HUO̧JUI̧CUÄ̧ 04
¿Dijä̧ttö̧ Diosmä?
Ttö̧ja̧ i̧sa̧ ö̧ji̧no̧mȩttö̧ kä̧mä̧dö̧ recuätömä ttö̧ä̧nä̧hua̧tö̧rö̧ ucuo teʼähuäʼijätö. Ja̧ʼhua̧nö̧ ja̧ʼa̧nä̧ Dios I̧huȩnȩ Isäʼtänä jiähuaʼa ya̧tȩ Ttö̧ä̧nä̧hua̧ ötöʼcö “korotö ttö̧ä̧nä̧hua̧tö̧ttö̧ʼi̧nä̧ ttuhuämenä hua̧rö̧” (2 Crónicas 2:5). Pidemä, ¿di ja̧ʼa̧ttö̧? ¿Tocu päʼö korotö ttö̧ä̧nä̧hua̧tö̧ttö̧ʼi̧nä̧ ttuhuämenä hua̧ ja̧ʼa̧ttö̧? Pi̧yȩ cu̧huo̧jua̧ päʼö pi̧yȩ huo̧jui̧cuä̧nä̧ huo̧juä̧chi̧.
1. Diosmä, ¿tta̧ʼa̧nö̧ mi̧cua̧ʼa̧ttö̧? I̧mi̧ tu̧huo̧jua̧ päʼö pä̧huä̧ rö̧jä̧cu̧ päʼö, ¿däjenä i̧jȩpa̧ʼa̧ttö̧?
Chutä I̧huȩnȩ Isäʼtänä jiähuä̧u̧jä̧: “Ttötä ja̧ʼa̧ Jeohuamä. Pi̧yȩ ja̧ʼa̧ chi̧mi̧mä̧” (Isaías 42:5, 8 ucuocui). Hebreos ttö̧ja̧ tti̧huȩnȩttö̧ ȩmö̧, Jeohua päʼö ti̧huȩnȩnä̧ räʼepö icuähuaʼa. Rö̧ȩnä̧ huo̧juä̧tö̧ päʼätö pi̧yȩ pähuächaʼa: “oʼca juiyö Churutä pä̧huä̧ rö̧jö̧ ʼcuäopa päʼö jȩpö̧” päʼö. Jeohua pä̧huä̧ rö̧jä̧cu̧ i̧mi̧ tu̧huo̧jua̧ päʼö (Éxodo 3:15). ¿Tta̧ʼa̧nö̧ tu̧huo̧jua̧ʼa̧ttö̧? Chutä I̧huȩnȩ Isäʼtänä 7.000nö jo̧mȩnä̧ abonänö tti̧huȩyu̧tu̧nä̧ jȩi̧na̧ʼa̧ttö̧. a “Pi̧jä̧ rȩjȩttö̧ʼi̧nä̧, mo̧ro̧jä̧ra̧ʼa̧ttö̧ʼi̧nä̧ iso päiʼönä Ttö̧ä̧nä̧hua̧mä̧” Jeohua päʼö mi̧cua̧ (Deuteronomio 4:39).
2. Jeohua ötöʼcö jähuä Chutä I̧huȩnȩ Isäʼtänä, ¿däje jiähuaʼattö?
Dios I̧huȩnȩ Isäʼtänä päaʼa ttö̧ä̧nä̧hua̧tö̧ jö̧nä̧ tottä̧u̧ttu̧ iso päiʼönä Chu ä̧cua̧ Ttö̧ä̧nä̧hua̧mä̧ Jeohua ja̧ʼa̧. ¿Tocu päʼö? Huäjunä i̧jȩcuä̧chö̧ ka̧cu̧nä̧ totaʼattö. Jeohuatä ja̧ʼa̧ “oʼca juiyö pi̧jä̧ rȩjȩttö̧ Juʼtoju Ru̧hua̧mä̧” (Salmo 83:18 ucuocui). Ja̧u̧tä̧ ja̧ʼa̧ “Oʼca juiyönä ju̧ru̧hua̧mä̧”. Rö̧ȩnä̧ ujuruhuaʼattö oʼca juiyö Churutä pä̧huä̧ rö̧jö̧ jȩö̧ʼa̧nö̧ ja̧ʼa̧. “Oʼca juiyönä” uhuäbeʼinö mo̧ro̧jä̧ra̧ʼa̧ ka̧cu̧ʼi̧nä̧, pi̧jä̧ rȩjȩnä̧ ka̧cu̧ʼi̧nä̧ (Apocalipsis 4:8, 11). Ja̧ʼhua̧ta̧nö̧ Jeohuatä ja̧ʼa̧ ʼcuäopönä kä̧ʼi̧jö̧mä̧, ʼcuäopönä ö̧jä̧cua̧mä̧ (Apocalipsis 1:8).
TÄCUNÄ TU̧HUO̧JUÄ̧CHÄ̧TU̧CUA̧
Tu̧huo̧juä̧chä̧tu̧cua̧ Tö̧ä̧nä̧hua̧ i̧mi̧ʼi̧nä̧, aditähuä i̧mi̧ʼi̧nä̧ däjenä i̧mi̧cu̧nä̧ ja̧ päʼö. Ja̧u̧tä̧ jö̧ taʼanö mi̧cua̧mä̧ ka̧ra̧ toaʼa. Ja̧ʼhua̧ta̧nö̧ i̧mi̧ tu̧huo̧juä̧cha̧ päʼö tta̧ʼa̧nö̧ jȩä̧ʼi̧ja̧ʼa̧ttö̧ päʼöʼinä, tocu päʼö i̧mi̧ tu̧huo̧jua̧rö̧ päʼö pä̧huä̧ rö̧jä̧cu̧ päʼöʼinä totätucua.
3. Dios aditähuä i̧mi̧ u̧ju̧nä̧ra̧ʼa̧nä̧, Chutä amönä i̧mi̧ ku̧nä̧rö̧
Ya̧tȩ aditähuä i̧mi̧ʼi̧nä̧, amönä i̧mi̧ʼi̧nä̧ i̧mi̧cu̧nä̧ ja̧ʼa̧. VIDEO topätucui, ja̧u̧nu̧ oʼcaʼa pi̧yȩ jähuäʼinä ucuocuäcuähuätucui:
-
Huo̧juȩcuä̧ i̧sa̧ päʼömä, ¿ya̧tȩ aditähuättötä i̧mi̧ ja̧ʼa̧di̧? ¿Chutä i̧mi̧ ja̧ʼa̧di̧? ¿Däjenä i̧mi̧cu̧nä̧ ja̧ʼa̧ttö̧?
Dios I̧huȩnȩ Isäʼtänä jiähuaʼa recuätömä ttö̧ä̧nä̧hua̧tö̧ jö̧nä̧ tottä̧u̧ru̧ ucuo teʼähuätö päʼö. 1 Corintios 8:5, 6 cucuocuätucu oʼcaʼa pi̧yȩ jähuäʼinä ucuocuäcuähuätucui:
-
Iso päiʼönä Chu ä̧cua̧ Ttö̧ä̧nä̧hua̧mä̧, ¿dijä̧ttö̧?
4. Jeohuamä pä̧huä̧ rö̧jä̧cu̧ i̧mi̧ cu̧huo̧jua̧ päʼöʼinä, i̧mi̧nä̧ ocuhuarö päʼöʼinä
Jeohua Chutä i̧mi̧ cu̧huo̧jua̧rö̧ päʼö pä̧huä̧ rö̧jä̧cu̧ päʼö, ¿tta̧ʼa̧nö̧ tu̧huo̧jua̧ʼa̧ttö̧? VIDEO topätucui, ja̧u̧nu̧ oʼcaʼa pi̧yȩ jähuäʼinä ucuocuäcuähuätucui:
-
Jeohua Chutä i̧mi̧ ttu̧huo̧jua̧ päʼö pä̧huä̧ rö̧jä̧cu̧ päʼö, ¿cuamöcuädaʼa ja̧ʼa̧di̧? ¿Tocu päʼö ja̧ʼhua̧nö̧ päcuhuaʼattö?
Jeohuamä pä̧huä̧ rö̧jä̧cu̧ i̧mi̧nä̧ ottarö päʼö. Mateo 6:9; Romanos 10:13 cucuocuätucu oʼcaʼa pi̧yȩ jähuäʼinä ucuocuäcuähuätucui:
-
Tö̧ä̧nä̧hua̧ i̧mi̧ Jeohua päʼö otarö päʼömä, ¿tocu päʼö rö̧ȩnä̧ micuähuaʼattö?
-
Ya̧tȩ cui̧mi̧nä̧ oʼomenä, ¿tta̧ʼa̧nö̧ päcuhuiʼaʼattö?
-
Tö̧ä̧nä̧hua̧ i̧mi̧nä̧ Jeohua päʼö ocuhuomenä, ¿tta̧ʼa̧nö̧ päiʼaʼattö?
5. Jeohua pä̧huä̧ rö̧jä̧cu̧ Chutä a̧hua̧ru̧hua̧ päcuhuiʼa päʼö
Camboya rȩjȩ ttö̧ja̧ isaju Soten päʼö micuaju päʼäju Tö̧ä̧nä̧hua̧ i̧mi̧ tu̧huo̧juä̧cho̧mȩnä̧ korottöʼinä abonänö juiyo adihuaʼa päʼö. VIDEO topätucui, ja̧u̧nu̧ oʼcaʼa pi̧yȩ jähuäʼinä ucuocuäcuähuätucui:
-
Videonä totäji taʼanö, Sotenrö Tö̧ä̧nä̧hua̧ i̧mi̧ ku̧huo̧juä̧cho̧mȩnä̧, ¿tta̧ʼa̧nö̧ ppädinäcua ja̧ʼa̧ttö̧?
Ya̧tȩ a̧hua̧ru̧hua̧ päcuhuiʼäcuaʼa äʼcanä, chutä i̧mi̧ huo̧juä̧chö̧jä̧. Santiago 4:8a cucuocuätucu oʼcaʼa pi̧yȩ jähuäʼinä ucuocuäcuähuätucui:
-
Jeohuarö, ¿däje pä̧huä̧ rö̧ja̧ʼa̧ttö̧ ucu jȩcu̧ʼa̧ päʼömä?
-
Tö̧ä̧nä̧hua̧ i̧mi̧ cu̧huo̧juä̧cho̧mȩnä̧ʼi̧nä̧, i̧mi̧nä̧ ocuhuomenäʼinä, ¿Churutä cutöʼcöhuächönä ppädaʼa ja̧ʼa̧di̧? ¿Tocu päʼö?
YOTÖCUNÄ PÄʼÄTÖ: “Diosmä ya̧tȩtä̧ ja̧ʼa̧. I̧mi̧nä̧ otöttöʼinä huäinä ja̧ʼa̧”.
-
Ttö̧ä̧nä̧hua̧ i̧mi̧mä̧ Jeohua ja̧ʼa̧ päʼö, ¿cuamöcuädaʼa ja̧ʼa̧di̧?
-
Tö̧ä̧nä̧hua̧mä̧ i̧mi̧nä̧ otarö päʼö pä̧huä̧ rö̧jä̧cu̧ päʼö, ¿tta̧ʼa̧nö̧ jicuhuäuʼa̧nö̧ ja̧ʼa̧ttö̧ korotörömä?
CA̧CA̧TI̧PÖ̧ UCUOCUÄCUÄHUÄ
Iso päiʼönä Ttö̧ä̧nä̧hua̧ i̧mi̧mä̧ Jeohua ja̧ʼa̧. Ja̧u̧mä̧ pä̧huä̧ rö̧jä̧cu̧ i̧mi̧ tu̧huo̧jua̧rö̧ päʼöʼinä, i̧mi̧nä̧ otarö päʼöʼinä Chutä ahuaruhuä pätiʼäcuaʼa̧nö̧.
Cu̧huo̧juä̧chä̧ji̧ jiʼähui
-
Oʼca toiʼönä ttö̧ä̧nä̧hua̧tö̧ttö̧ Jeohuamä, ¿däjenä i̧mi̧cu̧nä̧ hua̧ ja̧ʼa̧ttö̧?
-
Tö̧ä̧nä̧hua̧ i̧mi̧nä̧, ¿tocu päʼö otarö päʼö ja̧ʼa̧ttö̧?
-
Jeohuamä, ¿Chutä a̧hua̧ru̧hua̧ päcuhuiʼa päaʼa ja̧ʼa̧di̧? ¿Tta̧ʼa̧nö̧ cu̧huo̧jua̧ʼa̧ttö̧?
KOROʼINÄ KA̧ʼA̧
Dios iso päiʼönä kö̧ päʼö 5nö jähuä huo̧juä̧chi̧.
“Dios, ¿iso päiʼönä kö̧ ja̧ʼa̧di̧?” (jw.org internet isojättö huo̧jui̧cuä̧)
Dios ʼcuäopönä kä̧ʼi̧jö̧ päʼö adiu pätecuächö huȩnȩ huo̧juä̧chi̧.
“Diosrö, ¿di uhuäbeʼinaʼattö?” (To̧pä̧rö̧ Jiähuäʼtä, agosto 1, 2014)
Ttö̧ä̧nä̧hua̧ i̧mi̧ hebreos ttö̧ja̧ ottinö taʼanö oähuä tieruhuaʼanä, Chutä i̧mi̧nä̧ ota päʼö tocu päʼö rö̧ȩnä̧ micuähuaʼattö päʼö huo̧juä̧chi̧.
“¿Dijä̧ttö̧ Jeohuamä?” (jw.org internet isojättö huo̧jui̧cuä̧)
Ttö̧ä̧nä̧hua̧ i̧mi̧nä̧ i̧mi̧cu̧nä̧ otöttöʼinä, ¿huäinä ja̧ʼa̧ pätöʼa̧nö̧ ja̧ʼa̧di̧? Tocu päʼö Chutä amönä i̧mi̧ ku̧nä̧rö̧ pätaʼattö päʼö huo̧juä̧chi̧.
“Diosmä, ¿rö̧ȩnä̧ i̧mi̧ ku̧nä̧rö̧ ja̧ʼa̧di̧?” (jw.org internet isojättö huo̧jui̧cuä̧)
a La Biblia. Traducción del Nuevo Mundo micuäʼtättö apéndice A4 säbäräri tti̧huȩnȩnä̧ ji̧nä̧ isocu cu̧huo̧juä̧chö̧ʼa̧nö̧ ja̧ʼa̧ Ttö̧ä̧nä̧hua̧ i̧mi̧ pähuächö jähuä, ja̧ʼhua̧ta̧nö̧ tocu päʼö ji̧yȩcu̧nä̧ Dios I̧huȩnȩ oʼtänä Ttö̧ä̧nä̧hua̧ i̧mi̧ siʼepö tticuäʼijaʼattö päʼöʼinä.
