Wanthu anango vichawashupa kukonda Mulungu ndawa achawona kuti niwosabveseseka, wankhanza komasoti achabvalini ntsisi na mabvuto ya wanthu. Onani vomwe anango adalewa:

• “Nimbapemphera kwa Mulungu kuti anithandize, koma pa nthawe ibodzibodzi mweyo nimbawona kuti iye alibe nayo basa mabvuto ya wanthu ndipo angabvelini mapemphero yangu. Nimbawona kuti Mulungu ni chaiyelini.”—Marco, waku Itália.

• “Nimbafuna kutumikira Mulungu koma nimbaona kuti aniganizirakolini inepano. Nimbaona kuti iye ni Mulungu wankhanza yemwe achandofuna kutilanga basi. Nimbaganiza kuti alibe chikondi.”—Rosa, waku Guatemala.

• “Penenze mwana nimbakhulupirira kuti Mulungu achafagafaga vophonya vathu kuti atilange. Ndipo patsogolo pake nidayamba kumuwona kuti ni wapadzulu maninge kuti ningakhale nayelini paushamwali. Nimbawona kuti Mulungu ali ninge pulezidenti yemwe achangenerera nkhani za wanthu womwe achawatonga koma alibe nawo chidwi chaicho.”—Raymonde, waku Canadá.

Ko munkuganiza tani? Ko Mulungu alibe chikondi? Akhrisitu wakhala ankudzibvunza nbvunzo muyu kwa magole yazinji. Ndipo m’magole ya m’ma 500 mpakana m’ma 1500, wanthu azinji wa vipembedzo womwe ambati ni Akhrisitu ambapempheralini kwa Mulungu wa Mphanvu zose ndawa angachita naye mantha maninge. Wonemba mbiri munango dzina yake Will Durant adanemba kuti: “Vingakwanisike tani kuti munthu wochimwa alimbe moyo kupemphera kwa Mulungu yemwe ni wopasa mantha komasoti ali kutali na wanthu?”

Ko nchani chidachitisa kuti wanthu ambawone kuti Mulungu “ni wopasa mantha komasoti ali kutali na wanthu”? Ko Baibolo ichapfunzisa chani vokhudza Mulungu? Ndipo kupfunzira chonadi cholewa va Mulungu kungakuthandizeni kuti mumbamukonde maninge?