidzachemere iye akadzamukisiwa na kudzamufotokozera vomwe vidachitika mu ntsiku zakumalizira.” Tihomir adanena kuti kuganizira va chidikhiro mwechi ndiko kudalimbikisa azibale wake kupitiriza kupirira pakudikhira nthawe chaiyo pomwe Yahova adzamukise m’bale wawo.

19. Ko imwepo mungachite chani kuti mulimbise chidikhiro chanu? (Onani pomwe foto.)

¹⁹ Ko imwepo mungalimbise tani chidikhiro chanu? Peno chidikhiro chanu ni chodzakhala pano pa dziko yapasi, werengani nkhani za m’Baibolo zolewa va paradaiso na kuganizira vimwevo. (Yes. 25:8; 32:16-18) Ganizirani momwe moyo udzakhalire mu dziko inyowani. Ko Mudaganizirako kale muli mu dziko inyowani? Mwakulinganiza, munkuona mbani? Munkubva zungo yanyi? Ndipo munkubva tani? Chomwe chingakuthandizeni kuganizira va paradaiso ni kuona mafoto mu vofalisa vathu panango kunyanganira mavidiyo ya nyimbo ninge yakuti Dziko Latsopano Lomwe Likubwera, Dziko inyowani ili pafupi, panango Ganizira Nthawiyo. Nthawe zose tikapatula nthawe kuganizira momwe moyo udzakhalire mudziko inyowani, mabvuto yathu yadzakhale ‘yakanthawe komasoti yosashupa kuyapirira.’ (2 Akor. 4:17) Chidikhiro chomwe Yahova adatipasa ndicho chidzatithandize kukhala olimba.

20. Pomwe tili ofoka, tingachite chani kuti tikhale na mphanvu?

²⁰ Podiya pa nthawe yomwe tinkudzibva ofoka, tinkudziwa kuti ‘na thandizo ya Yahova tidzakwanise kukhala na mphanvu.’ (Sal. 108:13) Yahova atipasa vose vodekana kuti tikwanise kutambira mphanvu zake. Manje imwepo mungadekane thandizo kuti mukwanirise utumiki munango, kulimbana na bvuto komasoti kuti mupitirize kukhala wokondwa. Muuzeni Yahova m’pemphero ndipo nyang’anani malangizo yake pa pfunziro yanu ya pamwekha. Bvumani thandizo na chilimbikiso cha abale na alongo. Nthawe zose patulani nthawe yoganizira momwe moyo udzakhalire mu dziko inyowani. Mwanjira imweyi, chidikhiro chanu chidzakhale chaicho komasoti chogaka. ‘Imwepo mudzalimbikisiwe na mphanvu zose pakuphatisa basa mphanvu za ulemerero wa [Mulungu] ndipo mudzakwanise kupirira modekha komasoti mokondwa.’—Akol. 1:11.