PADZIKO yose yapasi wanthu wa makhalidwe komasoti vipembedzo vosiyanasiyana achapemphera. Iwo achapemphera pa wokha panango pagulu. Achapemphera mu matchechi, mukachisi, m’masunagoge, mun’zikiti panango soti pa malo yopempherera mizimu ya makolo yawo. Pakupemphera, anango achagwada pakanguwo kopemphererapo, panango achaphatisa basa kolona. Anango achaphatisa basa chinthu chalaundi chomwe nkati mwake achaikhamo tumapepa tomwe achanembapo mapemphero. Anango achawerenga mapemphero yawo muma bukhu, anango achayanemba pa tumatabwa tomwe achatumanika kutsogolo kwawo

Ni wanthu wokha womwe achapemphera ndipo palibe volengewa vinango padziko yapasi pano vomwe vichapemphera. Nishuwadi kuti wanthu ise tichalingana na nyama pa vinthu vizinji. Mwakulinganiza, nyama zichadekana chakudya, mphepo yopumira, komasoti madzi. Nchibodzibodzimbo ise wanthu. Molingana na nyama, isembo tichabadwa, tichakhala na moyo ndipo pamapeto pake tichafa. (Mlaliki 3:19) Koma mwakusiyana na nyama, wanthu achapemphera. Ndawa chani viri teno?

Panango n’dawiro wachigwato ni wakuti tichadekana kupemphera. Wanthu azinji achaona kuti pemphero ni njira yoyankhulira na munthu panango chinthu chinango chauzimu chomwe achachiwona kuti ni chapadzulu maninge, chochena komasoti chosapera. Baibolo ichawonesa kuti tidalengewa na moyo wofuna kupemphera. (Mlaliki 3:11) Pa nthawe inango Yesu Khrisitu adati: “Wodala ni wanthu womwe achazindikira vosowa vawo va uzimu.”—Mateyu 5:3.

Wanthu achamanga nyumba zopemphereramo zizinji ndipo achamala nthawe zizinji akupemphera. Vimwevi vikuwoneseratu kuti wanthu alidi na “vosowa vauzimu.” Anango achaona kuti wokha angakwanise kugumana vosowa vawo vauzimu panango munthu munango angawapase vimwevo. Koma wanthu angatipase lini vosowa vathu vauzimu. Ise wanthu tina mphanvu zing’onong’ono, umoyo wathu ni ufupi ndipo tingadziwelini vose va ntsogolo. Pakudekana munango wanzeru ndiposoti wamphanvu maninge, yemwe moyo wake ni utali maninge kuti ambatipasa vomwe tichadekana. Vosowa vauzimu ni vomwe vichatichitisa kuti timbafune kupemphera. Koma ko vosowa vauzimu vimwevi nchani?

Ganizirani mpfundo iyi: Ko muchafunisisa kuti munthu munango amabakutsogolereni, kukupasani nzeru panango kukuthandizani kuguma midawiro ya mibvunzo yomwe munthu angakwaniselini kuyadawira? Ko nthawe inango mungadekana munthu kuti akulimbikiseni ndawa ya bvuto yomwe mwenze nayo yakufedwa? Panango mumbafagafaga munango kuti akutsogolereni pa kusalula vinthu mwanzeru pa nkhani inango yomwe idakushupisani maganizo maninge? Panango kuti nthawe inango mudafunisisa kuti mukhululukiriwe chimo inango yomwe idakushupisani maninge maganizo?

Baibolo ichatsimikizira kuti, vose mwevi ni vifukwa vabwino vopempherera. Baibolo ni bukhu yothandiza maninge pa nkhani ya pemphero, ndipo inamapemphero yomwe amuna na akazi azinji wokhulupirika adapemphera. Wanthu mwawo adapemphera pakuda kulimbikisiwa, kutsogolerewa komasoti kugumana midawiro ya mibvunzo yoshupa maninge.—Masalimo 23:3; 71:21; Danieli 9:4, 5, 19; Habakuku 1:3.

Olo kuti mapemphero mwayo yachakhala yosiyana meninge, wanthu womwe adapemphera mapemphero mwaya wenze wolingana pa chinthu chibodzi. Iwo ambadziwa kuti pemphero idawiriwe. Wose ambadziwa kuti achadekana kupemphera kwa mbani. Koma wanthu azinji ntsiku zino achadziwalini mpfundo mweyi panango soti achainyalanyaza.