Wa Mboni za Yahova wakhala ankuphatisa basa ma Baibolo yosiyanasiyana pakupfunzira Baibolo. Koma tichaphatisa basa maninge Baibulo la Dziko Latsopano la Malemba Opatulika ngati iripo mu chiseweredwe chathu. Tichaikonda Baibolo mweyi ndawa yakuti ichaphatisa basa dzina ya Mulungu, idatsumbudzuliriwa motewedza komasoti ni yosashupa kubva.

•   Kuphatisa basa dzina ya Mulungu. Wanthu anango wotsumbudzulira Baibolo adalewa madzina ya wanthu womwe adathandiza pa basa yotsumbudzulira koma adakangira kupereka ulemu kwa munthu yemwe adanemba Baibolo. Mwakulinganiza, m’baibolo inango adanemba madzina yoposha 70 ya wanthu womwe adathandizira nawo pa basa yotsumbudzulira Baibolo. Koma ni vodabwisa kuti m’Baibolo mwiyi alibe kunenako olo kabodzi kokha dzina ya Mulungu yakuti Yahova, yemwe adanemba Baibolo!

   Mwakusiyana na vimwevi, komiti ya wanthu womwe adatsumbudzulira Baibulo la Dziko Latsopano adabwezeresa dzina ya Mulungu mu malo yazinji yomwe dzina mweyi imbagumanika m’Baibolo yoyambirira. Chochitisa chidwi ni chakuti wanthu wa mukomiti mweyi madzina yawo yadziwikalini mpakana lero.

•   Kutsumbudzuliriwa molondola. Ni Mabaibolo lini yose yomwe yadatsumbudzuliriwa molondola ntontholo womwe wenze mu m’Baibolo yoyambirira. Mwakulinganiza, m’Baibolo inango adatsumbudzulira mawu ya palemba ya Mateyu 7:13 mwatene: ‘Ngenani pa chipata chopapatidza. Pakuti chipata chongena ku gehena ni chikulu ndipo nsewu wake woyenda kumuko ni wosashupa kufambamo.’ Koma m’Baibolo yoyambilira adaphatisa basa mawu yakuti ‘chiwonongeko,’ osati ‘gehena’. Panango womwe adatsumbudzulira Baibolo adayikha mawu yakuti ‘gehena’ ndawa ambakhulupirira kuti wanthu woyipa adzashokewe mpaka kalekale ku gehena. Koma Baibolo ichapfunzisalini vimwevi. Ndawa yake pa lemba mweyi, Baibulo la Dziko Latsopano ichanena molondola kuti: ‘Ngenani pa chipata chopapatidza. Pakuti nsewu ukulu ni wotambasuka ukuyenda kuchiwonogeko.’

•   Kubveka mosashupa. Baibolo yotsumbudzuliriwa molondola ichadekana soti kukhala yosashupa kubva. Linganizani na chitsanzo cha pa lemba ya Aroma 12:11, mtumi Paulo adaphatisa basa momwe mawu mwayo yaliri ambatanthauza “mpakana nzimu kupferuka.” Pakuti mawu mwaya ni yoshupa kubva mu chingerezi Baibulo la Dziko Latsopano idalewa mawu mwaya munjira yosashupa kubva. Baibolo idalewa kuti akhrisitu achadekana ‘kufamba na nzimu.’

 Kuyingizira pakuphatisa basa nzimu wa Mulungu, kutsumbudzuliriwa molondola komasoti mosashupa kubva, Baibulo la Dziko Latsopano inaubwino pomwe unango. Ubwino wake niwakuti Baibolo mweyi ichaperekewa palibe ntengo chaiye koma wanthu achapereka mali mwa kufuna kwawo, mwevi vathandiza kuti wanthu mamidyau yazinji womwe adakakwanisalini kugula, ambalewenge Baibolo mu chiseweredwe chawo.