Ko muchawona kuti kulewenga Baibolo ni konetesa panango ni kosakondweresa? Vomwe muchachita pakulewenga ni vomwe vingachitise kuti mukhale wokondwa panango neye. Naboni tiwone vomwe mungachite kuti mumbakhale wokondwa pa kulewenga Baibolo.

Mumbalewenge Baibolo yosashupa kubva. Ngati mwalewenga Baibolo yomwe ina mawu yazinji yoshupa panango ya kalekale yomwe muchayabvesalini, kulewenga muku kungakukondweresenilini. Ndipo mwapa mungachite bwino kugumana Baibolo yosashupa kubva yomwe ingakufikeni pa moyo. Komasoti muchadekana kutsimikizira kuti Baibolo mweyo idatsumbudzuliriwa molondola. a

Mungalewenge pakuphatisa basa vipangizo va chizungu. Ntsiku zino mungakwanise kulewenga Baibolo pa interneti panango kuchita kubulusa kuti mumbayilewenge pa komputador, thabuleti, olo pa foni. Ma Baibolo yanango yakhala na vitsulo vokuthandizani kuona mwa kankulumize mavesi yosiyanasiyana yonena va nkhani yomwe munkulewenga, komasoti kuona momwe mabaibolo yanango yadatsumbudzuliriwa pa mavesi yomwe munkulewenga. Mu viseweredwe vinango, Baibolo igumanikambo yakundobvesera ninge audio, ndipo wanthu azinji akonda kubvesera Baibolo yotepewa akakhala wakwira karo, akambawatcha olo kuchita vinthu vinango. Ko imwepo mungayeseko vibodzi mwa vinthu vomwe vatomolewa?

Mumbaphatisire basa vitsulo vopfunzirira Baibolo. Pana vinthu vinango vomwe vingakuthandizeni maninge polewenga Baibolo. Mwakulinganiza, pali ma mapa ya m’madera yotomolewa m’Baibolo yomwe yangakuthandizeni kudziwa pomwe pana malo yanango na kubvesa nkhani yomwe munkulewenga. Nkhani ya m’magazini ya Ntsanja ya Olonda panango za pa chigawo chakuti “Zimene Baibulo Limaphunzisa” pa webusaiti ya jw.org, zingakuthandizeni kubvesa nkhani zizinji za m’Baibolo.

Mumbachinje-chinje njira zolewengera. Peno muchawona kuti kulewenga Baibolo kuyambira ku Geneses mpakana ku Chivumbulutso ni koshupa, mungayambe na nkhani yomwe ichakukomedzani maninge. Mwakulinganiza, peno munkufuna kudziwa vizinji va wanthu womwe ni wodziwika maninge wotomolewa m’Baibolo, mungayambe na kulewenga va wanthu mwawa. Mungambalewenge malemba yomwe yali mu bokosi yakuti: “ wanthu wa m’Baibolo womwe mungalewenge nkhani zawo.” Apo neye, panango mungafune kulewenga malemba yose yolewa va nkhani inango olo kulewenga potewedza nthawe yomwe vinthu vidachitika. Mungachite bwino kuyesa ibodzi mwa njira zomwe tazitomola.