Nidabadwira ku Paddington, mu thaundi ya London, England. Mu dera mweyi mungakhala wanthu azinji. Ningakhala na amayi wangu na azibale wangu atatu.ababa wangu enze chidakwa ndipo nthawe zizinji ambagumanikalini pa muyi.

Niri mwana amayi wangu adanipfunzisa kuti nimbapemphere usiku uliwose. Nenze na Baibolo yomwe yenze na bukhu ya masalimo yokha ndipo ningakonda kuyimba mawu ya mu salimo mwiyo. Nthawe inango nidalewenga mawu ya bukhu inango yomwe nidzayayebwelini yakuti: “Padzakhale ntsiku inango yomwe idzakhalelini na mangwana yake.” Mawu mwaya yadanichitisa kumbashupika kugona ndawa yoganizira maninge vakutsogolo. Nimbawona kuti moyo ungadekanalini kukhala tene, nimbakhulupirira kuti Mulungu wenze na chakulinga pakutisika ndipo nimbafunalini kufa.

Nidayamba kumbachita chidwi na vinthu vamatsenga, nimbayesetsa kuyankhula na wanthu wakufa, nimbayenda kumanda yosiyanasiyana na anzangu wa kushikola ndipo ningakonda kunyang’anira ma firme yopasa mantha.

Nidayamba kuchita vinthu vosokonezeka ninamagole 10 basi, nidayamba kupepa fodya maninge ndipo patsogolo pake nimbapeperatu chamba panango kuti m’banje. Pomwe nimbafika magole 11 nkuti nayamba kumwa mowa, olo kuti umbanikomeralini kuledzera uko ndiko kumbanikomedza. Nimbakonda pomwe nyimbo komasoti kuvina, nikakhala na mpata ningayenda kukamwa mowa kumabare komasoti ku malo yanango, usiku ningachoka pamuyi mwakabisebise, nkubwera mangwana yake machibesebese vimwevi vimbanichitisa kuti nthawe zizinji nimbalove ku shikola ndawa yoneta. Koma nikayenda ningamwa mowa pa intervalo.

Gole yomalizira ku shikola, ma exame yangu yenze yalibe nota zabwino. Amayi wangu adakalipa maninge padazindikira kuti nenze nidangenerera makhalidwe yoipa. Tidagegedzana maninge ndipo patsogolo pake nidachoka pamuyi nkuyenda kwa chibwenzi changu dzina yake Tony, yemwe wenze Rastafarian. iye ambaba komasoti ambagulisa mankhwala yosokoneza nsolo, ambadziwika pomwe kuti angakonda ndewo.nthawe pang’ono nidakhala na mimba ndipo nidabala mwana mwamuna ninamagole 16 basi.

Wanthu anango wophata basa m’boma adanithandiza kugumana malo ku nyumba yosungira atsikana wosalowodwa womwe enze na wana. kumuko ndiko komwe nidagumana na wamboni za Yahova kakuyamba. Azimayi awiri wamboni ambakonda kubwera kudzacheza na ntsikana anango. ntsiku inango inepanombo nidacheza nawo nimbafuna kuwawonesa kuti vomwe anganena venzelini chaivo. koma adadawira modekha komasoti mobveka bwino mibvunzo yangu yose pophatisa basa Baibolo. Nidakomedzewa nawo maninge ndawa enze wokoma moyo komasoti wafatsa mwakuti nidabvuma kuti ambapfunzire nane Baibolo.

Nidapfunzira mpfundo inango ya m’Baibolo yomwe idanikhudza maninge, kuyambira nili mwana ningagopa kufa. Koma pa nthawe mweyi nidapfunzira vomwe Yesu adanena vakuti wakufa adzamukisiwe. (Yohane 5:28, 29) Nidapfunzira pomwe kuti Mulungu achanikonda maninge. (1 Petulo 5:7)Mawu yomwe yadanifika pa moyo ni yomwe yali pa Yeremiya 29:11 yomwe yachati: “maganizo yangu kwa imwepo nikuyadziwa bwino, ninkuganiza vokupasani ntendere osati matsoka kuti mukhale na chidikhiro chabwino komasoti tsogolo Wanena teno Yahova. Nidayamba kukhulupirira kuti ni vokwanisika kuti nidzakhale na moyo wosapera padziko yapasi.—Salimo 37:29.

Wa Mboni za Yahova anganikonda maninge, panidayenda koyamba kumisonkhano yawo nidawona kuti aliyese wenze womasuka komasoti wochezeka. (Yohane 13:34, 35) vimwevi venze vosiyana maninge na vomwe vingachitika kutchetchi inango komwe ningayenda nthawe inango. Wamboni za Yahova adanitambira bwino olo kuti makhalidwe yangu yenzelini yabwino ambacheza nane komasoti kunithandiza maninge mwakuti nimbawawona ninge abale wangu chaiwo ndipo ni wakonda.

Panidayamba kupfunzira Baibolo nidazindikira kuti ningadekana kuchinja makhalidwe yangu kuti nikondwerese Yahova. Koma venze voshupa kuti nileke kupepa fodya. Nidawona pomwe kuti nyimbo zinango zimbanichitisa kukhala na shungu yopepa chamba panango kuti m’banje, ndawa ya vimwevi nidaleka kuzibvesera. Nidaleka pomwe kumbayenda ku malo yomwerako mowa na kumalo ya vikondwerero na chakulinga chakuti nileke kuledzera. Nidagumana pomwe anzangu anyowani womwe anganithandiza kukhala na makhalidwe yabwino.—Miyambo 13:20.

Tony wenze adayamba soti kupfunzira Baibolo na wa Mboni za Yahova, iye adaonambo kuti vomwe angapfunzira ni chaivo ndawa ambamudawira mibvunzo yake pakuphatisa basa Baibolo. Tony adachinja maninge khalidwe yake, adaleka kuba, kupepa chamba panango kuti m’banje, komasoti kucheza na anzake wokonda ndewo. Kuti tikondwerese Yahova tidawona kuti tichadekana kulowolana mwadongosolo, nkumbayesesa kulera bwino wana wathu. Patsogolo pake mu 1982 tidalowolana.

Nichakumbukira kuti ningafagafaga mu Ntsanja ya Ulonda komasoti Galamukani! a nkhani za wanthu womwe adakwanisa kuchinja khalidwe yawo. Vimwevi vichanilimbikisa maninge ndipo vidanichitisa mphanvu kuti niyesese kuchinja khalidwe yangu. Nimbapemphera kwa Yahova kuti apitirize kunithandiza. Inepano na Tony tidabatizika mu Julho 1982 nkukhalambo wa mboni za Yahova.

Kukhala pa ushamwali na Yahova Mulungu kudapulumusa moyo wangu. Inepano na Toniy tawona Yahova ankutithandiza maninge pa mabvuto yathu. mwevi vatithandiza kumuthemba maninge Yahova ndawa tawona kuti nthawe zose achathandiza banja yathu.—Salimo 55:22.

Nimbakondwa maninge nikambapfunzisa wana wathu awiri va Yahova. Manje nichakondwa kuti nawombo ankuthandizambo wana wawo kupfunzira va Mulungu.

Manje nisowalini tulo ndawa yogopa impfa panango vinthu vomwe vidzachitike kutsogolo. Sondo iliyose inepano na Tony tichazungira mipingo ya Mboni za Yahova kuti timbakalimbikise akhrisitu anzathu. Tiphata nawo pabodzi basa yopfunzisa wanthu anango kuti peno achakhulupirira Yesu, nawombo angadzaugumane moyo wosapera.