HUO̧JUI̧CUÄ̧ 01
Ucuru Dios I̧huȩnȩ Isäʼtä, ¿tta̧ʼa̧nö̧ ppädöʼa̧nö̧ ja̧ʼa̧ttö̧?
Recuätö ttö̧ja̧ jäʼecuätö tta̧ʼcua̧rö̧ ötöʼcö jähuäʼinä, ubara ttuhuähuäʼinä, ʼcorujuoächäcuähuäʼinä, ttäʼca ja̧ʼa̧cu̧ jähuäʼinä. Ja̧ʼhua̧ta̧nö̧ jahuätörö recuä rö̧jö̧ ttu̧ju̧nä̧ra̧ päʼöʼinä, ttahuaruhuäcu eseu ttö̧ja̧ päʼö däje jȩttö̧ʼa̧nö̧ ja̧ʼa̧ päʼöʼinä amöcuädö tta̧ʼcua̧ roʼecuätö. Recuätö ttö̧ja̧mä̧ ttu̧ʼȩpä̧rä̧chi̧ʼö̧ topäʼijätö pi̧yȩ jättecu rö̧ȩnä̧ micuäumä Dios I̧huȩnȩ Isäʼtä ädätaʼa päʼö. Ja̧ʼhua̧ta̧nö̧ piʼtänä oicuä huȩnȩ räopömä ppädaʼa päʼöʼinä. ¿Ya̧tȩ ucu cu̧huo̧juä̧cu̧ru̧ Dios I̧huȩnȩ Isäʼtä ppädöʼa̧nö̧ ja̧ʼa̧ päʼö cuamöcuädaʼa ja̧ʼa̧di̧?
1. ¿Ti̧yȩ jäecuä ädätaʼattö Dios I̧huȩnȩ Isäʼtämä?
Dios I̧huȩnȩ Isäʼtämä pi̧yȩ rö̧ȩnä̧ micuäu jäecuä jähuä ädätaʼa: ¿tta̧ʼcua̧rö̧mä̧, tocu kä̧mä̧di̧na̧ʼa̧ttö̧?, ¿pi̧jä̧ rȩjȩnä̧mä̧ tocu päʼö tö̧ja̧ʼa̧ttö̧?, ¿tocu päʼö ubara ttuttaʼattö ttö̧ja̧ adihuä isotömä?, ¿ʼcorujuottächö oʼcaʼa, däje ʼcuäopaʼattö?, ¿oʼca toiʼönä huȩnȩ juiyönä ttö̧ja̧ pättaʼanä, tocu päʼö rö̧ȩnä̧ curä ka̧ʼa̧ttö̧?, ¿yodojinänö däje ʼcuäopäcuaʼattö ti̧rȩjä̧bacumä? Dios I̧huȩnȩ Isäʼtänä jiähuaʼa pi̧yȩ jäecuä ädätäcuähuä tö̧ʼo̧cui̧ʼö̧ʼa̧nö̧ ja̧ʼa̧ päʼö. Recuätö ttö̧ja̧mä̧ piʼtänä usu ttö̧ʼo̧cui̧ʼä̧ʼi̧jö̧ jähuänä topö rö̧ȩnä̧ esehuätö.
2. Mo̧ro̧ jö̧ taʼanö eseu tö̧ja̧ päʼö, ¿tta̧ʼa̧nö̧ ppädaʼattö Dios I̧huȩnȩ Isäʼtämä?
Dios I̧huȩnȩ Isäʼtänä adiu oicuä huȩnȩ ka̧ʼa̧. Huȩnȩtö̧ päʼö, ttamönä ttahuaruhuäcu tta̧ʼa̧nö̧ eseu ttö̧jö̧ʼa̧nö̧ ja̧ʼa̧ttö̧ päʼö huo̧juȩta̧ʼa̧. Ja̧ʼhua̧ta̧nö̧ rö̧ȩnä̧ ta̧ʼcua̧ roiʼö juiyönä eseunu tadita päʼö jȩtö̧ʼa̧nö̧ jö̧ jiähuaʼa. Pi̧yȩ jähuäʼinä, koro jähuäʼinä juhuaʼa yabocu piʼtä cuyäruʼtänä ji̧nä̧ yo̧mȩtȩ tu̧huo̧juä̧chö̧ taʼanö Dios I̧huȩnȩ Isäʼtä päö cu̧huo̧juä̧chä̧cua̧jä̧. Iso päiʼönä cu̧huo̧juä̧cua̧jä̧ “oʼca juiyönä Huȩyu̧cuä̧ Huȩnȩ [Dios I̧huȩnȩ Isäʼtä päö] [...] adihuaʼa huo̧juȩcuä̧nä̧” (2 Timoteo 3:16).
Piʼtämä Dios I̧huȩnȩ Isäʼtä jö̧ taʼanö jo̧ca̧ʼa̧. Dios I̧huȩnȩ Isäʼtä päö cu̧huo̧jui̧ʼa̧ päʼötä ppädäcuaʼa. Ja̧ʼhua̧nö̧ ja̧ʼa̧ttö̧ huo̧jui̧cuä̧nä̧ versículo oʼca juiyönä räopö cucuocua päʼätöjä, ja̧ʼhua̧ta̧nö̧ ja̧u̧ versículo päö cu̧huo̧juä̧chö̧cu̧ pätetö topi.
TÄCUNÄ TU̧HUO̧JUÄ̧CHÄ̧TU̧CUA̧
Korotö ttö̧ja̧rö̧ Dios I̧huȩnȩ Isäʼtä tta̧ʼa̧nö̧ ppädäʼijaʼattö päʼöʼinä, piʼtä eseunu tucuocua päʼö däje jȩtö̧ʼa̧nö̧ ja̧ʼa̧ttö̧ päʼöʼinä, ka̧ra̧ tu̧huo̧juä̧chi̧ʼö̧nä̧ ppädomenä adihuä juäi iʼcächöʼa̧nö̧ ja̧ʼa̧ päʼöʼinä totätucua.
3. Dios I̧huȩnȩ Isäʼtämä oipä̧u̧jä̧
Dios I̧huȩnȩ Isäʼtämä lámpara adiu kä̧dȩpa̧ʼa̧ jä̧ʼi̧nö̧ʼa̧nö̧ ja̧ʼa̧, tu̧mä̧nä̧ adiu huäjunä kä̧dȩpa̧ʼa̧ tota päʼö. Jȩtä̧cuȩ adiu töʼojopa päʼö ppädöʼa̧nö̧ ja̧ʼa̧, ja̧ʼhua̧ta̧nö̧ täʼca ja̧ʼa̧cu̧ jähuä ʼcuäopä̧cuȩ tu̧huo̧jua̧ päʼöʼinä ppädaʼa.
Salmo 119:105 cucuocuätucu oʼcaʼa pi̧yȩ jähuäʼinä ucuocuäcuähuätucui:
-
Pi̧yȩ versículo huȩyu̧ti̧nö̧mä̧ Dios I̧huȩnȩ Isäʼtä ötöʼcö jähuä, ¿däje amöcuädinaʼattö?
-
Ucumä Dios I̧huȩnȩ Isäʼtä ötöʼcö jähuä, ¿däje cuamöcuädaʼattö?
4. Dios I̧huȩnȩ Isäʼtänä jätecu jähuä räopaʼa
Yajute isaju recuo a̧ʼȩ jo̧mȩnä̧ jäjecu jähuä kusinö Dios I̧huȩnȩ Isäʼtänä ka̧ʼa̧ päʼö po̧cui̧pi̧nä̧ju̧. VIDEO topätucui, ja̧u̧nu̧ oʼcaʼa pi̧yȩ jähuäʼinä ucuocuäcuähuätucui.
-
Isaju videonä räʼopäjumä, ¿däje jäjecuäʼinaʼattö?
-
Dios I̧huȩnȩ Isäʼtä ku̧huo̧jui̧ʼo̧mȩnä̧, ¿tocu ppädinaʼattö?
Dios I̧huȩnȩ Isäʼtä jiähuaʼa tu̧huo̧jua̧ pätömä jätepa päʼö ja̧ʼa̧. Mateo 7:7 cucuocuätucu oʼcaʼa pi̧yȩ jähuäʼinä ucuocuäcuähuätucui:
-
Ji̧yȩcu̧nä̧ jäcuhuecu jähuä Dios I̧huȩnȩ Isäʼtänä räopaʼa päʼö, ¿cuesetaʼa ja̧ʼa̧di̧? Ja̧ʼhua̧nö̧ jö̧ttö̧mä̧, ¿ti̧yȩ ja̧ʼa̧ttö̧?
5. Dios I̧huȩnȩ Isäʼtä tucuocuomenä teseunä jȩa̧ʼa̧
Recuätömä Dios I̧huȩnȩ Isäʼtä ucuocuäcuähuä köʼcätö, ppädaʼa päʼöʼinä topätö. VIDEO topätucui, ja̧u̧nu̧ oʼcaʼa pi̧yȩ jähuäʼinä ucuocuäcuähuätucui.
-
Möäyotö videonä räʼopätömä huȩyu̧cuä̧ ucuocuäcuähuä ötöʼcö jähuä, ¿däje ttamöcuädaʼattö?
-
Dios I̧huȩnȩ Isäʼtä ucuocuäcuähuämä koro cuyäruʼtättö i̧mi̧cu̧nä̧ ja̧ʼa̧ päʼö, ¿tocu päʼö pättaʼattö?
Dios I̧huȩnȩ Isäʼtämä ppädä̧u̧jä̧ ta̧ʼcua̧ tȩma̧ päʼöʼinä, tesetö eseunu tta̧tä̧ra̧ päʼöʼinä. Romanos 15:4 cucuocuätucu oʼcaʼa pi̧yȩ jähuäʼinä ucuocuäcuähuätucui:
-
Ta̧ʼcua̧ tȩma̧ päʼöʼinä, esetö tta̧tä̧ra̧ päʼöʼinä ppädö Dios I̧huȩnȩ Isäʼtänä ka̧cu̧ jähuä, ¿juhuaʼa yabocu cu̧huo̧juä̧cha̧ päcuhuaʼa?
6. Dios I̧huȩnȩ Isäʼtä jähuä ka̧ra̧ ppädaʼanä adiu tu̧huo̧juä̧chi̧ʼö̧ʼa̧nö̧ ja̧ʼa̧
Dios I̧huȩnȩ Isäʼtä katä ucuocuäcuähuä adiu ja̧ʼa̧nä̧ recuätömä ka̧ra̧ ppädaʼanä ttu̧huo̧juä̧cho̧mȩnä̧ adiu ppädaʼa päʼö topäʼijätö. Hechos 8:26-31 cucuocuätucu oʼcaʼa pi̧yȩ jähuäʼinä ucuocuäcuähuätucui:
-
Dios I̧huȩnȩ Isäʼtänä päö adiu tu̧huo̧juä̧chi̧ʼa̧ päʼömä, ¿däje recuä rö̧ja̧ʼa̧ttö̧? (Versículos 30, 31ʼinä topätucui).
Etiopía rȩjȩ ttö̧ja̧ i̧sa̧mä̧ ka̧ra̧ ppädarö päʼö recuä rö̧ji̧nä̧cu̧ Huȩyu̧cuä̧ Huȩnȩ u̧huo̧juä̧chi̧ʼa̧ päʼömä. Jitä pä̧nä̧ʼi̧nä̧ recuätörö ppädäʼijaʼa Dios I̧huȩnȩ Isäʼtä ka̧ra̧ ppädaʼanä ttu̧huo̧juä̧cho̧mȩnä̧.
YOTÖCUNÄ PÄʼÄTÖ: “Dios I̧huȩnȩ Isäʼtä huo̧jui̧cuä̧mä̧ rö̧ȩnä̧ ppädocaʼa”.
-
Ucumä, ¿däje päcuhuaʼattö? ¿Tocu päʼö?
CA̧CA̧TI̧PÖ̧ UCUOCUÄCUÄHUÄ
Dios I̧huȩnȩ Isäʼtä jiähuaʼa oicuä huȩnȩ mo̧ro̧ jö̧ taʼanö eseu tö̧ja̧ päʼö ppädöʼa̧nö̧ jö̧. Ja̧ʼhua̧ta̧nö̧ jätecu rö̧ȩnä̧ micuäuʼinä ädätaʼa, ta̧ʼcua̧ tȩma̧ päʼöʼinä, esetö tta̧tä̧ra̧ päʼö ppädöʼa̧nö̧ jö̧ʼi̧nä̧ ka̧ʼa̧.
Cu̧huo̧juä̧chä̧ji̧ jiʼähui
-
Oicuä huȩnȩ Dios I̧huȩnȩ Isäʼtänä räopömä, ¿ti̧yȩ ja̧ʼa̧ttö̧?
-
Jättecu jähuättö Dios I̧huȩnȩ Isäʼtä, ¿ti̧yȩ ädätaʼattö?
-
Ucuʼinä Dios I̧huȩnȩ Isäʼtänä, ¿däje cu̧huo̧juä̧cha̧ päcuhuaʼattö?
KOROʼINÄ KA̧ʼA̧
Dios I̧huȩnȩ Isäʼtänä oicuä huȩnȩ ka̧cu̧ jitä pä̧nä̧ tocu jö̧nä̧ ppädaʼattö päʼö huo̧juä̧chi̧.
Ya̧tȩ ubo a̧ʼu̧cuä̧i̧ttö̧ päiʼönä micuähuocösä päʼö amöcuädö juiya päʼö juruhuächinörö, Dios I̧huȩnȩ Isäʼtä tta̧ʼa̧nö̧ ppädinaʼattö päʼö topi.
Ttamönä ttahuaruhuäcu eseu ttö̧ja̧ päʼö ppädöʼa̧nö̧ jö̧ oicuä huȩnȩ Dios I̧huȩnȩ Isäʼtänä räopö huo̧jui̧pi̧.
“12nö jähuä ppädöʼa̧nö̧ jö̧ ttamönä ttahuaruhuäcu eseu ttö̧ja̧ päʼö” (¡Despertad!, núm. 2 2018)
Pi̧jä̧nä̧ di hueaʼattö päʼö iso päiʼöna huȩnȩ Dios I̧huȩnȩ Isäʼtänä jiäu topi.
¿Tta̧ʼa̧nö̧ päʼö tu̧huo̧jui̧ʼa̧ päʼö ja̧ʼa̧ttö̧ Dios I̧huȩnȩ Isäʼtämä?(Oʼca juiyö video) (3:14)
