NKHANI YOPFUNZIRA 2
Timbatamande Yahova mu mpingu
‘Nidzakutamandeni pakati pa —Sal. 22:22.
NYIMBO Na. 59 Tamandani Ya Limodzi ndi Ine
VOMWE TIPFUNZIRE a
1. Ko Davide adawonesa tani kuti ambakonda maninge Yahova?
MPFUMU Davide adanemba kuti: ‘Yahova ni nkulu na wodikana kutamandiwa maninge.’ (Sal. 145:3) Iye ambakonda maninge Yahova ndipo vimwevi vidamulimbikisa kuti ambamutamande ‘pakati pa Mpingu.’ (Sal. 22:22; 40:5) Ni vosachita kubvunza kuti imwepombo mumukonda Yahova ndipo muchabverana na mawu ya Davide yakuti: ‘Mudalisike [panango kuti mutamandike] imwepo Yahova Mulungu wa Izirayeli ababa wathu, kuyambira kalekale mpakana kalekale.’—1 Mbiri 29:10-13.
2. (a) Ko tingatamande tani Yahova ntsiku zino? (b) Ko wanthu anango achakhala na bvuto iponi, ndipo tikambirane chani mu nkhani mweyi?
2 Tikambadawira pamisonkhano tichakhala tinkutamanda Yahova. Koma abale na alongo anango achashupika maninge kuchita vimwevi. Iwo achada kumbadawira koma achachita mantha. Ko angambachite tani kuti aleke kumbakhala na mantha? Manje ni mpfundo ziponi zomwe zingatithandize ise tose kuti timbapereke ndemanga zolimbikisa? Tikalibe kukambirana midawiro ya mibvunzo mwaya, naboni tiwone pakuyamba vifukwa 4 vomwe vichachitisa kuti timbadawire pamisonkhano.
NDAWA CHANI TICHADEKANA KUMBADAWIRA PAMISONKHANO?
3-5. (a) Mobverana na Aheberi 13:15, ko tingabve tani wanthu anango akambadawira pamisonkhano? (b) Ko mungaonese tani kuti muchatembeja ndemanga zomwe zakulimbikisani? Fotokozani.
3 Yahova adatipasa tose mwayi womutamanda. (Sal. 119:108) Tikambadawira pa misonkhano tichakhala kuti tinkupereka ‘ntsembe zotamanda Mulungu’ ndipo palibe munthu munango yemwe angatiperekere ntsembe mwezi. (Werengani Aheberi 13:15.) Ko Yahova achada kuti tose timbapereke ntsembe panango ndemanga zolingana? Neye!
4 Yahova achadziwa kuti tichasiyana maluso komasoti vinthu vinango. Ndipo mwapa achatembeja ntsembe zomwe aliyese achakwanisa kupereka. Ganizirani za ntsembe zochokera kwa Aizirayeli wosauka womwe angakwanisalini kuchita vimwevi ambabvumiziwa kuti apereke ‘njiwa ziwiri panango wana awiri wa n’khangaiwa.’ Ndipo ngati wenze wosauka maninge mwakuti angakwaniselini kupereka vimwevi ambabvumiziwa kupereka ‘ufa wosalala wokwana gawo ibodzi mwa magawo 10 ya mpimo wa efa.’ (Lev. 5:7, 11) Ufa muyu wenzelini wodula koma Yahova angatembeja ntsembe mweyi malingana ukakhala wosalala.
5 Maganizo ya Mulungu wathu wokoma moyo alibe kuchinja pa nkhani mweyi. Iye achadikhiralini kuti tose tikambapereka ndemanga timbayankhule mwa luso ngati Apolo panango mochitisa chidwi ngati Paulo. (Mac. 18:24; 26:28) Vomwe Yahova achada ni vakuti timbayesese kupereka ndemanga zabwino momwe tingakwanisire. Kumbukirani chitsanzo cha mkazi wamasiye yemwe adapereka tukobiri tuwiri tokha. Yahova adamutembeja maninge nkazi muyu ndawa adapereka vomwe adakakwanisa.—Luka 21:1-4.
Kupereka ndemanga kuchatithandiza isepano na anango (Onani ndime 6-7 c
6. (a) Mobverana na Aheberi 10:24, 25 ko tingabve tani wanthu anango akadawira pamisonkhano? (b) Ko mungawonese tani kuti muchatembeja ndemanga zomwe zakulimbikisani?
6 Tikambapereka ndemanga tichalimbikisana. (Lewengani Aheberi 10:24, 25.) Tose tichakhala wokondwa tikabva ndemanga zosiyanasiyana pamisonkhano yathu. Mwakulinganiza, mawu yochepa yomwe mwana achadawira mochokera pasi pa ntima achatikondweresa maninge. Tichalimbikisiwa soti munthu akafotokoza mpfundo yokondweresa yomwe wapfunzira. Tichalimbikisiwa soti wanthu womwe achalimba moyo n’kudawira olo kuti anamanyazi panango ankupfunzira chiseweredwe chathu. (1 Ates. 2:2) Ko tingawonese tani kuti tichatembeja pa vomwe achachita? Misonkhano ikapera, tingakwanise kuwatembeja ndawa ya ndemanga zawo zolimbikisa. Tingaonese pomwe kutembeja ndemanga zawo tikambaperekambo ndemanga zathu. Tinkunena teno ndawa yakuti tikambachita vimwevi tichaonesa kuti tindofunalini kundolimbikisiwa koma isembo tinkufuna kulimbikisa wanthu anango pamisonkhano.—Aro. 1:11, 12.
7. Ko kupereka ndemanga kutithandiza tani?
7 Kupereka ndemanga kuthandiza pomwe isepano. (Yes. 48:17) Ndawa chani tinkulewa tene? Chakuyamba, peno tinkufuna kukapereka ndemanga tichakonzekera bwino misonkhano. Ndipo tikambakonzekera bwino tichabvesesa Mawu ya Mulungu. Tikambabvesa bwino Baibolo ndipo patichatewedza maninge mpfundo zomwe tapfunzira. Chachiwiri, tichakondwa maninge na misonkhano ndawa tinkudawirambo. Chachitatu, pakuti pachadekana kuchita khama kuti tidawire, mpfundo zomwe tinkudawira tiziyebwalini.
8-9. (a) Mobverana na Malaki 3:16 ko munkuganiza kuti Yahova achabvatani tikambadawira pamisonkhano? (b) Ko wanthu anango angakhale na bvuto iponi?
8 Tichakondweresa Yahova tikambafotokoza vomwe tichakhulupirira. Yahova achabvesera tikambadawira pamisonkhano ndipo achatembeja vose vomwe tinkuchita kuti tidawire. (Lewengani Malaki 3:16.) Tikambayesesa kumukondweresa iye achatidalisa.—Mal. 3:10.
9 Pamwapa vinkuonekeratu kuti tinavifukwa vobveka vomwe vichatichitisa kuti timbadawire pamisonkhano. Koma wanthu anango angambachite mantha basi kudawira. Peno viriteno kwa imwepo, ayi kukhala na nkhawa. Manje naboni tikambirane mpfundo zinango za m’Baibolo, vitsanzo va wanthu anango ndiposoti vinthu vinango vomwe vingatithandize kuti timbadawire maninge pamisonkhano.
VOMWE TINGACHITE KUTI TISAMBAGOPE KUDAWIRA
10. (a) Ndawa chani wanthu anango achachita mantha kudawira pamisonkhano? (b) Ndawa chani muchadekanalini kukhala na nkhawa peno muchagopa kudawira pamisonkhano?
10 Ko imwepo muchachita mantha mukaganizira voyimisa djanja kuti mudawire? Peno nteno dziwani kuti ndimwelini mwekha. Azinji ise tikhalambo na mantha tikafuna kudawira. Koma kuti mumalise bvuto mweyi, chakuyamba muchadekana kudziwa vomwe vinkukuchitisani mantha. Ko mugopa kuti muyebwe vomwe munkufuna kulewa panango mulewe vophonyeka? Panango ko muchaganiza kuti ndemanga yanu ingakhalelini yabwino ninge ya wanthu anango? Peno muchagopa vimwevi, ayi kukhala na nkhawa ndawa viwonesa kuti ndimwe wodzichepesa komasoti muchaona kuti wanthu anango achakuposhani. Yahova achawakonda wanthu wodzichepesa tene. (Sal. 138:6; Afil. 2:3) Koma iye achada kuti mumbamutamande na kulimbikisa abale na alongo wanu kumisonkhano. (1 Ates. 5:11) Iye achakukondani ndipo angakuthandizeni kuti mukhale wolimba moyo nkumbadawira.
11. Ko ni mpfundo za m’malemba ziponi zomwe zingatithandize kuti tileke kumbagopa kudawira?
11 Manje naboni tikambirane mpfundo zinango za m’Baibolo zomwe zingatithandize. Baibolo ichafotokoza kuti tose tichaphonyesa nthawe zinango pakuyankhula. (Yak. 3:2) Yahova komasoti abale na alongo wathu adikhiralini kuti timbachite vabwino vokhavokha osaphonyesako chirichose. (Sal. 103:12-14) Abale na alongo mwawa ali ngati azibale wathu ndipo achatikonda maninge. (Maliko 10:29, 30; Yoh. 13:35) Achadziwasoti kuti nthawe zinango tingafotokoze mpfundo momwe tinkufunira.
12-13. Ko tinkupfunzirapo chani pa chitsanzo cha Nehemiya na Yona?
12 Vitsanzo va wanthu anango wotomolewa m’Baibolo vingatithandize pomwe kuti tileke kumbachita mantha. Mwakulinganiza Nehemiya ambaphata basa mu m’nyumba ya mpfumu yamphanvu. Pa nthawe inango, adakalipa maninge padabva kuti mpanda komasoti magedi yaku Yerusalemu yadakali yodzongeka. (Neh. 1:1-4) Vinkuoneka kuti Nehemiya adachita mantha pomwe mpfumu idamubvunza vomwe vamukalipisa. Iye adapemphera mwakankulumize patsogolo pake adadawira. Mpfumu pidabva vomwe vidachitika idathandiza maninge wanthu wa Mulungu. (Neh. 2:1-8) Chitsanzo chinango ni cha Yona. Yahova padamutuma kuti akalalikire ku Nineve adachita mantha maninge mwakuti adathawira kutali. (Yona 1:1-3) Koma Yahova adamuthandiza kuti aiphate bwinobwino basa mweyi. Ntontholo womwe Yona adapereka udathandiza maninge wanthu wa ku Nineve. (Yona 3:5-10) Nkhani ya Nehemiya inkuwonesa kuti kupemphera tikanati kudawira kuchathandiza maninge. Ndipo nkhani ya Yona inkuwonesa kuti Yahova angakwanise kutithandiza kuti timbachite vomwe achada podiya kuti tinamantha maninge. Ndiye m’bvunzo n’kumbati, ko alipo mpingu yemwe wanthu wake angakhale wopasa mantha ngati wa ku Nineve?
13 Ko ni vinthu viponi vomwe vingakuthandizeni kuti mumbapereke ndemanga zolimbikisa kumisonkhano? Naboni tikambirane vinango mwa vinthu vimwevi.
14. Ndawa chani tichadekana kukonzekera bwino misonkhano, ndipo tingachite vimwevi pa nthawe iponi?
14 Mumbakonzekere misonkhano yose. Mukambakonzekera bwino, mungakwanise kulimba ntima kuti mudawire. (Miy. 21:5) Koma sikuti ise tose tichakonzekera mu njira yolingana. Mwakulinganiza, Mlongo Eloise, yemwe ni wamasiye komasoti wa magole 80, achayamba kukonzekera Ntsanja ya ulonda cha kumayambiriro kwa sondo. Iye adati: “Nikakonzekereratu nichakondwa maninge na misonkhano.” Mlongo munango pomwe dzina yeke Djoyi, yemwe achaphata basa yonembewa, achakonzekera pa satade Ntsanja ya ulonda. Iye adati: “Nikakonzekera pa satade vinichitisa kuti nikumbukire mosashupa mpfundo zake.” Mbale Ike , yemwe ni nkulu komasoti mpainiya adati: “Nikonzekeralini pfunziro yose nthawe ibodzi. Nichakonda kukonzekera pang’onopang’ono nkati mwa sondo.”
15. Ko tingachite tani kuti timbakonzekere bwino misonkhano?
15 Ko tingachitetani kuti timbakonzekere bwino? Mukalibe kuyamba kukonzekera mumbakumbire Yahova kuti akupaseni nzimu uchena. (Luka 11:13; 1 Yoh. 5:14) Patsogolo pake mumbawone mwa chigwato vomwe viri mu nkhani mwiyo. Mwakulinganiza, mumbawone msolo, timisolo tung’onotung’ono, mafoto na mabokosi. Ndipo mukayamba kupfunzira ndime iriyose, mumbayesese kulewenga malemba yosaphatiwa mawu. Mukambakonzekera bwino, nkhani iyo ikufikani pa moyo maninge ndipo vichakhala vosashupa kuti mukadawire.—2 Akor. 9:6.
16. Ko ni vinthu viponi vomwe muli navo pa vipangizo vachizungu, ndipo mungaviphatise basa tani?
16 Peno ni vokwanisika mumbaphatise basa vipangizo vachizungu. Gulu ya Yahova yatipasa vinthu vizinji pa vipangizo vachizungu vomwe vingatithandize pakukonzekera misonkhano. Mwakulinganiza, polograma ya JW Library® ichatithandiza kuti tikhale na mabukhu komasoti vinthu vinango pa vipangizo vathu. Vimwevi vichatithandiza kuti timbakwanise kupfunzira, kulewenga panango kuvibvesera nthawe iriyose komasoti kulikose. Anango achaphatisa basa vinthu vimwevi kuti ambapfunzire pa nthawe yopumula kubasa panango kushikola olo pakufamba. Vinthu ninge Watchtower Library komasoti Watchtower ONLINE LIBRARY™ vichatithandiza tikambafagafaga nkhani zomwe tinkufuna kupfunzira mozama.
Ko imwepo muchakonzekera nthawe iponi misonkhano? (Onani ndime 14-16) d
17. (a) Ndawa chani kukonzekera ndemanga zinganani nikothandiza? (b) Ko mwaphunzira chani pa vidiyo yakuti Khalani Bwenzi La Yehova—Uzikonzekera Zimene Ukayankhe?
17 Peno ni vokwanisika mumbakonzekere ndemanga zinganani pa pfunziro iriyose. Tinkunena teno ndawa yakuti nthawe zinango wochitisa pfunziro angakulatenilini pomwe mwayimisa djanja. Pakuti anango achayimisambo manja wochitisa angalate munthu munango osati imwepo. Pakusafuna kudya nthawe angafunelini kuti wanthu azinji adawire pa mpfundo ibodzi. Manje ayi kumbakalipa peno mulibe kulatiwa cha kumayambiriro kwa pfunziro. Koma peno mwakonzekera ndemanga zinganani, vingakhale vosashupa kuti mugumane mwayi wodawirambo pa nthawe inango. Mungakonzekere soti kuti mukawerenge lemba. Peno ni vokwanisika, mungayesese pomwe kukonzekera kuti mukadawire mu mawu yanu yanu. b
18. Ndawa chani tichadekana kupereka ndemanga zachigwato?
18 Mumbapereke ndemanga zachigwato. Nthawe zizinji ndemanga za chigwato na zosashupa kubva ndizo zichakhala zolimbikisa maninge. Nipo mwapa mumbayesese kupereka ndemanga za chigwato. Mumbayesese kuti ndemanga yanu ayi kuti imbapitirire 30 segundo. (Miy. 10:19; 15:23) Peno mwakhala munkudawira pa misonkhano kwa magole yazinji muchadekana kupereka chitsanzo chabwino pa nkhani yopereka ndemanga za chigwato. Mukambapereka ndemanga zitalizitali na zoshupa, wanthu anango angambakumbuke kuti kumuko ndiko kudawira kwabwino ndipo iwo angakwaniselini. Chinthu chinango pomwe ni chakuti mukambapereka ndemanga zachigwato, wanthu achakhala na mpata wodawirambo pa misonkhano. Peno ndimwe woyamba kudawira pa ndime, mumbapereke ndawiro wasitiriti na wosashupa. Ayi kumbafotokoza mpfundo zose za mundime mweyo. Peno munthu munango wadawira kale mpfundo ikulu, imwepo mungafotokozembo pfundo zinango.—“ Wonani bokosi yakuti: Kodi ndinganene zinthu zotani poyankha?”
19. Ko mungachitetani kuti wochitisa pfunziro akulateni pa ndime yomwe munkufuna kudawira?
19 Mungamuuziretu wochitisa pfunziro ndime yomwe munkufuna kudawira. Ngati munkufuna kuchita vimwevi, vingakhale bwino kumuuziratu wochitisa pfunziro misonkhano ikalibe kuyamba. Manje ndime yomwe munkufuna kudawira ikafika, mumbayimise djanja ndzulu maninge komasoti mwakankulumize kuti akuwoneni.
20. Ko misonkhano ya mpingu yalingana tani na chakudya chomwe muchadya na anzanu?
20 Mumbawone kuti misonkhano yali ninge chakudya chomwe munkudya na anzanu wapamoyo. Tilinganize kuti abale na alongo akuchemerani kuti mukadye nawo chakudya ndipo akukumbirani kuti imwepo mukaphikembo kachakudya kang’onong’ono. Ko mungachite tani? Mungakhale na nkhawa pang’ono, koma mungayesese kuphika chakudya chomwe aliyese angachikonde. Yahova ndiye yemwe achatichemera kumisonkhano ndipo achatikonzera vinthu vabwino maninge. (Sal. 23:5; Mat. 24:45) Iye achakondwa tikambabweresambo mphaso yomwe tingakwanise. Ndipo mwapa timbayesese kukonzekera bwino na kudawira momwe tingakwanisire. Tikambachita vimwevi tichakhala ninge tinkudya pa mesa ya Yahova na kupereka mphaso kwa wose mumpingu.
NYIMBO NA. 2 Dzina Lanu Ndinu Yehova
a Molingana na Davide tose tikonda Yahova ndipo tichada kumutamanda. Tikayenda kumisonkhano ya Mpingu tichakhala na mwayi wochita vimwevi. Koma anango ise vitishupa kudawira pa misonkhano. Peno imwepombo munabvuto mweyi, nkhani mweyi ikuthandizeni kuti mudziwe vomwe mungachite kuti muleke kumbachita mantha kudawira pa misonkhano.
b Yanganirani vidiyo ya pa jw.org, yakuti Khalani Bwenzi La Yehova—Uzikonzekera Zimene Ukayankhe. Yendani, pomwe walemba kuti: ZIMENE BAIBULO LIMAPHUNZITSA> ANA..
