Nidabadwira mu thaundi ya Rome mu dera yomwe kumbakhala wanthu azinji wosauka. Nidakulira m’mathaundi yosiyanasiyana ya mu thaundi mwiyo ndipo ningakhala mobonera maninge. Amayi wangu chayiwoyiwo ningawadziwalini ndipo ningabveranalini maninge na ababa wangu. Kudera yomwe ningakhala kungachitika vinthu vachiwawa vizinji ndipo nidandovidjaira.

Panimbakwanisa magole 10 ndishi nayamba kale kuba,ndipo panidakwanisa magole 12 nidachoka pamuyi. Nimbandokhalira kumangiwa moti ababa nthawe zizinji ambabwera kudzanitenga nkuyenda nane kumuyi. Nenze wachiwawa komasoti nimbakalipira aliyese moti nimbandokhalira kukalipizana na wanthu. Panidafikisa magole 14, nidachokeratu pamuyi ndipo nilibe kubwerera pomwe. Nimbakhala m’misewu ndipo nidayanba kuphatisira basa mankwala yosokoneza msolo. Kazinjikazinji nimbagona m’makaro ya wanthu ndipo machibesebese nimbachokamo, nikateno nkufafagafaga madzi yosamba m’maso.

Nidadjayira kuba ndipo nimbaba chilichose peno ni machola ya wanthu panango kutchola nyumba usiku. Wanthu wose wa mu dera yathu anganidziwa kuti ndine mbava. Pakalibe kupita nthawe nidangena mu gulu inango ya vigananga ndipo mwevi vidachitisa kuti nipfunzire pomwe kuba m’mabanko. Ndawa yakuti ningawoneka wopasa mantha komasoti nenze wankhanza, wanthu wose m’gulu mweyi anganilemekeza. Palipose ningakhala na mpfuti ndipo usiku ningayiyikha pasi pa ntsago. Nidadjayira kuchita makhalidwe ya chiwawa, kuphatisira basa mankwala yosokoneza msolo, umbava, kutukwana komasoti kuchita vigololo. Mapolisi yambandokhalira kunifagafaga ndipo nimbamangiwa kawirikawiri.

Nthawe inango panidabula mu djeri nidayenda kukawonana na ang’ono wawo wa amayi wangu, nimbadziwa lini kuyi iwo komasoti wana wawo awiri enze wa mboni za Yahova. Ntsiku inango adanikumbira kuti niyende nawo ku misonkhano yawo ku Nyumba ya Ufumu. Nidayendadi na chakulinga chakuti nindokawona kuti kuchachitika chani. Panidafika nidangingimira kukhala pafupi na msuwo na chakulinga chakuti nimbawone aliyese yemwe ankungena na kubula uku mpfuti yangu iri pafupi.

Vomwe vidachitika pamsonkhano moyu vidachinja moyo wangu. Nimbawona ninge nili dziko inango. Wanthu wose enze wokondwa na waushamwali ndipo ambanipasa moni uku ankusekerera. Wanthu mwawa ambawoneka pomwe kuti enze wokoma moyo na wachikondi chilibe chinyengo. Vimwevi venze vachilendo maninge kwa ine!

Nidayamba kupfunzira Baibolo na Mboni za Yahova. Vomwe ningapfunzira vidanichitisa kuwona kuti ningadekana kuchinja moyo wangu. Mwakuliganiza nidazindikira kuti ningadekana kuleka kucheza na wanthu wa mu gulu ya vigananga. Ndipo nidatewedza malangizo ya palemba ya Miyambo 13:20 yakuti: ‘Munthu wofamba na wanthu wanzeru adzakhale wanzeru, koma wochita vinthu pabodzi na wanthu wopusa adzagumane mabvuto.’ Kuchita vimwevi yenze nkhani ikulu koma Yahova adanithandiza ndipo nidalekadi kucheza na wanthu mwawa.

Penze soti vinthu vizinji vomwe ningadekana kuchinja. Mwakulinganiza, nidayesesa mpaka kusiya kupepa komasoti kuphatisira basa mankhwala yokoneza msolo. Nidagera tsitsi yangu yomwe yenze itali, nidasiya soti kutukwana, kuvala mphete ndipo nidayamba kudziletsa kuchita vinthu voipa.

Mwachibadwa ningakondalini kulewenga komasoti kupfunzira, ndipo mwapo vinganishupa maninge kulewenga Baibolo komasoti kubvesa vomwe ninkulewenga. Koma nidachita khama ndipo nidawona kuti vimwevi vinithandize kuti niyambe kukonda Yahova. Nidawona soti kuti vomwe ningalewenga vidayamba kuchinja moyo wangu mwakuti nidayamba kuona kudekana kochita vinthu vabwino. Nthawe zizinji nimbakhala na maganizo yakuti panango Yahova anganikhulukirelini voipa vomwe nidachita. Koma ningaganizira nkhani ya npfumu Davide, yemwe adachita machita machimo yakuluyakulu koma pomwe iye adalapa Yahova adamukhululukira. Vimwevi vidanilimbisa ntima ndiponidawona kuti inepanombo Yahova angakwanise kunikhululukira.—2 Samueli 11:1–12:13.

Chinthu chinango chomwe chidanishupa maninge kuchita, ni kulalikira muyi na muyi pabodzi na wa Mboni anzangu. (Mateyu 28:19, 20) Nimbaona kuti panango ningambagumane soti na wanthu womwe kumbuyo uku ningawachitira vinthu voyipa. Nkupita kwa nthawe nidaleka kuchita mantha ndipo nimbalalikira mosashupa.nimbakondwa maninge kuthandiza wanthu kupfunzira vokhudza ababa wathu wa kudzulu, yemwe ni wokhululuka.

Nidawona kuti kupfunzira va Yahova kwapulumusa moyo wangu. Anzangu azinji womwe nenze nawo pakuyamba ali mu djeri ndipo anango adamwalira, koma inepano ndine wokondwa komasoti ninachidikhiro cha moyo wosapera napfunzira kukhala wodzichepesa, wobvera komasoti wodziletsa. Vimwevi vathandiza kuti nimbakhale bwino na wanthu. Nidalowola nkazi wokhuza dzina yake Carmen ndipo banja yathu ni yokondwa maninge inepano na nkazi wangu tichakondwa maninge kuthandiza wanthu kupfunzira Baibolo.

Manjeuno nichayenda ku banko osati kukaba koma kukaphata basa!