“Ntsikana munango dzina yake Will, adati: “Baibolo ichakomedzalini Peno uchadziwalini kawerengedwe kake.”

 Ndawa chani muchadekana kudziwa momwe mungawerengere Baibolo? Nkhani mweyi ikuthandizeni

•  Momwe mungasalulire vochita

•  Fagafagani

•  Vomwe anzanu achanena

 Vibveseseni vomwe muchalewenga. Mungaphatise basa njira izi:

1.   Salulani nkhani ya m’Baibolo yomwe mukufuna kupfunzira. Mungasalule nkhani ya m’Baibolo panango nkhani ya mu Ntontholo Wabwino, panango mungasalule nkhani za m’Baibolo zomwe zichagumanika pa jw.org.

2.   Werengani nkhani mweyo. Mungalewenge mwekha, panango mungalewenge mokuwa na anzanu panango azibale wanu. Munthu m’bodzi angakwanise kulewenga nkhani iyo pomwe anango angalewengembo mbali zinango.

3.   Yesani kulewenga ibodzi panango zinganani mwa maganizo aya:

   •   Chosani mafoto kuti muwonese vomwe vikuchitika. Panango kukonza mbali za nthano—chosani mafoto yanganani yosashupa yomwe yankuwonesa kubverana pa vomwe vinkuchitika. Phatisani basa mawu yofotokozera pa vomwe vikuchitika pa foto yiriyose.

   •   Chosani mafoto. Mwakulinganiza, mukambalewenga va munthu wokhulupirika, bveranisani makhalidwe na vochita va munthu uyo na madaliso yomwe adatambira.

   •   Ichinjeni nkhani iyo kukhala inyowani. Zifotokozeni mu njira yosashupa kubva, ndipo bveranisani “vokambirana” na wanthu wotomolewa mu nkhaniyo na mboni zowona na maso.

   •   Peno m’bodzi wa wanthu wa munkhani mweyi alibe kusalula mwanzeru, ganizirani mapeto yake. Mwakulinganiza, ganizirani pomwe Petulo adalamba Yesu. (Maliko 14:66-72) Ko Petulo adakachita chani padachichimiziwa?

   •   Peno mukuona kuti mukuchita vinthu mwanzeru, yesesani kunemba sewero yanu yochokera mu Baibolo. Bveranisani pa vomwe mungapfunzirepo pa nkhani mweyo.—Aroma 15:4.

 Mukambaganizira vinthu vizinji, mungakwanise kugumana vinthu vobisika. Ndipo nthawe zinango m’Baibolo nkhani ibodzi panango ziwiri ni zodekana maninge.

 Mwakulinganiza, linaganizani na Mateyu 28:7 na Maliko 16:7.

•    Ndawa chani Maliko adanena mpfundo yakuti manjemajepa Yesu adzaonekere kwa wopfunzira wake “na Petulo”?

•  Vingakuthandizeni: Maliko wenzelini mboni pa vochitika mwevi; vikuchita kuonekeratu kuti pa vomwe iye ambadziwa adavigumana kwa Petulo.

•  Mpfundo yodekana: Ndawa chani Petulo adalimbikisiwa padabva kuti Yesu akufuna kugumana naye? (Maliko 14:66-72) Ko Yesu adaonesa tani kuti wenze munzake wapamoyo wa Petulo? Ko mungatewedzere tani Yesu kuti anango ambakuwoneni kuti ndimwe anzawo wapamoyo?

 Mukambayesesa kuona malemba kukhala yodekana pa moyo wanu na kumbayesesa kufagafaga, kulewenga Baibolo kuchakhala kokomedza maninge!