“Mpakana pano tingabveranelini tikambaphatisa basa dzina ya Mulungu. Ndipo peno nteno, dzina ya Mulungu ingakhale mbani?”—Professor David Cunningham, Theological Studies.

Mulungu adati: ‘Ine ndine Yahova. Dzina yangu ni mweyi.’ (Yesaya 42:8) Yahova ni dzina yochokera mu chiheberi ndipo ichatanthauza kuti “Iye achitisa kukhala.” Onani Baibolo la Dziko Latsopano, Zakumapeto 1.

Yahova ankufuna kuti timbaphatise basa dzina yake. Baibolo ichati: ‘Chemerani pa dzina yake. Dziwisani makhaindi ya wanthu vochita vake. Nenani kuti dzina yake ni yokwezeka.’—Yesaya 12:4.

Yesu adaphatisa basa dzina ya Mulungu. Iye adapemphera kwa Mulungu kuti: ‘Ine nachitisa kuti iwo [wopfunzira wa Yesu] adziwe dzina yanu ndipo nidzapitirize kuwadziwisa dzina mweyi.’ Ndawa chani Yesu adadziwisa wopfunzira wake dzina ya Mulungu? Iye adapitiriza kunena kuti: ‘ Kuti chikondi chomwe mudanikonda nacho chikhale mwa iwo, inembo nikhale wobverana na iwo.’—Yohane 17:26.

“Katswiri munango wa chipembedzo, dzina yake Walter Lowrie, adati: “Munthu yemwe achaganiza kuti Mulungu ni mphanvu chabe ndipo adziwalini dzina yake, ndiye kuti achadziwalini Mulungu, ndipo munthu watene uyu angamukondelini Mulungu.”

Munthu munango dzina yake Victor, Ambayenda kutchetchi sondo iliyose koma ambadziwalini kuti Mulungu ana makhalidwe yaponi. Iye adati: “Patsogolo pake nidapfunzira kuti dzina ya Mulungu ni Yahova ndipo kamwaka kenze koyamba kuti nimudziwe. Venze ninge nagumana koyamba na munthu yemwe nimbandobva vizinji va iye. Nidayamba kuwona kuti Mulungu ni chaiye ndipo nidayamba kukhala naye pa ushamwali.”

Yahova nayembo, achada kukhala pa ushamwali na wanthu womwe achaphatisira basa dzina yake. Mulungu achapolomisa wanthu womwe ‘achaganizira va dzina yake’ kuti: ‘Nidzawachitire chifundo ninge momwe munthu achachitira chifundo mwana wake yemwe achamutumukira.’(Malaki 3:16, 17) Mulungu adalisa pomwe wanthu womwe achemera pa dzina yake. Baibolo ichati: ‘Aliyese yemwe achemera pa dzina ya Yahova adzapulumuke.’—Aroma 10:13.