Briana, wa magole 15 adanena kuti: “Nthawe zizinji nikafuna kulewenga Baibolo, nichachita ulesi ndawa nichaona kuti ni chibukhu chikulu.

 Ko imwepo muchaonambo teno? Nkhani mweyi ikuthandizeni!

•  Ndawa chani kulewenga Baibolo ni kodekana?

•  Ningachitetani kuti kulewenga Baibolo kumbanikondweresa?

•  Vomwe alumbana anzanu achanena

 Ko muchawona kuti kulewenga Baibolo nikosakondweresa? Peno muchawona teno, ndimwelini mwekha. Panango muchawona kuti Baibolo ni bukhu ikulu, ya matsamba yazinji komasoti iribe mafoto mwakuti mungailinganizelini na momwe muchakhalira wokondwa mukambanyang’anira TV panango mavidiyo!

 Naboni tilinganize tene: Mwaona chola chamali chomwe chikuoneka kuti ni chakalekale maninge, ko mungakalelini na chidwi kuti muone vomwe viri nkati mwake?

 Baibolo iri ningei chola mwicho. Mungagumanemo mpfundo za nzeru zomwe zingakuthandizeni. Ingakuthandizeni pa nkhani zinayi izi

•   Kuti mumbasalule vinthu mwa nzeru

•   Kuti mumbabverane na azibereki wanu

•   Kuti mugumane anzanu wabwino

•   Kuti muchepese nkhawa

 Manje ko vingakwanisike kuti bukhu yakalekale ikhale yothandiza ntsiku zino? Inde vingakwanisike, tikunena teno ndawa ‘Malemba yose yadauziriwa na Mulungu.’ (2 Timoteyo 3:16) Vimwevi vinkuonesa kuti malangizo ya m’Baibolo yadachokera kwa munthu wothembeka maninge.

 Chakuyamba, mumbalewenge kuchokera kumayambiriro mpakana kwakumalizira. Kuchita vimwevi kungakuthandizeni kubvesa ntontholo wose wa m’Baibolo. Koma pali njira zizinji zothandiza pakulewenga Baibolo. Mwakulinganiza, mungatewedzere njira izi:

•    Mungalewenge mabukhu yose 66 ya m’Baibolo kuyambira pa Genesis mpakana Chivumbulutso.

•    Mungalewengesoti Baibolo mwakutewedzera nthawe yomwe vinthu vinango vidachitika.

 Vomwe vingakuthandizeni: Werengani vakumapeto 21 mu Baibulo la Dziko Latsopano kuti muone vochitika vikuluvikulu pa moyo wa Yesu ali pa dziko ya pasi.

 Chachiwiri, mumbasalule nkhani yogwirizana na mabvuto yomwe mukugumana nayo. Mwakulinganiza:

•    Peno muchada kugumana anzanu wodalirika, werengani nkhani ya Yonatani na Davide. (1 Samueli, nsolo 18-20) Patsogolo pake phatisirani basa tsamba ya pasaiti yathu pa nkhani yakuti, ‘zimene Mungachite Kuti Mupeze Anzanu Odalilika’ kuti muone mpfundo zomwe zingakuthandizeni.

•    Peno muchadalini kugopa mukagumana na mayesero, werengani nkhani ya Yosefe kuti muone vomwe adachita pomwe adagumana na mayesero. (Genesis, nsolo 39) Patsogolo pake phatisirani basa tsamba ya pasaiti yathu pa nkhani yakuti, ‘Zimene Mungachite Mukakumana ndi Mayesero . . . Yosefe—Mbali 1’ komasoti nkhani yakuti, ‘Anaimbidwa Mlandu Womunamizira, Yosefe—Mbali 2’ kuwona mpfundo zimwezi kungakuthandizeni.

•    Ngati mukufuna kudziwa momwe pemphero ingakuthandizireni, werengani nkhani ya Nehemiya. (Nehemiya, nsolo 2) Patsogolo pake phatisirani basa tsamba ya pasaiti yathu pa nkhani yakuti, ‘Mulungu Anayankha Pemphero Lake’ kuwona mpfundo zimwezi kungakuthandizeni.

 Vomwe vingakuthandizeni: Mukambalewenga Baibolo, mumbawonesese kuti mwakhala pa mbuto palibe zungo kuti muleke kusokonezewa.

 Chachitatu, mumbasalule nkhani yakuti mulewenge, patsogolo pake mumbaganizire momwe nkhani iyo ingakuthandizireni. Mukamaliza kulewenga, mumbadzibvunze kuti:

•    Ndawa chani Yahova adabvuma kuti vimwevi vinembewe m’Baibolo?

•    Ko vimwevi vichatipfunzisa chani va Yahova komasoti na momwe achachitira vinthu?

•    Ko mpfundo zomwe napfunzira izi ningaziphatisire tani basa pa moyo wangu?

 Vomwe vingakuthandizeni: Konzani ndandanda yabwino yakuti mumbalewengere Baibolo ntsiku iriyose ndipo nembani ntsiku yomwe muchada kuyamba kulewenga.