MUVIPEMBEDZO vizinji achakonda kupfunzisa wanthu momwe achadikana kukhalira pakupemphera, mawu yomwe achadikana kunena komasoti mwambo womwe achadekana kutewedza. Koma Baibolo ichatithandiza kuona kuti vimwevi ni vosadekana maninge. M’malomwake, ichatilimbikisa kuganizira chinthu chodekana maninge pa m’bvunzo wakuti: “Ko tichadekana kupemphera tani?”

Baibolo ichanena va atumiki wa Mulungu womwe ambapemphera pa malo yosiyanasiyana komasoti na kakhalidwe kosiyanasiyana. Adapemphera cha mumtima ndipo anango adapemphera mwa kuchosa mawu mobverana na momwe vinthu venzere pa nthawe mweyo. Ambapemphera ali nyang’ane kudzulu panango chogwada. Iwo ambaphatisiralini basa mafano, usanga panango mabukhu pakupemphera, koma ambandopemphera mochokera pasi pa moyo ndipo angayankhula mawu yawoyawo. Ko ni chani chidachitisa kuti mapemphero yawo yabvewe?

Ninge mwatanenera kale mu nkhani yapita ire, iwo angapemphera kwa Mulungu m’bodzi, Yahova. Panachinthu chinango pomwe chomwe ni chodikana maninge chomwe adachita. Pa lemba ya 1 Yohane 5:14 tichalewenga kuti: ‘Isepano tichamuthemba kuti chilichose chomwe tingamukumbire mobverana na chifuniro chake achatibvera.’ Ndipomwapa mapemphero yathu yachadekana kukhala yobverana na chifuniro cha Mulungu. Ko vimwevi vinkuthandauza chani?

Kuti timbapemphere mobverana na chifuniro cha Mulungu, chakuyamba tichadekana kudziwa kuti chifuniro chake icho ni chani. Vimwevi vinkuthandauza kuti tichadekana kupfunzira Baibolo kuti mapemphero yathu yakhale yobverana na chifuniro cha Mulungu. Ko vimwevi vinkuthandauza kuti Mulungu achabvesera mapemphero yathu pokhapokha peno ndise mashasha ya Baibolo? Neye, koma Mulungu achada kuti timbapfunzire chifuniro chake, kuchibvesa komasoti kuchita vinthu vobverana na chifuniro chake icho. (Mateyu 7:21-23) Ndipo mwapa, tichadikana kupemphera mobverana na vomwe tichapfunzira m’Baibolo.

Tikambapitiriza kupfunzira va Yahova na chifuniro chake, chikhulupiriro chathu chidzakule. Vimwevi nivodikana peno tichada kuti Mulungu ambabvesere mapemphero yathu. Yesu adanena kuti: ‘Chinthu chilichose chomwe mudzakumbire m’mapemphero yanu mudzatambire peno munachikhulupiriro.’ (Mateyu 21:22) Kukhala na chikhulupiriro kuchathandauzalini kumbandokhulupirira virivose tikanati taganizira bwinobwino. Koma kuchathandauza kukhulupirira chinthu chinango chomwe olo kuti nichosawoneka na maso, panaumboni wamphanvu wakuti chinthu mwicho chilipodi. (Aheberi 11:1) M’Baibolo munaumboni uzinji wowonesa kuti Yahova, olo kuti tingamuwonelini iye alipodi, ni wothembeka ndipo achadawira mapemphero ya wanthu womwe achamukhulupirira. Tingamukumbire pomwe kuti atithandize kumbamukhulupirira maninge ndipo iye achakondwa kutipasa vomwe tichafunikira.—Luka 17:5; Yakobo 1:17.

Yesu adanena chinthu chinango pomwe chodikana maninge pakupemphera. Iye adati: ‘Palibe yemwe achafika kwa ababa wosapitira mwa ine.’ (Yohane 14:6) Vimwevi vinkuthandauza kuti Yesu ni njira yotithandiza kuti mapemphero yathu yafike kwa Ababa, ndipo mwapa Yesu adauza wopfunzira wake kuti ambapemphere mu dzina yake. (Yohane 14:13; 15:16) Koma vimwevi vinkuthandauzalini kuti timbapemphere kwa Yesu, m’malomwake tichadekana kumbapemhera mu dzina ya Yesu pa kudziwa kuti iye ndiye achachitisa kuti mapemphero yathu yafike kwa Ababa wangwiro na wochena.

Nthawe inango wopfunzira wa Yesu adamukumbira kuti: ‘Ambuya, tipfunziseni kupemphera.’ (Luka 11:1) Vinkuwoneka kuti pokumbira vimwevi iwo ambakumbiralini kuti awafotokozere mpfundo zomwe takambirana manjemanje apa, koma adakumbira kuti awauze vinthu vomwe angadekana kufotokoza popemphera. M’mawu yanango m’bvunzo wawo wenze wakuti: “Ko timbakumbire chani?”