WANTHU anango achanena kuti pa mapemphero yose yachikhrisitu, pemphero yomwe idanembewa mobwerezabwereza ni pemphero ya chitsanzo ya Yesu yomwe anango achayifotokoza kuti pemphero ya Ambuya panango ya Ababa wathu wakudzulu. Peno vimwevi ni shuwadi panango neye, mpfundo ni yakuti pemphero mweyi ni ibodzi mwa mapemphero yomwe wanthu azinji achayabvesalini. Wanthu azinji ayidziwa bwino ndipo ayinena kanganani ntsiku iliose. Koma chakulinga cha Yesu pa kupfunzisa wanthu pemphero mweyi chenzelini mwicho neye. Ko tikudziwa tani vimwevi?

Akalibe wanena pemphero mweyi, Yesu adati: “Pakupemphera ayi kumbandonena vibodzinavibodzi.” (Mateyu 6:7) Ko Yesu akadalewa mawu mwaya vidakawonesa kuti ankufuna kuti wanthu ambandochita pemphero mweyi mwa kumbandoibwerezera? Neye. Pamwapa chakulinga cha Yesu chenze kutipfunzisa vinthu vomwe tichadekana kumbafotokoza m’pemphero. Pemphero mweyi ichatithandiza soti kudziwa vinthu vodekana kuvirewa chakuyamba tikambapemphera. Naboni tiwone soti bwinobwino vomwe adanena pa pemphero idanembewa pa Mateyu 6:9-13.

Mwapa Yesu adawakumbusa wopfunzira wake kuti mapemphero yose yachadekana kuyenda kwa Ababa, Yahova. Ko munkudziwa ndawa yake dzina ya Yahova ni yodekana komasoti ichadekana kuchenesewa?

Kundoyambira kalekale pomwe wanthu adasikiwa, dzina yakuchena ya mulungu idapswipiziwa na magunkha yomwe wanthu achanena. Satana yemwe ni mzondi wa Mulungu, achalewa kuti Yahova ni wabodza, wotonga wodzikonda ndipo achadekanalini kumbatonga vomwe adavisika. (Genesis 3:1-6) Wanthu azinji abverana na Satana, iwo achapfunzisa kuti mulungu alibe chifundo, ni woipa moyo komasoti achadzudza wanthu. Iwo abvumalini mpfundo yakuti mulungu ni mulengi wa vinthu vose.anango apikisana na dzina ya mulungu chaiyo yakuti Yahova pakuyichosa mu Mabaibolo yawo komasoti pakulambiza wanthu kuti ambayiphatisira basa.

Baibolo ichawonesa kuti Mulungu adzamalise mabodza yose mwaya (Ezekieli 39:7) Pakuchita vimwevi,adzachose soti mabvuto yanu yose na kukupasani vose vomwe mukufunikira. Ko adzachite tani vimwevi? Mawu yomwe Yesu adalewa patsogolo pake mpemphero mweyi yankutipasa m’dawiro wa m’bvunzo moyu.

Ntsiku zino atsogoleri anamaganizo yosiyanasiyana pa nkhani ya Ufumu wa Mulungu. Koma wanthu womwe angabvesera vomwe Yesu adapfunzisa, angadziwa kuti kalekale aneneri wa Mulungu adalosera kuti Mesiya wosaluliwa na Mulungu, adzakhale mpfumu ya Ufumu womwe udzachinje vinthu padziko yapasi. (Yesaya 9:6, 7; Danieli 2:44) Ufumu muyo udzachenese dzina ya Mulungu mwakuchitisa kuti mabodza yose yawonekere. Patsogolo pake Ufumu muyo udzachose Satana na basa zake zose. Ufumu wa Mulungu udzamalise khondo, matenda, njala komasoti impfa. (Salimo 46:9; 72:12-16; Yesaya 25:8; 33:24) Ndipo mwapa mukambapemphera kuti Ufumu moyu ubwere, ndiye kuti munkukumbira kuti mapolomisi yose mwaya yakwinirisike.

Mawu ya Yesu mwaya yankuwonesa kuti ni vosakayikisa kuti chifuniro cha Mulungu chidzachitikedi padziko yapasi pano ninge momwe chikuchitikira kudzulu, komwe Mulungu achakhala. Palibe chomwe chingakangise chifuniro cha Mulungu kudzulu, komwe mwana wa Mulungu adamenyana na Satana pabodzi na viwanda vake ndipo adawathusira padziko yapasi. (Chivumbulutso 12:9-12) Molingana na mawu yoyambirira mu pemphemphero ya Yesu ya chitsanzo, mawu yolewa vakuchitika kwa chifuniro cha Mulungu mwaya, yankutithandiza kuti timbaganizire chinthu chakudikana maninge chomwe ni chifuniro cha Mulungu, osati chathu. Nthawe zose chifuniro cha Mulungu chomwe chichabweresa vinthu vabwino maninge kwa volengewa vose. Ndipomwapa, Yesu olo kuti wenze wangwiro adawuza Ababa kuti: “Chifuniro chanu chichitike osati changu.”—Luka 22:42.

Pamwapa, Yesu adawonesa kuti tingakwanise kukumbira vosowa vathu. Nkuphonyalini kukumbira Mulungu kuti atipase vomwe tinkusowa pa moyo wathu. Ndipo kuchita vimwevi kuchatikumbusa kuti Yahova ndiye “achapasa wanthu wose moyo, mphuwe na vinthu vose.” (Machitidwe 17:25) Baibolo ichaonesa kuti Yahova ni baba wachikondi ndipo achakondwa kupasa wana wake vomwe akufuna. Koma molingana na m’bereki aliyese wabwino, iye achapasalini wanthu vinthu vomwe akudziwa kuti vingawathandizelini.

Ko tichadekanadi kuti Mulungu ambatikhulukire? Wanthu azinji ntsiku zino adasiya kukhulupirira kuti wanthu ise ndise wochimwa ndipo awonalini kuti uchimo ni nkhani ikulu. Koma Baibolo ichawonesa kuti uchimo ni womwe udayambisa mabvuto yose yomwe tinkugumana nayo ndipo ndiwo uchachitisa kuti wanthu ise timbafe. Pakuti tidabadwa na uchimo nthawe na nthawe tiphonyesa ndipo kuti tidzakhale na moyo wosapera vinkuthemba kuti Mulungu ambatikhululukire. (Aroma 3:23; 5:12; 6:23) Nivolimbikisa kudziwa kuti Baibolo ichanena kuti: ‘Imwe Yahova ndimwe Mulungu wabwino ndipo ndimwe wokonzeka kukhululuka.’ —Salimo 86:5.

Ko mukudziwa kuti mukufunikira chitetezo cha Mulungu mwakankulumize? Wanthu anango abvumalini vakuti “woyipa alipodi” yemwe ni Satana. Koma Yesu adapfunzisa kuti Satana shuwadi alipo mwakuti adachita kunena kuti ndiye ‘ntongi wa dziko.’ (Yohane 12:31; 16:11) Ndipomwapa Satana waipisa maganizo ya wanthu azinji m’dziko iyi, ndipo ankufunisisa kuipisa soti maganizo yanu. Chakulinga chake nchakuti tileke kukhala pa ushamwali wabwino na Ababa wathu wakudzulu Yahova. (1 Petulo 5:8) Podiya viriteno, Yahova niwamphanvu maninge kuposha Satana ndipo achakondwa kuteteza wanthu womwe achamukonda Iye.

Pamwapa tilibe kufotokoza vose vomwe tingakumbire, koma tandofotokoza mwachigwato basi mpfundo zikuluzikulu za pemphero yachitsanzo ya Yesu. Mbakumbukirani kuti lemba ya 1 Yohane 5:14 ichati: ‘Chilichose chomwe tingamukumbire [Mulungu] mobverana na chifuniro chake, achatibva’ ndipomwapa ayi kuganiza kuti mabvuto yanu ni yang’ono maninge yakuti mungamuuzelini Mulungu.—1 Petulo 5:7.

Manje tani va nthawe yabwino kupemphera komasoti malo yomwe tingapempherere? Ko vimwevi nivodekana?