Ninge tawonera mu nkhani yoyambirira yire, basa ikulu yomwe Yesu angaiphata yenze ‘yolalikira na kulengeza ntontholo wabwino wa Ufumu wa Mulungu.’ (Luka 8:1) Iye adaphata basa mweyi modzipereka maninge ndipo ambafamba Misenga yatali yatali m’madera yose ya dziko ya Isiraeli. Adachita vose mwevi na chakulinga chakuda kupfunzisa wanthu va Ufumu wa Mulungu. Vomwe Yesu adachita pa utumiki wake vidanembewa Mu ntontholo Wabwino, ndipo m’mabukhu mwaya nkhani yokhudza va Ufumu wa Mulungu yafotokozewa kuposha ka 100, pa maulendo 100 mwaya, yazinji ni mawu ya Yesu. Koma vingakwanisike pomwe kuti Yesu adafokoza pomwe va Ufumu kazinji kuposha pamwapa!—Yohane 21:25.

Ndawa chani Yesu ambaona kuti Ufumu wa Mulungu ni wodekana maninge? Ndawa ambadziwa kuti Mulungu adasankhula iye kuti akhale Mpfumu ya Ufumu moyu. (Yesaya 9:6; Luka 22:28-30) Koma sikuti maganizo ya Yesu yenze pakuda kutonga panango kubvekera. (Mateyu 11:29; Maliko 10:17, 18) Pambalengeza va Ufumu, sikuti ambondoganizira phindu yomwe iye angaigumane. a Koma ambaganizira maninge momwe Ufumu udzathandizire kuti dzina ya Ababa wake wakudzulu ichenesewe komasoti vomwe Ufumu udzachite kwa ateweri wake.

Yesu achakonda maninge Ababa wake wakudzulu. (Miyambo 8:30; Yohane 14:31) Achawakonda ndawa Ababa wake anamakhalidwe yabwino maninge ninge chikondi, chifundo komasoti chilungamo. (Deuteronomo 32:4; Yesaya 49:15; 1 Yohane 4:8) Ndipo mwapa Yesu achakondwalini akambabva mabodza yomwe wanthu achanena yonena va Ababa wake. Yanango mwa mabodza mwaya ni yakuti, Mulungu alibe navo basa va mabvuto ya wanthu komasoti iye achada kuti timbabonere. Yesu ‘ambalalikira ntontholo wa bwino wa Ufumu’ mofunitsisa ndawa ambadziwa kuti Ufumu udzachenese dzina ya Ababa wake. (Mateyu 4:23; 6:9, 10) Ko udzachite tani vimwevi?

Yahova adzachinje vinthu pa dziko yino yapasi pakuphatisa basa Ufumu. Pa nkhani mweyi, Baibolo ichati: ‘Iye adzapukute misozi yose’ m’maso mwa wanthu wokhulupirika. Mulungu adzachose vose vomwe vichachitisa kuti wanthu ambalira ndipo ‘impfa idzakhalepolinisoti. Padzakhalelinisoti kulira, panango kubuula, olo kuwawiwa.’ (Chivumbulutso 21:3, 4) Mulungu adzaphatise basa Ufumu wake kuchosa mabvuto yose yomwe wanthu ankugumana nayo

Ndiye mpake kuti Yesu angapfunzisa wanthu va Ufumu wa Mulungu mwakhama. Ambadziwa kuti Ufumu udzaonese kuti Ababa wake ni wamphanvu komasoti wachifundo. b (Yohane 5:11) Yesu ambadziwa soti kuti Ufumu udzathandizesoti wanthu wokhulupirika.

Yesu akalibe kubwera padziko yapasi, adakhala nthawe itali na Ababa wake kudzulu. Mulungu adaphatisa basa mwana wake muyu pakulenga vinthu vose va kudzulu na va padziko ya pasi. (Akolose 1:15, 16) Koma pa vose mwevi, vomwe Yesu ambakondwa navo maninge “venze vokhudza wana wa wanthu.”—Miyambo 8:31.

Olosoti pomwe ambachita utumiki wake padziko yapasi, Yesu ambakonda maninge wanthu. Padandoti wayamba utumiki wake adanena mobveka bwino kuti adabwera padziko yapasi ‘kudzauza wanthu wosauka ntontholo wabwino.’ (Luka 4:18) Koma sikuti Yesu ambandonena kuti adabwera kudzauza wanthu ntonthilo wabwino. Nthawe zizinji ambachita vinthu vowonesa kuti achakonda wanthu. Mwakulinganiza, pa nthawe yinango gulu ya wanthu idagumana pabodzi kuti abvesere ulaliki wake, “adawabvera ntsisi, na kuwapolesa wanthu womwe wenze wodwala.” (Mateyu 14:14) Pa nthawe yinango munthu munango wakhate, yemwe ambakhulupirira kuti Yesu angakwanise kupolesa akafuna, adamukumbira kuti amupolese. Yesu adabva chifundo ndipo adawuza munthu muyo kuti: “Ninkufuna. Khala wochena.” (Luka 5:12, 13) Komasoti Yesu padawona kuti Mariya ankulira maliro ya m’bale wake Lazaro, “adadzuma na kushupika mumtima,” ‘adabva ntsisi’ ndipo patsogolo pake adachosa misozi.” (Yohane 11:32-36) Ndiye adachita vinthu vakuti wanthu ambaviyembekezeralini. Iye adamukisa Lazaro olo kuti penze padapita ntsiku 4 ali m’manda.—Yohane 11:38-44.

Koma Yesu ambadziwa kuti vabwino vomwe ambachitira wanthu ni vakanthawe chabe. Ambadziwa kuti pakapita nthawe, wanthu womwe adawapolesa wale angakwanise kudwala pomwe komasoti womwe adawamukisa angakwanise kufasoti. Ndawa ya vimwevi angandopolesalini panango kumukisa wanthu, koma ambalalikirasoti mwa khama “ntontholo wabwino wa Ufumu.” (Mateyu 9:35) Vodabwisa vomwe Yesu adachita, venze chitsanzo ching’ono chabe cha vomwe Ufumu wa Mulungu udzachite padziko yose. Wonani mapolomisi ya m’Baibolo yowonesa momwe vinthu vidzakhalire pa nthawe mwiyo.

•  Kudzakhale kulibe matenda.

  ‘Pa nthawe mweyo maso ya wanthu wosaona, yadzafunguliwe ndipo makutu ya wanthu wosabva yadzayambe kubva. Pa nthawe mweyo munthu wopunduka adzakwire Phiri ninge mwachachitira bawara mwamuna. Lilimi ya munthu yemwe achayankhulalini idzakuwe mokondwa.’ Komasoti palibe munthu yemwe adzakhale mu dziko mwiyo adzanene kuti: ‘Ninkudwala.’’—Yesaya 33:24; 35:5, 6.

• Wanthu ambadzafelini pomwe.

  ‘Wolungama adzatambire dziko yapasi, ndipo adzakhale mumo mpakana kalekale.’—Salimo 37:29.

  ‘Iye adzameze impfa mpaka kalekale, ndipo Yahova Ambuya Nkululetu adzapukuse misozi pa nkhope zose za wanthu.’—Yesaya 25:8.

• Wanthu womwe adamwalira adzamukisiwe

  ‘Wose ali m’manda yachikumbuso adzabve mawu yake ndipo adzabule.’—Yohane 5:28, 29.

  ‘Kudzakhale kumuka kwa wolungama na wosalungama kubodzi.’—Machitidwe 24:15.

• Aliyese adzakhale na nyumba komasoti na basa yabwino

  ‘Iwo adzamange nyumba na kukhalamo; Adzabzale miti ya uva na kudya vipaso vake. Adzamangelini kuti anango akhalemo, adzabzalelini, anango nkudya. . . . ndipo wosankhuliwa wangu adzagumane phindu ya basa ya manja yawo.’—Yesaya 65:21, 22.

• Kudzakhlelini soti nkhondo

  ‘Akulambiza nkhondo mpakana kumalekedzero ya dziko ya apasi.’—Salimo 46:9.

  ‘Khaindi ya wanthu idzanyamulelini pomwe chibemba kuti ikamenyane na khaindi inzake, ndipo wanthu adzapfunzirelini pomwe nkhondo.’—Yesaya 2:4.

• Kudzakhale chakudya chizinji.

  ‘Dziko yapasi idzapereke vipaso vake. Mulungu, shuwadi Mulungu wathu adzatidalise.’—Salimo 67:6.

  ‘Padziko yapasi padzakhale tirigu uzinji. Padzulu pa mapiri padzakhale tirigu uzinji maninge.’—Salimo 72:16.

• Umphawi udzamale.

  ‘Pakuti wa umphawi adzayebwewelini nthawe zose.’—Salimo 9:18.

  ‘Pakuti adzapulumuse wosauka yemwe ankukuwa kukumbira thandizo. Komasoti woboneresewa aliyese alibe womuthandiza. Adzabvere ntsisi munthu wonyozeka na wosauka, ndipo adzapulumuse moyo wa wanthu wosauka.’—Salimo 72:12, 13.

Mukaganizira vinthu vabwino vose vimwevi vomwe Ufumu wa Mulungu udzachite, ko munkuona ndawa yake Yesu ambaona kuti Ufumu wa Mulungu ni wodekana maninge? Iye pewenze pa dziko yapasi wenze na shungu wa kuuza aliyese va Ufumu wa Mulungu. Ambachita vimwevi ndawa yakudziwa kutu Ufumu muyu udzamalise mabvuto yose padziko.

Ko imwepo muchada kudzakondwa na vinthu vabwino vomwe Ufumu wa Mulungu udzachite? Ko munkufuna kudziwa vizinji va Ufumu? Ndiye mungachitetani kuti mudzakhalepo pa nthawe yomwe Ufumu udzabwerese madaliso yazinji mwaya padziko mweyi? Mu nkhani yati titione patsogolo apa inamidawiro ya mibvunzo mwaya.