NKHANI YA PAKHAVA | BODZA YAKUTI MULUNGU NI WANKHANZA
Bodza yonena kuti Mulungu ni wankhanza
VOMWE AZINJI ACHAKHULUPIRIRA
BUKHU inango idanena kuti: ‘Munthu wakuchimwa akafa, nthawe mweyo mzimu wake uponyewa ku moto komwe abonera mpaka kalekale.’ (Catechism of the Catholic Church) Atsogoleri anango wa vipembedzo anena kuti Mulungu awona kuti wanthu wose womwe ashokewa ku moto ni wosafunika
VOMWE BAIBOLO ICHANENA
Baibolo inena kuti: ‘moyo yemwe ankuchimwa ndiye yemwe adzafe.’ (Ezekieli 18:4) Ndipo idanena pomwe kuti: ‘Wakufa adziwalini chilichose.’ (Mlaliki 9:5) Peno moyo uchafa ndipo uchadziwalini chilichose, vingakwanisike tani kuti wakufa ambadzudziwe kumoto achimbabva kuwawa mpakana kalekale?
Shuwadi kuti Baibolo ilewa va ‘moto uzinji na sulufule.’ Koma Baibolo itithandiza pomwe kubvesa mawu mwaya. Ndawa inena kuti: ‘Moto uzinji moyu unkuyimira impfa yachiwiri.’ Ndipo mwapa vimwevi vikuthandawuza kuti moto uzinji moyu ni moto lini chaiye. Mawu yakuti ‘kudzudzika mpakana kalekale ku moto uzinji kunkuthandauza ‘impfa yachiwiri yomwe palibe chidikhiro chakuti munthu adzamukisiwe pomwe.’ (Yobu 14:13), Baibolo yakuchena—yosashupa kulewenga.
UBWINO WA KUDZIWA VIMWEVI
Nkhanza zitichitisalini kukonda Mulungu zingatichitise kuti timbachite naye mantha. Mayi munango dzina yake Rocío yemwe achakhala ku México adati: “kundoyambira nili mwana nidapfunzisiwa kuti wanthu achawotchewa ku moto. Ningachita mantha maninge ndipo ningawona kuti Mulungu ni wabwinolini olo pang’ono, ningaona soti kuti ni waukali komasoti woshupa”
Koma Rocío padapfunzira Baibolo vakuti Mulungu awotchalini wanthu ku moto komasoti achaweruza mwachirungamo adachinjiratu momwe angamuwonera Mulungu. Iye adati: “Nidayamba kuwona kuti namasuka manje na kuwona kuti Mulungu atifunira vabwino, achatikonda ndipo tingamukonde. Iye ali ninge baba yemwe waphata djanja ya mwana wake ndawa yakuti achamukonda.” —Yesaya 41:13.
Wanthu azinji akakamizika kukonda Mulungu ndawa yogopa kuti adzashokewe kumoto. Koma Mulungu afunalini kuti timbamutumikire ndawa ya mantha, Yesu adati: ‘umbakonde Yahova Mulungu wako.’ (Maliko 12:29, 30) Komasoti kudziwa kuti Mulungu achachita vinthu mwachilungamo ntsiku zino,kutithandiza kukhala na chikhulupiriro chakuti kutsogolouku adzaweruze soti mwachilungamo. Mwevi nivobverana na vomwe Elihu shamwali wake wa Yobu adanena. Iye adati: ‘Mulungu chaiye angachitelini vinthu voipa ne pang’ono ndipo wamphanvu zose angachitelini vinthu vilibe chilungamo olo pang’ono.’—Yobu 34:10.
