Baibolo ni yapadera maninge ndawa ina malangizo yachokera kwa Mulengi wathu. (2 Timoteyo 3:16) Ntontholo wake ungatithandize maninge. Ndipo ichanena kuti: ‘Mawu ya Mulungu ni yamoyo na yamphanvu.’ (Aheberi 4:12) Baibolo ingatithandize mu njira ziwiri, inampfundo zothandiza pa moyo wathu wa ntsiku na ntsiku komasoti ichatithandiza kudziwa Mulungu wathu na vomwe adatipolomisa.—1 Timoteyo 4:8; Yakobo 4:8.

Ingakuthandizeni pa moyo wanu manjeuno. Baibolo ingatithandize pa vinthu vizinji. Mwakulinganiza, ina malangizo yonena va:

•    Kubverana na wanthu anango.—Aefeso 4:31, 32; 5:22, 25, 28, 33.

•   Vaumoyo.—Salimo 37:8; Miyambo 17:22.

•   Makhalidwe yabwino.—1 Akorinto 6:9, 10.

•   Nkhani za chuma.—Miyambo 10:4; 28:19; Aefeso 4:28. a

Banja inango yachilumbwana yaku Ásia idathandiziwa maninge na malangizo molingana na wanthu azinji womwe andolowolana manjemanje iwo angashupika kudjairana komasoti kuchezerana vinthu momasuka. Koma patsogolo pake adayamba kuphatisira basa vomwe angalewewenga m’Baibolo. Ko vimwevi vidathandiza tani? Mwamuna wa m’banja mweyi, yemwe dzina yake ni Vicent adati: “vomwe ningalewenga m ‘Baibolo vidanithandiza kumalisa mabvuto ya m’banja yathu mwachikondi. Kutewedza mpfundo za m’Baibolo kwatithandiza kukhala na banja yokondwa.” Nkazi wake yemwe dzina yake ni Analou adanena kuti: “Kulewenga nkhani za wanthu wotomolewa m’Baibolo kwatithandiza maninge. Manje ninkuwona kuti vinthu vinkufamba bwino m’banja yathu ndipo tose tinavolinga vomwe tichada kuvikwanirisa.”

Ingakuthandizeni kudziwa Mulungu. Kuingizira pa vomwe adanena vokhudza banja yake, Vicent adati: “Nichawona kuti kulewenga Baibolo kwanithandiza kukhala pa ushamwali wakulimba na Yahova kuposha kale”. b Vimwevi vinkuonesa kuti Baibolo ingakuthandizeni kuti mumudziwe bwino Mulungu. Mukambalewenga Baibolo, malangizo yake yangakuthandizeni maninge ndipo muchawona kuti iye ni munzanu chaiye. Mudzawonesoti kuti Mulungu adafotokoza vinthu vokondweresa vonena za nthawe yomwe tidzakhale na moyo chaiyeiye womwe udzamalelini. (1 Timoteyo 6:19) Kunena shuwa palibe bukhu inango yomwe ingafotokoze vimwevi.

Mukayamba kulewenga Baibolo komasoti kupitiriza kuchita vimwevi mungaphindule maninge. Mungakhale na moyo wokondwa manjeuno komasoti kukhala pa ushamwali wakulimba na Mulungu. Koma mungakhale na mibvunzo yazinji. Vikakhala teno mumbakumbukire chitsanzo chabwino cha Nduna yaku Itiyopiya yomwe idakhala magole yoposha 2000 kumbuyo. Nduna mweyi yenze na mibvunzo yazinji yonena va Baibolo. Padabvunziwa peno ankubvesa vomwe ankulewenga, adati: ‘Ningabvese tani palibe wonitsumbudzulira.’ Patsogolo pake adabvuma kuti athandiziwe na Filipo, yemwe wenze wopfunzira wa Yesu yemwe ambaidziwa bwino Baibolo. (Machitidwe 8:30, 31, 34) Peno imwepombo muchada kudziwa vizinji va Baibolo, mungayende pa webusayiti ya www.pr418.com/phm nkunemba fomu yokumbira munthu woti ambapfunzire namwe Baibolo, munganembe pomwe kalata pophatisira basa adiresi yomwe ili mugazini ino. Peno neye, mungagumane na wa Mboni za Yahova yemwe munaye pafupi panango mungayende ku Nyumba ya Ufumu ya kudera yanu. Mungachite bwino maninge kuyamba lero kulewenga Baibolo na chakulinga chakuti ikuthandizeni pa moyo wanu.