Ko ni vinthu viponi vomwe vingakuthandizeni kuti mumbaphindule pakuwerenga Baibolo? Onani mpfundo 5 zomwe zathandiza wanthu azinji.

Mumbagumane malo yabwino. Mumbayesese kugumana malo yalibe zungo komasoti yalibe vinthu vomwe vingakukangiseni kuyika maganizo pa vomwe munkuwerenga. Malo mwayo yambakhale yogwerewera maninge komasoti yokwanisa kupita mphepo yabwino nachakulinga chakuti mumbakwanise kuphindula pa vomwe munkuwerenga.

Mumbakhale na maganizo yabwino. Baibolo ni yochokera kwa Ababa wathu wakudzulu. Ndipo mwapa mukambaiwerenga, mungachite bwino kukhala na maganizo yolingana na mwana yemwe achafunisisa kupfunzira vinthu kwa ababa wake wachikondi. Ngati muli navo kale vikhulupiriro panango maganizo yanango yokhudza va Baibolo, mumbayesese kuti muleke kuganizira vimwevo pakuwerenga. Vimwevi vingachitise kuti Mulungu ambakuthandizeni kuzindikira mpfundo chaizo.—Masalimo 25:4.

Mumbapemphere mukalibe mwayamba kuwerenga. Malangizo yomwe yali mu Baibolo ni ya Mulungu. Ndipo mwapa iye ndiye angatithandize kuti tiyibvese. Mulungu adapolomisa kuti ambapereke “mzimu uchena kwa womwe achamukumbira.” (Luka 11:13) Mzimu ungakuthandizeni kubvesa maganizo ya Mulungu. Mukapitiriza kuthemba mzimu, udzakwanise kukuthandizani kubvesa “olo vinthu vowoneka kuti ni voshupa va Mulungu.”—1 Akorinto 2:10.

Mumbabvesese vomwe munkuwerenga. Ayi kumbati nindowerenga basi. Mumbaganizire maninge pa vomwe munkuwerenga. Mumbadzibvunze mibvunzo ngati aya: ‘Ko munthu wa nkhani yomwe nawerenga iyi wenze na makhalidwe yabwino yaponi? Ko ningawonese tani makhalidwe mwaya pa moyo wangu?’

Mumbakhale na volinga. Kuti mumbaphindule mukambawerenga Baibolo, mumbayesese kupfunzira mpfundo inango yomwe ingakuthandizeni pa moyo wanu. Mungakwanise kukhala na volinga ninge kupfunzira vinthu vizinji vokhudza Mulungu, kupfunzira mpfundo zomwe zingakuthandizeni kukhala munthu wabwino, panango vomwe vingathandize kuti banja yanu imbafambe bwino. Patsogolo pake mungasalule nkhani za m’Baibolo zomwe zingakuthandizeni kukwanirisa volinga. a

Mpfundo 5 zimwezi zingakuthandizeni kuyamba kuwerenga Baibolo. Koma ko mungachitetani kuti kuwerenga Baibolo kumuko kumbakhale kokomedza maninge? Nkhani ikubwera idzafotokoze vimwevi.