Nidabadwira m’muyi wochemerewa Saxony, mudziko yomwe panthawe mweyi imbachemerewa kuti República Democrática de Alemanha. Banja yathu yenze yabwino na yokondana ndipo azibereki wangu ambanipfunzisa makhalidwe yabwino. Mudziko mwiyi, wanthu ambafambira mpfundo yakuti tose ndise wolingana. Ndipomwapa wanthu wa mudera yathu ambawona kuti kukhala muchipembedzo kulibe phindu. Ndipo ine nimbakhulupirira kuti kulibe Mulungu. Kundochokera nili mwana mpaka kufikisa magole 18, nimbayendera mpfundo yakuti wanthu wose ni wolingana ndipo kulibe Mulungu.

Nimbakonda maninge chipani cha Comunismo ndawa chimbalewa kuti wanthu wose ni wolingana. Ndipo nimbaona pomwe kuti vinthu vose kuphatanidzapo malo, vichadekana kugawiriwa wose molingana. Nimbaona kuti vimwivi ndivo vingathandize kuti osati pagumanike wosauka maninge na wolemera maninge. Ndipomwapa nimbaphata basa mukagulu ka alumbwana komwe kenze kodzipereka maninge kuchipani mwichi. Penenze na magole 14, nimbakonda kuphata basa yokonza vinthu pophatisa basa vimapepa vomwe vataiwa. Akuluakulu wa muthaundi ya Aue adakondwa maninge na vomwe nimbachita ndipo adanipfupira. Vimwivi vidachitisa nkuti nidziwane na akuluakulu wandale podiya kuti nenze nikali mulumbwana. Nimbawona kuti ninkuchita bwino maninge ndipo ninatsogolo yabwino.

Koma vinthu vidachinja mwadzidzidzi pamoyo wangu. Mu 1989, mpanda wa Berlim udagwesewa ndipo dziko ya Alemanha ilibe kukhala pomwe yogawiwa pakati. Panthawe mweyi, mpfundo ile yakuti wanthu wose ni olingana idamaliratu. Kanthawe pang’ono nidazindikira kuti m’boma ya República Democrática de Alemanha mumbachitika vinthu vizinji vilibe chilungamo. Mwakulinganiza, wanthu omwe ambayenderalini mpfundo yakuti wanthu wose ni olingana, ambaonewa kuti alibe na basa. Pamwapo nimbadzibvunza kuti: ‘Manje ndawa chani? Si pale wanthu wa muchipani mwichi timbakhulupirira kuti wanthu wose ni olingana? Ndiye kuti wanthu wa muchipani mwichi andolewa na pakamwa koma akwanisalini kuchita?’ Vimwivi vimbanikwinyiririsa maninge.

Pamwapo nidaleka kukonda chipani cha Comunismo ndipo nidayamba kupfunzira kuimba na kudezenyali vinthu pamanja. Nimbapfunzira kuimba nyimbo pa shikola inango ndipo nenze na cholinga chakuti nidzayende ku univerisidade kuti nidzakhale wodziwa kuimba na kudezenyali. Panthawe mwiyi nidaleka kutewedza makhalidwe yabwino yomwe azibereki wangu adanipfunzisa. Nimbaona kuti chofunika maninge ni kukondwa ndipo nimbafamba na atsikana. Koma kuimba, kudezenyali na kufamba na atsikana kulibe kumalisa mabvuto yangu. Ndipo vinthu vomwe nimbadezenyali vimbawoneseratu kuti nenze munthu wamantha na wankhawa. Nimbadzibvunza kuti: Ko inepano ninatsogolodi yabwino? Ko cholinga cha moyo wangu ni chani?

Koma patsogolo pake nidagumana midawiro ya mibvunzo yangu, ndipo midawiro mwayo yadanidabwisa maninge. Ntsiku inango nili kushikola, nimbakambirana na aluno anango vomwe munthu angachite kuti akhale na tsogolo yabwino. Pa aluno mwawa penze mtsikana munango wa Mboni dzina yake Mandy. a Vomwe iye adaniuza pantsiku mwiyi vidanithandiza maninge. Iye adaniuza kuti: “Andreas, peno unkufuna kudziwa vomwe ungachite kuti ukhale na tsogolo yabwino, ukawerenge bwinobwino Baibolo.”

Podiya kuti nimbakaikira kuti Baibolo inganithandize, nidasaina vakuti nindoiwerenga basi. Mandy adaniuza kuti nikawerenge Danieli msolo 2 ndipo vomwe nidawerenga vidanifika pamoyo maninge. Ulosi wa mumsolo moyu ulewa va mautongi yamphanvu padziko yose, yomwe yakhalako mpakana nthawe yathu ino. Mandy adaniwonesa pomwe maulosi yanango ya m’Baibolo yolewa va tsogolo ya wanthu. Apa manje nidagumana midawiro ya mibvunzo yangu. Koma nimbadzibvunza kuti: Maulosi mwaya yalewadi chaivo vakutsogolo, manje ni mbani adayanemba? Ndiye kuti Mulungu moyu alikodi na?

Mandy adauza a Horst na akazi wawo a Angelika kuti ambanipfunzise Baibolo. Banja mwiyi idanithandiza maninge kubvesa bwino Mawu ya Mulungu. Kanthawe pang’ono nidazindikira kuti ni Mboni za Yahova zokha zomwe ziphatisa basa dzina ya Mulungu yakuti Yahova ndipo athandizambo anango kuti aidziwe. (Salimo 83:18; Mateyu 6:9) Nidapfunzira pomwe kuti Yahova adachita makonzedwe yakuti wanthu wobvera adzakhale na moyo wosapera m’Paradaiso padziko pano. Lemba ya Salimo 37:9 ilewa kuti: ‘Odikhira Yahova ndiwo wati adzatambire dziko yapasi.’ Nidakondwa maninge panidadziwa kuti munthu aliyese yemwe ayesesa kutewedza mpfundo za m’Baibolo, angadzagumane moyo wosapera.

Koma olo nteno, nidashupika kuchinja moyo wangu kuti ubverane na vomwe Baibolo ichapfunzisa. Nenze wodziwika maninge ndawa ya buya yangu yoimba na kudezenyali, ndipo vimwivi vidanichitisa kuti nikhale womeka. Ndipomwapa nimbafunika kupfunzira kukhala wodzichepesa. Nidashupika pomwe kusiya khalidwe yangu yachigololo. Niyamikira maninge Yahova ndawa yakuti iye ni wodekha, wachifundo ndipo awabvesa wanthu omwe ankuyesesa kutewedza vomwe Baibolo ichapfunzisa.

Kuchokera nili mwana mpaka pomwe nidakwanisa magole 18, nimbafambira mpfundo yakuti wanthu wose ni wolingana ndipo nimbakhulupirira kuti kulibe Mulungu. Koma kuyambira nina magole 18 mpaka pano, Baibolo yanithandiza kuchinja moyo wangu. Vomwe nidapfunzira m’Baibolo vidanithanidza kuwona kuti ninatsogolo yabwino ndipo nkhawa yangu idamaliratu. Vidanithandiza pomwe kudziwa cholinga cha moyo wangu. Mu 1993 nidabatizika nkukhala wa Mboni za Yahova ndipo mu 2000 ndidalowolana na Tabitha yemwe ni wa Mbonimbo. Timala nthawe itali tinkuthandiza wanthu kuti adziwembo vomwe Baibolo ichapfunzisa. Wanthu azinji omwe tigumana nawo, akhulupiriralini kuti Mulungu aliko ndipo enzembo muchipani cha Comunismo ninge inepano.

Pinidayamba kusonkhana na wa Mboni za Yahova, azibereki wangu adakalipa maninge. Koma patsogolo pake adazindikira kuti kusonkhana na wa Mboni za Yahova kudanithandiza kuti nichinje khalidwe yangu yoipa. Ndine wokondwa maninge ndawa yakuti manjeuno azibereki wangu ankupfunzira Baibolo ndipo ayenda kumisonkhano.

Ine na nkazi wangu Tabitha tinabanja yabwino maninge ndawa tiyesesa kutewedza malangizo ya m’Baibolo. Mwakulinganiza, kukhala okhulupirika m’banja kwatithandiza kuti timbabvane maninge.—Aheberi 13:4.

Manjeuno nikhalalini pomwe na nkhawa ndawa yoganizira tsogolo yangu. Niwona kuti nili m’gulu yapadziko yose ya abale na alongo omwe ni wanthu wantendere na obvana maninge. Mugulu mweyi, palibe yemwe adziwona kuti ni wapadzulu kuposha mwanzake. Mpfundo mweyi nakhala ninkuikhulupirira kuyambira kalekale, ndipo nenze na shungu yakuti nigumane gulu yomwe inkuitengera siriyasi.