VOMWE ALUMBWANA ACHABVUNZA
Ndawa chani tichadekana kugumanika pa misonkhano ya pa Nyumba ya Ufumu?
Sondo iliyose, wa Mboni za Yahova achagumana kawiri pa nyumba yopempherera yomwe ichachemerewa kuti Nyumba ya Ufumu. Ko kumuku kuchachitika votani, ndipo mungaphindule tani ngati muchagumanika pa misonkhano yawo?
Ko nchani chichachitika ku Nyumba ya Ufumu?
Kunyumba ya Ufumu, wanthu achakhala na mwayi wopfunzira mpfundo zothandiza za m’Baibolo. Misonkhano yomwe yachitika kumuko yangakuthandizeni kuti:
mupfunzire na kumudziwa bwino Mulungu.
mudziwe ndawa yake vinthu vafika pakuyipa maninge tene.
mukhale munthu wamakhalidwe yabwino.
mugumane wanthu wabwino womwe angakhale anzanu.
Ko mukudziwa? Malo yopempherera ya wa Mboni za Yahova yachachemerewa kuti Nyumba ya Ufumu, ndawa mpfundo zizinji zomwe achapfunzira kumuko zichakhala zokhudza va Ufumu wa Mulungu.—Mateyu 6:9, 10; 24:14; Luka 4:43.
Ndawa chani muchadekana kugumanika pamisonkhano mwaya?
Vomwe mungapfunzire vingakuthandizeni. Mpfundo za m’Baibolo zomwe wanthu achapfunzira pa misonkhano ya Mboni za Yahova, zingakuthandizeni kuti mugumane ‘nzeru.’ (Miyambo 4:5) Vinthu mwevi vinkuonesa kuti mpfundo za m’Baibolo zingakuthandizeni kusalula bwino vakuti muchite pa moyo wanu. Vingakuthandizeni soti kugumana midawiro yodekana maninge ninge ya mibvunzo yakuti:
Ko chakulinga cha moyo nchani?
Ko Mulungu ndiye achachitisa kuti timbabonere?
Ko chichachitika nchani munthu akafa?
Onani misolo ya nkhani zinango zomwe zichakambiwa kumapeto kwa sondo iriyose. Nkhani zake ninge:
Ndawa chani tichadekana kutewedza malangizo ya m’Baibolo?
Ko mungagumane kuponi thandizo pa nthawe ya yamabvuto?
Vomwe Ufumu wa Mulungu ukuchita ntsiku zino.
Brenda adanena kuti: “Ntsiku inango munzangu wakushikola adabwera pa misonkhano yathu. Adakhala pabodzi na banja yathu ndipo ningawerenga naye pabodzi mabukhu. Misonkhano payadamala, adaniuza kuti wakondwa maninge na ndemanga zomwe abale na alongo angapereka. Adalewa soti kuti waona vinthu vosiyana na vakutchetchi kwawo ndawa achakhalalini na mabukhu yophatisa basa pakupfunzira.”
Ko mukudziwa? Mukafika ku Nyumba ya Ufumu, mungakhale palipose ndipo kuchafambisiwalini mbale ya vopereka.
Mudzalimbikisiwe na wanthu womwe mudzagumane nawo kumuko. Baibolo ichanena kuti chinthu chibodzi chomwe Akhrisitu achadekana kusonkhanirana pabodzi ni chakuti, ambakwanise ‘kulimbikisana.’ (Aheberi 10:24, 25) Kumuko, mukagumane na wanthu womwe achakonda maninge Mulungu komasoti womwe achachita vinthu moganizira anango. Vimwevi ni vosowa maninge mu dziko yino.
Elisa adanena kuti: “Nikachoka kubasa nichakhala woneta komasoti wokhumudwa. Koma nikayenda ku Nyumba ya Ufumu nichagumana na wanthu womwe achanilimbikisa maninge. Misonkhano yakamala, nichabwerera kumuyi niri wokondwa mwakuti kukachena nichayenda kubasa niribe nkhawa yiriyose.”
Ko mukudziwa? Padziko yose pali mipingu ya Mboni za Yahova yoposha 120 000 yomwe yachasonkhana ku malo yoposha 60 000. Pakuti chiwerengero cha wanthu osonkhana achikuwandirawandira, pankumangiwa Nyumba za Ufumu pafupifupi 1500 gole yiriyose
a Kuti mugumane malo ya misonkhano, ngenani pa saiti yathu pomwe anemba kut “Misonkhano ya Mipingu ya Mboni za Yehova’ ndipo tinyani pomwe alemba kuti ‘Fagani malo ya pafupi.”
