Penenze mwana, banja yathu ingakhala kufupi na thaundi ya Leipzig, Alemanha Oriental. Thaundi mwiyi ili kufupi na malire ya dziko ya Czech Polandia. Nenze na magole 6 nidafulukira ku Brasil komwe ababa wangu angaphata basa ndipo patsogolo pake tidafulukira ku Equador.

Panidakwanisa magole 14 adanitumiza ku Alemanha ku shikola komwe nimbachita kugonera muko. Pakuti azibereki wangu enze kutali, ningasalula nekha vochita ndipo vingachitisa kuti niyambe kudzithemba. Nimbaganizilakolini momwe vochita vangu vingakhudzira anango, nimbandofuna kuti vinifambire.

Ninamagole 17 azibereki wangu adabwererasoti ku Alemanha.koma ndawa yakuti nenze nidajayira kusalula nekha vimbanichupa kuwabvera, patsogolo pake panidafika magole 18 nidafuluka pamuyi.

Olo kuti venze teno vimbanifambiralini ndipo nimbawona kuti moyo wangu ulibe na phindu. Nidayamba kuchita vinthu pabodzi na magulu yosiyasiyana ya wanthu koma olo venze teno viribe kunichitisa kukhala wokondwa pamwapo nidaganiza kuti nimbayende madziko yosiyanasiyana kuti nimbawone vachilengedwe pakuti vinthu vachilengedwe vinkumala nimbawona kuti nifambe malo yosiyanasiyana n’kumbawona vinthu vachilengedwe, vikanati vamala.

Nidagula mota ndipo nidafuluka ku Alemanha, nkuyenda ku África. Koma nthawe pang’ono mota wangu udadzongeka nidaganiza vobwerera pomwe ku Europa kuti nikayikonzese.koma pomwe nidafika pa gombe inango ku Portugal, nidaganiza vakuti nileke kufamba na mota n’kupakira mwadiya mwakuti mota uyo nidausiya kumuko.

Nidaganiza vakuti niyende pabodzi na gulu ya alumbwana yomwe imbakonzekera kuyambuka Nyanja ya Oceano Atlântico. Pa gulu mwapa penze ntsikana munango dzina yake Laurie, ndipo kupita kwa nthawe tidalowolana. Pakuyamba tidayenda ku ntsuwa ya Caribbean. Tidakhala nthawe ing’onong’ono ku Porto Rico ndipo patsogolo pake tidabwerera soti ku Europa timbafuna tichigumana mwadiya wakuti angakwanisike kumuchinja kukhala nyumba yathu. Tidawufagafaga kwa minyezi yatatu, koma tikalibe tawugumana, masocha ya boma ya ku Alemanha adaniphata nkuninemba basa ya usocha.

Nenze mu gulu ya masocha yapamadzi ndipo nidaphata basa mweyi kwa minyezi 15. Pa nthawe mweyi inepano na Laurie tidalowolana ndipo tidakonza vakuti tipitirize kuyenda ku madziko yosiyanasiyana. Pa nthawe yomwe nenze msocha, nidagula mwadiya uku tinkupitiriza kuyenda mu madziko yosiyanasiyana n’kumbawona vachilengedwe. Panidasiya basa ya usocha, nidapitiriza kukonza mwadiya. Mwadiya muyo ukanati wamala nidagumana na Mboni za Yahova ndipo tidayamba kupfunzira Baibolo.

Pakuyamba nimbawona ninge kuti nikufunikiralini kuchinja vizinji pa moyo wangu. Ningaganiza vimwevi ndawa nimbawona kuti nkazi yemwe nenze naye tidalowolana mwalamulo nakuti nenze nidasiya kale kupepa. (Aefeso 5:5) Nimbawona pomwe kuti vomwe tingachita kumbafamba m’madziko yosiyanasiyana, venze vilibe bvuto ndawa vimbathandiza kuti timbawone chilengedwe chokhuza cha Mulungu.

Koma kunena shuwa nimbafunika kuchinja vinthu vizinji pa moyo wangu makamaka khalidwe yanenze nayo. Pakuti nenze wodzikonda na wosafuna kuwuziwa vochita, nimbandoganizira maninge va buya yangu na vomwe nakwanisa kuchita. Nenze wa kubva vangu vokha.

Ntsiku inango nidawerenga va ulaliki wa Yesu] wa paphiri, womwe ni wobvekera maninge. (Mateyu, chaputala 5-7) Pakuyamba ningabvesalini vomwe Yesu anganena vokhudza kukondwa. Mwakulinganiza, adalewa kuti wanthu wanjala komasoti wanyota akhala wokondwa. (Mateyu 5:6) Ningadabwa kuti vingachitike tani munthu wanyota komasoti wanjala kukhala wokondwa? Nidapitiriza kupfunzira ndipo, nidazindikira kuti tose tina njala komasoti nyota yauzimu. Koma kuti tigumane vinthu vodekana vauzimu mwevi,timbadekana kuzindikira modzichepesa kuti tikufunikira vimwevi pa moyo wathu. Mwevi ni vobverana na vomwe Yesu adalewa kuti: ‘Odala ni wanthu womwe achazindikira vosowa vawo vawuzimu.’—Mateyu 5:3.

Patidapfunzira Baibolo ku Alemanha tidafulukira ku França ndipo patsogolo pake tidafulukira soti ku Itália. Kulikose komwe tingayenda timbagumana na wa Mboni. Chinthu chomwe chingachitisa chidwi maninge chenze chakuti wanthu mwawa enze obverana komasoti angakondana maninge. Nidazindikira kuti wa Mboni za Yahova ali ninge banja ibodzi ndipo achagumanika padziko yose yapasi. (Yohane 13:34, 35) Kuyenda kwa nthawe, inepano na mkazi wangu tidabatiziwa n’kukhala wa Mboni za Yahova.

Patidabatizika venze vikalipo vinthu vinango vomwe tingadekana kuchinja pa moyo wanthu. Inepano na nkazi wangu tidaganiza voyenda ku Estados Unidos kupitira mu Nyanja ya Atlântico, pa ulendo moyu tili pakati pa madzi tidayamba kuganizira maninge va Mulengi, yemwe niwodabwisa maninge. Nidazindikira kuti wanthu ise ndiselini wapadzulu maninge pakulinganiza na Mulengi. Ndawa yakuti pa ulendo moyu nenze na nthawe izinji nidayamba kulewenga Baibolo. Nkhani yomwe idanikondwesa maninge yenze yolewa vomwe Yesu adachita ali padziko yapasi. Yesu wenze munthu wangwiro ndipo ambachita vinthu vomwe wanthu ambadabwa navo maninge, olo nteno ambakhala na nthawe yothandiza wanthu anango. Ndipo ambaphatisira basa nthawe yake pakuchita vofuna va Ababa wake wakudzulu.

Chitsanzo cha Yesu chidanithandiza kudziwa kuti ningadekana kuphatisira basa nthawe yangu kuwuza anango va Ufumu wa Mulungu m’malo mwakumbandochita vofuna vangu. (Mateyu 6:33) Patidafika ku Estados Unidos, tidaganiza zokhaliratu kuti tikhale na nthawe yakukwana yakutumikira Yahova.

Pa nthawe yomwe nenze munthu wosafuna kuwuziwa vochita, nthawe zinango nimbakwanisalini kudziwa vodekana kuchita. Manje mawu ya Mulungu yanithandiza kusalula vinthu mwanzeru. (Yesaya 48:17, 18) Manjeuno nikuwona kuti moyo wangu unaphindu ndawa ninkutumikira Mulungu ndipo nichathandiza anango kudziwa va iye.

Kutewedza mpfundo za m’Baibolo kwatithandiza kukhala na banja yolimba komasoti yokondana. Tinamwana nkazi wokhuza maninge, ndipo iyembo akonda Yahova.

Tigumanambo na mabvuto pa moyo wathu, olo nteno Yahova achatithandiza ndipo tiwona kuti tidzalekelini kumukhulupirira.—Miyambo 3:5, 6.