KO KUPEMPHERA kungatithandize? Inde, ndawa Baibolo inena kuti mapemphero ya atumiki okhulupirika wa Mulungu yawathandizadi. (Luka 22:40; Yakobo 5:13) Komasoti kupemphera kungatithandize maninge pa vinthu vauzimu. Kungatithandizepomwe kuganiza bwino komasoti kuti tikhale na thanzi yabwino. Ko vimwevi vingachitike tani?

Tilinganize kuti muna mwana mng’ono yemwe wapasiwa mphaso. Ko mungamupfunzise kuti ambandotembeja mphaso mweyo chamuntima? Panango mungamupfunzise kuti ambalewe mawu yowonesa kuti akutembeja? Tikamuuza munthu munango momwe tikubvera muntima mwathu pa nkhani inango yodikana, tiyamba kuganizira maninge va nkhani mweyo ndipo ikhazikika muntima mwathu. Ko vimwevi vichachitikasoti tikambayankhula na Mulungu? Inde. Ndoganizirani vitsanzo ivi.

Mapemphero yotembeja. Kutembeja Ababa wathu pa vinthu vabwino vomwe vatichitikira, kuchitisa kuti timbaganizire vinthu vabwino vomwe iye atichitira. Vimwevi vingachitise kuti tikhakhale na ntima wotembeja, timbakondwe komasoti tisambandokhalira kudandaula nthawe zose.—Afilipi 4:6.

Chitsanzo: Yesu adatembeja Ababa wake ndawa ya momwe angadawirira mapemphero yake.—Yohane 11:41.

Mapemphero yokumbira kuti Mulungu atikhululukire. Tikakumbira Mulungu kuti atikhululukire, tikhala na chikumbuntima chabwino, tizindikira kuipa kwa vomwe tachita ndipo tilapadi kuchokera pasi pamoyo. Tigumanapomwe ntendere wamuntima m’malo mokhala munthu wokwinyirira.

Chitsanzo: Davide adapemphera powonesa kulapa komasoti kukwinyirira komwe wenze nako.—Salimo 51.

Kupemphera kuti Mulungu atitsogolere komasoti atipase nzeru. Kukumbira Yahova kuti atitsogolere panango kuti atipase nzeru zotithandiza kusalula bwino vochita, kungatithandize kukhala odzichepesa chaivo. Kungatikumbuse kuti pana vinthu vinango vomwe tingakwaniselini kuvichita ndipo kungatithandizesoti kuti timbakhulupirire maninge Ababa wathu wakudzulu.—Miyambo 3:5, 6.

Chitsanzo: Solomo adapemphera modzichepesa kuti Mulungu amutsogolere komasoti kuti amupase nzeru zomuthandiza kutonga Aizirayeli.—1 Mafumu 3:5-12.

Kupemphera tikakhala pa mabvuto. Tikamutulira Mulungu nkhawa zathu zose tigumana ntendere wamuntima ndipo tidzayambe kuthemba maninge Yahova, m’malo modzithemba tekha.—Salimo 62:8.

Chitsanzo: Mpfumu Asa adapemphera padagopsewa na nzondi wamphanvu maninge.—2 Mbiri 14:11.

Kupempherera anango. Kupempherera anango kutithandiza kupewa kudzikonda ndipo kutithandiza kukulisa ntima wachifundo na woganizira anango.

Chitsanzo: Yesu adapempherera ateweri wake.—Yohane 17:9-17.

Mapemphero yotamanda Mulungu. Tikambatamanda Yahova ndawa ya vinthu vokondwesa vomwe adasika komasoti makhalidwe yake yochitisa chidwi tichayamba kumupasa ulemu komasoti kumutembeja maninge. Mapemphero mwaya yangatithandizesoti kuti timbafenderere Mulungu Ababa wathu.

Chitsanzo: Davide adatamanda Mulungu na moyo wose ndawa ya vomwe adasika.—Salimo 8.

Ubwino unango wa pemphero ni wakuti, tigumana ‘ntendere wa Mulungu womwe uposha kuganiza kulikose.’ (Afilipi 4:7) Mudziko yamabvuto iyi, ni voshupa kugumana ntendere wateneuyu. Ntendere wamuntima uchitisasoti kuti tikhale na thanzi yabwino. (Miyambo 14:30) Koma olo nteno, ko ntendere moyu tingaugumane ndawa ya khama yathu yokha? Panango pana chinthu chinango chofunika maninge?