NKHANI YA PAKHAVA | MABODZA YOMWE YACHAKANGISA WANTHU KUTI AMBAKONDE MULUNGU
Mabodza yomwe yachakangisa wanthu kuti amudziwe Mulungu
VOMWE WANTHU ACHAKHULUPIRIRA
Matchetchi ya chikhrisitu “vikuluvikulu vitatu, vomwe ni katolika, Eastern Orthodoxy, na chipulotesitanti, vichakhulupirira kuti pali milungu yatatu kuchokera mwa Mulungu m’bodzi. Pana Mulungu Ababa, Mulungu Mwana na Mulungu Mzimu wakuchena. Milungu itatu mweyi ichakonza Mulungu m’bodzi.”—The New Encyclopædia Britannica.
VOMWE BAIBOLO ICHANENA.
Yesu, mwana wa Mulungu, alibe kunenako kuti ni wolingana na Ababa wake. Koma iye adanena kuti: ‘Ninkuyenda ndipo nidzabwereresoti kwa imwepo. Peno mumbanikonda, mudakakondwera kuti nikuyenda kwa Ababa wangu, ndawa Ababa ni akulu kuposha inepano.’ (Yohane 14:28) Adauza soti m’bodzi wa wopfunzira wake kuti: ‘Kuti inepano ninkukwera kwa Ababa wangu na Ababa wanu, kwa Mulungu wangu na Mulungu wanu.’—Yohane 20:17.
N’zimu wakuchena ni Mulungu lini. Akhrisitu wakuyambirira ‘adadzodzewa na mzimu uchena,’ ndipo Yahova adati: ‘Nidzaperekeko mbali ya mzimu wangu pa wanthu wosiyanasiyana.’ (Machitidwe 2:1-4, 17) Ndipo mwapa mzimu uchena ni Milungu lini koma ni mphanvu yomwe Mulungu achaiphatisa basa.
NDAWA YAKE KUDZIWA VIMWEVI NIKODEKANA
Akatswiri wa chikatolika, womwe ni Karl Rahner na Herbert Vorgrimler, adanena kuti: “Munthu angabveselini chikhulupiriro cha utatu pokhapokha ngati chaululiwa kwa iye, ndipo olo kuti chaululiwa kwa iye angachibveselini bwinobwino.” Ko ni vokwanisika kumukonda munthu yemwe muchamudziwalini ndipo mungakwaniselini kumubvesesa? Chipfunziso cha Utatu chichakangisa wanthu kumudziwa komasoti kumukonda Mulungu.
Marco, yemwe tamutomola mu nkhani yoyambirira ire, ambawona kuti chipfunziso cha Utatu chimbamukangisa kumudziwa bwino Mulungu. Iye adati: “Nimbawona kuti Mulungu achadalini kuti nimudziwe kuti ni wotani, ndipo vimwevi vidachitisa kuti nimbamuwona kuti iye achakhudziwalini na mabvuto yathu, ni wosabveseseka komasoti ningakhalelini naye pa ushamwali.” Koma iye achadzibisalini ndipo achada kuti timudziwe. Yesu adati: ‘Isepano tichapempherera chomwe tichachidziwa.’—Yohane 4:22.
Marco adanena kuti: “Panidapfunzira kuti Mulungu ni Utatu lini vidanithandiza kuti nikhale naye pa ushamwali.” Ngati tichawona Yahova kukhala chaiye, vingatithandize kuti timbamukonde. Baibolo ichanena kuti: ‘Munthu alibe chikondi achamudziwalini Mulungu,’ ‘ndawa Mulungu ni chikondi.’—1 Yohane 4:8.
