YESU ambapfunzisa va kupemphera. Mu nthawe yake atsogoleri wa vipembedzo wa Chiyuda angapemphera pa “mphambano za misewu yakuluyakulu.” Ndawa chani iwo angachita vimwevi? Ambafuna kuti “wanthu ambawawone.” Kunena shuwa iwo ambafuna kudziwonesera kuti ni wanthu wopemphera maninge. Azinji mwa wanthu mwawa mapemphero yawo yenze yataliyatali maninge na yobwerezerabwerezera ninge kuti kuphatisira basa “mawu yazinji” ndiko komwe kuchachitisa kuti yambabveke mapemphero. (Mateyu 6:5-8) Yesu adanena mobveka bwino kuti khalidwe mweyi ni yabwinolini, ndipomwapa adapfunzisa wanthu wa ntima wabwino kuti ambapewe kuchita vimwevi pakupemphera. Koma, sikuti ambandowapfunzisa vakuti ambapewe pakuphemphera chabe neye.

Yesu adapfunzisa kuti mapemphero yathu yachadekana kuwonesa kuti Tinkufunisisa kuti dzina ya Mulungu ichenesewe, Ufumu wake ubwere nakuti chifuniro chake chichitike. Iye adapfunzisa soti kuti nikodekana kukumbira Mulungu kuti atithandize pa vinthu va pamoyo wathu. (Mateyu 6:9-13; Luka 11:2-4) Yesu adaphatisa basa chitsanzo pakuwonesa kuti kupemphera tichadekana kulimbikira, kukhala na chikhulupiriro komasoti kudzichepesa peno tikufuna kuti mapemphero yathu yabvewe. (Luka 11:5-13; 18:1-14) Ndipo Yesu popemphera adawona bwinobwino vomwe ambafunisisa.—Mateyu 14:23; Maliko 1:35.

Tikukaikiralini kuti malangizo mwaya yadawathandiza wopfunzira wa Yesu kuti mapemphero yawo yambakhale yabwino. Olo venze teno, Yesu adadikhira mpakana usiku wake womalizira padziko yapasi pano kuti apfunzise wopfunzira wake vinthu vodekana maninge akambapemphera.

Yesu adamala nthawe ikulu pa usiku wake wakumaliza padziko ino yapasi akulimbikisa atumi wake wokhulupirika. Imweyi yenze nthawe yodekana kuwauza kanthu kanango kanyowani. Yesu adati: ‘Inepano ndine njira chonadi na moyo. Palibe yemwe angafike kwa Ababa osapitira mwayine.’ Pamwapo adaingizira vinthu volimbikisa ivi: ‘Chilichose chomwe mudzakumbire mu dzina yangu, nidzachite chimwecho, kuti Ababa alemekezeke mwa Mwana wake. Peno mukukumbira chilichose mudzina yangu, nidzachite chimwecho.’ Padakhala pang’ono kumaliza kuchezerana, iye adati: “Mpakana pano mukanati mwakumbira chilichose mu dzina yangu. Kumbirani ndipo mudzatambire, kuti mukhale wokondwa maninge.”—Yohane 14:6, 13, 14; 16:24.

Mawu mwaya yenze yodekana maninge. Bukhu inango yotsumbudzulira mawu mwaya m’Baibolo idati, “pamwapa ndipo pomwe padachinjira vinthu pa nkhani ya kupemphera.” Yesu alibe kuthandauza kuti wanthu asiye kupemphera kwa Mulungu achimbapemphera kwa iye. M’malo mwake, iye ambawawonesa njira inyowani pakupemphera kwa Yahova Mulungu.

Kulewa shuwa Mulungu nthawe zose ambabvera mapemphero ya atumiki wake wokhulupirika. (1 Samueli 1:9-19; Salimo 65:2) Koma kuyambira nthawe yomwe Mulungu adachita pangano na Aizirayeli, wanthu womwe angada kuti Mulungu abve mapemphero yawo, angadekana kubvuma kuti Aizirayeli enze mtundu wosaluliwa na Mulungu. Ndipomwapa, kundoyambira nthawe ya Solomo, angadekana kubvuma kuti kachisi wenze malo yomwe Mulungu wenze adasankhula kuti ambaperekereko ntsembe. (Deuteronomo 9:29; 2 Mbiri 6:32, 33) Koma, kutumikira mu njira mweyi kwenze kwa kanthawe. Malingana na kunena kwa ntumi Paulo, chilamulo chomwe chidaperekewa kwa Aizirayeli komasoti ntsembe zomwe angaperaka pakachisi zenze “chizindikiro cha vinthu vabwino vomwe vikubwera, osati kuti chenze chinthu chaicho.” (Aheberi 10:1, 2) Chizindikiro mwechi chimbafunika kupitiwa m’malo na vinthu chaivo. (Akolose 2:17) Kuyambira mu 33 EC, kuti munthu akhale paushamwali na Yahova vimbathembalini pomwe kutewedza chilamulo cha Mose koma vimbathemba kubvera Yesu Khrisitu, ndawa yakuti Chilamulo chimbatsogolera wanthu kwa Yesu Khrisitu.—Yohane 15:14-16; Agalatiya 3:24, 25.

Yesu adakhazikisa njira yakudikana maninge yopempherera kwa Yahova. Ndipo iye adzichemera kuti ni shamwali wamphanvu, yemwe afungula njira kuti Mulungu abve na kudawira mapemphero yathu. Ko ni chani chomwe chichitisa Yesu kutichitira vimwevi?

Pakuti tose tidabadwa wochimwa vomwe tichachitisa komasoti ntsembe zomwe tichapereka zingachosereni machimo mwaya olo kutichitisa kukhala pa ushamwali na Mulungu wathu wakuchena, Yahova. (Aroma 3:20, 24; Aheberi 1:3, 4) Koma Yesu adaperaka moyo wake wangwiro kuti awombole wanthu womwe angafune kukhala paushamwali na Mulungu. (Aroma 5:12, 18, 19) Manje wanthu wose omwe akufuna kuti machimo yawo yakhululukiriwe anamwayi wokhala paushamwali wabwino maninge na Yahova komasoti kukondwa na ‘ufulu wa kuyankhula’ na Mulungu. Koma mwevi ni vokwanisika pokhapokha munthu akawonesa chikhulupiriro mu ntsembe ya Yesu komasoti akambapemphera mu dzina yake.—Aefeso 3:11, 12.

Tikambapemphera mu dzina ya Yesu tikhala tikuwonsea chikhulupiriro chakuti iye achakwanirisa chifuniro cha Mulungu mu njira zitatu izi: (1) Iye ni “Mwanawankhosa wa Mulungu,” yemwe ntsembe yake ichitisa kuti machimo yathu yakhululukiriwe. (2) Adamukisiwa na Yahova ndipo manje ni “nkulu wa wantsembe”yemwe akutithadiza kuti tiphindule na dipo. (3) Ndiye yekha yemwe ni “njira” yofikira kwa Yahova m’pemphero.—Yohane 1:29; 14:6; Aheberi 4:14, 15.

Tikambapemphera mu dzina ya Yesu tiwonesa kuti timulemekeza. Iye achadikanadi kulemekezewa ndawa chifuniro cha Yahova ni chakuti “mu dzina ya Yesu, wose afunye nkhongono zawo, . . . , aliyese abvume pachena na chirilimi chake kuti Yesu Khrisitu ndiye Ambuya, pakulemekeza Mulungu.” (Afilipi 2:10, 11) Koma chodekana maninge tikambapemphera mu dzina ya Yesu nichakuti tilemekeza Yahova yemwe adaperaka Mwana wake kuti vinthu vitifambire bwino.—Yohane 3:16.

Pakufuna kubvekesa kukula kwa udindo wa Yesu, Baibolo iphatisa basa mawu yosiyanasiyana yomulemekeza. Vimwevi vitithandiza kuzindikira madaliso yazinji yomwe tichagumana ndawa ya vomwe Yesu adachitira, akutichitira na vomwe adzatichitire. (Onani bokosi yakuti  “Udindo Wofunika wa Yesu”.”) Shuwadi, Yesu adapasiwa “dzina yoposha iliyose.” a Utongi wose kudzulu na padziko yapasi udaperekewa kwa iye.”—Afilipi 2:9; Mateyu 28:18.

Shuwadi, tichadekana kupemphera mu dzina ya Yesu peno tikufuna kuti Yahova abve mapemphero yathu. (Yohane 14:13, 14) Koma tichadekanalini kubwerezere mawu yakuti “mu dzina ya Yesu” ndawa yakuti tidadjaira kuyankhula teno. Ndawa chani?

Onani chitsanzo ichi. Mukatambira kalata, kazinjikazinji imaliza na mawu yakuti “namaliza ndine wanu.” Ko mukuganiza kuti mawu mwaya yachawonesa maganizo ya munthu yemwe wanemba kalata mweyo, panango wandonemba ndawa yakuti wanthu adadjaira kunemba mawu mwaya? Shuwadi, timbaphatise basa dzina ya Yesu pakupemphera na thandauzo osati ninge ya komalizira kwa kalata neye. Podiya kuti tikufuna ‘kupemphera mosalekedza,” tichite vimwevi ‘na ntima wathu wose,’ osati ndawa ya kuzolowera.—1 Atesalonika 5:17; Salimo 119:145.

Ko imwepo mungapewe tani kuphatisa basa mawu yakuti “mu dzina ya Yesu” ndawa yakuti mudadjaira? Tani kuganizira makhalidwe yabwino ya Yesu? Ganizirani vomwe wakuchitirani kale na vomwe akufuna kukuchitirani. Popemphera, tembejani Yahova na kumutamanda ndawa ya momwe waphatisira basa Mwana wake. Mukachita vimwevi, mudzawone kuti polomisi ya Yesu ni yothembeka maninge yakuti: ‘Mukambakumbira chilichose kwa Ababa mu dzina yangu adzakupaseni.’—Yohane 16:23.