Nidabadwira mu thaundi ya Acul, yomwe iri mu dera yamaphiri kum’maulo kwa dziko ya Guatemala. Azibereki wangu enze wa dzinza ya Ixil ndipo dzinza mweyi ni yochokera mu ntundu wa Amaya. Niyankhula chi Espanhol koma nili mwana nimbayankhula chiseweredwe chinango cha kumuyi kwathu. Koma pomwe ningakula ku Guatemala kwenze nkhondo yomenyana wokhawokha ndipo idachitika kwa magole 36. Wanthu azinji wa dzinza yathu adafa pa nkhondo mweyi.

Penenze na magole 4, m’bale wangu yemwe wenze na magole 7, angasenzekesa bomba ndipo mwangozi idaphulika. M’bale wangu ule adafa ndipo inepano nidafa maso. Kuyenda kwa nthawe nidayamba kukhala pa shikola inango ya wana wosawona mu thaundi ya Guatemala. Kumoko ndiko komwe nidapfunzira kulewenga maletra ya wanthu wosawona. Aticha wa pa shikola mweyi anganilambiza kucheza na anzangu komasoti anzangu awo ambafunalini kuti nimbachite nawo vinthu pabodzi. Nimbadziwali kuti ambachitiranyi vimwevi. Gole iliyose ningabvumiziwa kuyenda ku feria kwa minyezi yawiri basi. Ndawa yakuti ningasowa wocheza naye, nimbandofuna kubwerera kumuyi kuti nikawone amayi womwe ambanikonda maninge. Ninamagole 10 yokha amayi wangu adamwalira ndipo nidakwinyirira maninge. Nidashupika maninge maganizo ndawa yakuti nidaluza munthu wodikana maninge pa moyo wangu.

Penenze na magole 11 nidabwerera kwathu komwe ningakhala na m’bale wangu munango. M’bale wangu moyu ambanisamalira bwino koma olo nteno nimbashupika maganizo. Nthawe zizinji nimbandokhalira kulira ndipo nimbapemphera kwa Mulungu kuti nidziwe kuti ndawa chani amayi wangu adamwalira nakuti ndawa chani nili wosawona. Wanthu anango ambaniuza kuti Mulungu ndiye adachitisa kuti nigumane na mabvuto mwaya. Vimwevi vimbanichitisa kuwona kuti Mulungu ni wankhanza maninge. Nimbafuna kudzipha koma nimbasowa mwati nidziphere.

Nimbashupika maninge nikaganizira kuti niwonalini. Komasoti nili mng’ono, nthawe zizinji wanthu anganichitira vinthu voyipa komasoti kuniponderera. Ningawuzalini aliyese vomwe vinganichitikira ivi ndawa ningawona kuti palibe anganithandize. Wanthu ambakondalini kuyankhula nane ndipo inembo nimbayankhulalini na aliyese. Ningadzipatula ndipo ningakhulupiriralini aliyese.

Nthawe inango panidasala pang’ono kukwanisa magole 15, ku shikola kwathu kudabwera banja inango ya Mboni za Yahova. Ticha wathu munango yemwe ambadziwa vanimbagumana navo, adawuza wa Mboni wale kuti adzabwere pomwe kudzacheza nane. Padabwera wa Mboni wale adaniwuza vomwe Baibolo ichanena. Adanipfunzisa kuti wakufa adzamuke komasoti wosawona adzayambe kuwona. (Yesaya 35:5; Yohane 5:28, 29) Vomwe adaniwuza vidanifika pamoyo, koma nilibe kukwanisa kubvunza vizinji ndawa ningakondalini voyankhula. Koma olo nteno, angabwera basi kudzanipfunzisa Baibolo. Banja mweyi ingafamba nsenga woposha 10 kilometro ndipo ambapita m’mapiri kuti adzanipfunzise.

M’bale wangu adaniwuza momwe wanthu mwawa angawonekera. Adaniwuza kuti avala bwino podiya kuti ni wosauka. Koma olo nteno ambaniganizira mwakuti ambanibweresera mphaso. Ningawona kuti ni Akhrisitu chaiwo wokha womwe angachite vimwevi.

Pa kupfunzira Baibolo, ningaphatisa basa mabukhu ya wanthu wosawona. Ningabvesa vomwe ningapfunzira, kundoti penze vinthu vinango vomwe nimbashupika kutsimikizira. Mwakulinganiza, vimbanishupa kubvesa kuti Mulungu aniganizira nakuti pangagumanike wanthu womwe anganithandize kudziwa Mulungu. Nidabvesa ndawa yake Yahova achabvuma kuti voyipa vimbachitike, koma vimbanishupa kutsimikiza kuti Yahova ni Ababa wachikondi. a

Kuti mudziwe ndawa yake Mulungu achabvuma kuti voipa vimbachite, wonani msolo 11 wa bukhu yakuti Vomwe Baibolo ichapfunzisa yofalisiwa na Mboni za Yahova.

Koma kuyenda nthawe, vomwe nimbapfunzira m’Baibolo vidanithandiza kuchinja maganizo. Mwakulinganiza, nidapfunzira kuti Mulungu akondwalini wanthu akambabonera. Kalekale pomwe atumiki wake angadzudziwa, Mulungu adati: ‘Nawona kubonera kwa wanthu wangu . . . nikudziwa bwino vowawa vawo.’ (Ekisodo 3:7) Patsogolo pake nidayamba kuwona kuti Yahova ni Mulungu wabwino maninge ndipo nidaganiza vakuti nimbamutumikire. Nidabatizika mu 1998 nkukhala wa Mboni za Yahova.

Paidamala gole nabatizika, ningachita nawo mapfunziro ya wanthu osaona pafupi na thaundi ya Escuintla. Akulu wa mu mpingu wathu adadziwa kuti ninkushupika kuti nimbayende kukasonkhana na wa Mboni anzangu. Mpingu wapafupi wenze ku maphiri komwe kungachokera banja ile ndipo kumbanitalimphira maninge. Pamwapo akulu adakumbira banja inango yomwe ingakhala ku Escuintla kuti nimbakakhale nawo na cholinga chakuti nimbakagumanike ku misonkhano. Mpakana manjeuno banja mweyi idakanisamalira ninge mwana wawo chaiye.

Dzuwa ingachome nichiti nilewe vabwino vose vomwe wa Mboni anzangu akhala ankunichitira. Vimwevi vanithandiza kutsimikizira kuti wa Mboni za Yahova ni Akhrisitu chaiwo.—Yohone 13:34, 35.

Manjeuno nidzionalini pomwe ninge munthu wachabechabe. Nazindikira kuti pana vinthu vizinji vomwe ningakwanise kuchita. Mwakulinganiza, nimala nthawe yangu ikulu ninkulalikira na kupfunzisa wanthu mpfundo za m’Baibolo. Vimwevi vinithandiza kuti osati nimbandoganiza va mabvuto yangu. Manjeuno ndine nkulu ndipo nthawe zizinji nikamba nkhani za m’Baibolo mu mpingu wathu na mipingu inango. Nikamba pomwe nkhani pa misonkhano yakuluyakulu.

Mu 2010, nidangena mu shikola yopfunzisa utumiki (yomwe manjeuno ichemerewa kuti Shikola ya Akhrisitu Wolalikira va Ufumu) yomwe idachitikira ku El Salvador. Shikola mweyi idanithandiza kuphata bwino basa mu Mpingu. Idanithandiza pomwe kuwona kuti Yahova ni Mulungu wachikondi yemwe angakwanise kupfunzisa aliyese kuti aphate basa yake.

Yesu adati: ‘Kupasa kubweresa chimwemwe chizinji kuposha kutambira.’ (Machitidwe 20:35) Pakuyamba nimbawona ninge vingakwanisikelini kukhala wokondwa, koma manjeuno ndine wokondwa ndawa yakuti nithandizambo anango.