Kafukufuku munango udawonesa kuti 80% ya alumbwana ku America achapemphera, koma hafu ya wanthu mwawa ni womwe achapemphera ntsiku iriyose. Panango anango angambadzibvunze kuti: ‘Ko pemphero indothandiza kuti maganizo yakhale m’malo, panango ichathandiza soti munjira zinango?’

•  Ko pemphero ni chani?

•  Ko Mulungu achabvesera mapemphero?

•  Ko ningafotokoze nkhani ziponi nikambapemphera?

•  Vomwe anzanu achanena

 Kupemphera ni njira yoyankhulira na Mulengi wa vinthu vose. Manje ganizirani, Yahova ni wapadzulu kuposha wanthu mu njira iriyose, koma ‘iye alilini kutali na aliyese wa ise.’ (Machitidwe 17:27) Ndipo ni vochitisa chidwi kuti Baibolo ichatiuza kuti: ‘Fendererani Mulungu, ndipo iyembo adzakufenderereni.’—Yakobo 4:8.

 Ko tingamufenderere tani Mulungu?

•   Chakuyamba, muchadekana kupemphera. Imweyi ni njira yakuyankhulira na Mulungu.

•   Chachiwiri, muchadekana kupfunzira Baibolo. Imweyi ni njira yomwe Mulungu ‘achayankhulira’ na imwepo.

 Mukambayankhulana na Mulungu m’pemphero komasoti pakupfunzira Baibolo, vichathandiza kuti akhale munzanu wa pamoyo.

 Jeremy adanena kuti: “Kuyankhula na Yahova, yemwe ni wapadzulu maninge mu chilengedwe chose, ni mwayi wapadera maninge kwa wanthu.”

 Miranda adanena kuti: “Nikambapemphera kwa Yahova kuchokera pasi pa moyo vichanithandiza kubva kuti ni munzangu wa pamoyo.”

 Olo kuti muchakhulupirira Mulungu komasoti muchapemphera kwa iye, nthawe zinango vichakhala voshupa kukhulupirira kuti iye achabveseradi. Koma Baibolo ichanena kuti Yahova ni ‘wakubva pemphero.’ (Salimo 65:2) Komasoti ichatilimbikisa kuti ‘mumbamutulire nkhawa zanu zose, pakuti achakuderani nkhawa.’—1 Petulo 5:7.

 Ganizirani ivi: Ko imwepo muchakonda kucheza na munzanu nthawe zose? Muchadekanambo kuchita chibodzibodzi na Mulungu. Mumbapemphere kwa iye nthawe zose, ndipo mumbaphatise basa dzina yake yakuti Yahova. (Salimo 86:5-7; 88:9) Pa nkhani ninge mweyi, Baibolo ichakulimbikisani kuti ‘mumbapemphere mosalekedza.’—1 Atesalonika 5:17.

 Moises adanena kuti: “Nikambapemphera, nichakha ninkuyankhula na Ababa wangu wa kudzulu ndipo nichawakhuthulira vose va muntima mwangu.”

 Karen adanena kuti: “Yahova nichamufotokozera chirichose cha kukhosi kwangu ngati momwe ningachitire na amayi wangu panango munzangu wa pantima.”

 Baibolo ichanena kuti: ‘Pa chirichose, mwa pemphero na pembedzero, pabodzi na kutembeja, vokumbira vanu vidziwike kwa Mulungu.’—Afilipi 4:6.

 Ko vimwevi vikutanthauza kuti tingapemphereresoti mabvuto yathu? Inde, ndipo Baibolo ichanena kuti: ‘Umutulire Yahova nkhawa zako, ndipo iye adzakulimbikise.’—Salimo 55:22.

 Koma, mukapemphera kwa Mulungu, mumbamuuzesoti vinthu vinango osati mabvuto yanu yokhayokha. Ntsikana munango dzina yake Chantelle adanena kuti: “Ningalewelini kuti Yahova ni mwanzangu wapamoyo ngati nimbondokumbira kuti anithandize. Nichaona kuti nichadekana kuyamba na kumutembeja pa vinthu vizinji vomwe achanichitira.”

 Ganizirani ivi: Ko imwepo muchatembeja vinthu viponi pa moyo wanu? Ko ni vinthu vitatu viponi vomwe mungatembeje Yahova lero?

 Anita adanena kuti: “Tingapereke pemphero yotembeja Yahova pa vinthu ving’onoving’ono ninge mafolori yokhuza.”

 Brian adanena kuti: “Mbaganizirani chinthu chinango cha nchilengedwe chomwe chichakuchitisani chidwi panango vesi yomwe ichakufikani pa moyo ndipo patsogolo pake mutembejeni Yahova.”