Jeohua rö̧ȩnä̧ micuäu iyinä̧u̧jä̧: Chutä I̧huȩnȩ Isäʼtä. Piʼtämä yiʼtätetä ja̧ʼa̧nä̧ 66nö cuyäruʼtänä ʼquȩʼȩcua̧ʼa̧. Ja̧ʼhua̧nö̧ ja̧ʼa̧nä̧ jäcuhuecuʼa̧nö̧ ja̧ʼa̧ a̧ʼcua̧ra̧ʼa̧: “¿Tottö ichinaʼattö Dios I̧huȩnȩ Isäʼtämä? Piʼtä u̧ru̧hua̧mä̧, ¿iso päiʼönä Dios ja̧ʼa̧di̧?”. Pi̧yȩ jäecuä tädäta päʼömä totätucua Dios ujuturu jiähua päö huȩnȩmä̧ tocu jö̧nä̧ jitä jubö pä̧nä̧ʼi̧nä̧ ka̧ʼa̧ttö̧ päʼö.

1. Dios I̧huȩnȩ Isäʼtä pi̧jä̧ ttö̧ja̧ tti̧huȩyu̧ti̧na̧ʼa̧ jö̧ttö̧mä̧, ¿tocu päʼö pätaʼattö Dios juhuäʼtä U̧ru̧hua̧ ja̧ʼa̧ päʼömä?

40nö huotö u̧mä̧tö̧—ttaditähuä i̧mi̧cu̧nä̧ ku̧nä̧rä̧tö̧, usurä isotö, ruhuotöʼinä—Dios I̧huȩnȩ Isäʼtä huȩyu̧ti̧nä̧tö̧. 1513 a̧ʼȩnä̧ Jesús uhuäpächäcuaʼa äʼcanä huȩyu̧tu̧ kä̧mä̧di̧nä̧tö̧, cäʼädinätö Jesús uhuäpächinö oʼcaʼa a̧ʼȩ 98nä. Ja̧ʼhua̧nö̧ ja̧ʼa̧ttö̧ Dios I̧huȩnȩ Isäʼtä tti̧huȩyu̧ta̧ päʼömä 1.600 a̧ʼȩ ʼcuäoiʼönä ji̧na̧ʼa̧. Ja̧ʼhua̧nö̧ ja̧ʼa̧nä̧ Dios I̧huȩnȩ Isäʼtä U̧ru̧hua̧mä̧ Jeohua ja̧ʼa̧ttö̧ toʼojicu päocaʼa (1 Tesalonicenses 2:13 ucuocui). Pitö u̧mä̧tö̧mä̧ jitötä ttamöcuädö huȩyu̧to̧co̧tö̧ pi̧nä̧tö̧. Pärocuaʼacu, “Espíritu Santo huo̧juȩcuä̧nä̧ jiʼähuinätödo” (2 Pedro 1:21). a Diosmä espíritu santonä pitö u̧mä̧tö̧ Chutä amöcuädö tti̧huȩyu̧ta̧ päʼö jȩpi̧nö̧ (2 Timoteo 3:16).

2. Dios I̧huȩnȩ Isäʼtä, ¿titö ttu̧ju̧nä̧rö̧ʼa̧nö̧ ja̧ʼa̧ttö̧?

Ttö̧ja̧ “ko̧ro̧jä̧ tti̧rȩjä̧nä̧ ka̧cuä̧tö̧rö̧ʼi̧nä̧, pi̧jä̧ pa̧ja̧cu̧nä̧ ttö̧ja̧rö̧ʼi̧nä̧, tti̧huȩnȩ pö̧nä̧ ucuocuätöröʼinä, oʼca juiyönä ötahuiyä ttö̧ja̧rö̧ʼi̧nä̧” Dios I̧huȩnȩ Isäʼtä adihuä huȩnȩ jiäumä ppädöʼa̧nö̧ ja̧ʼa̧ (Apocalipsis 14:6 ucuocui). Diosmä jȩpä̧ʼi̧jö̧ korotö tti̧huȩnȩ pö̧nä̧ rö̧ȩnä̧ rättepa päʼö. Mo täbocöttö päiʼönä jitä pä̧nä̧ jubö Dios I̧huȩnȩ Isäʼtämä koro cuyäru oʼtättöʼinä abonänö rö̧ȩnä̧ tti̧huȩnȩ pö̧nä̧ räʼepö icuähuäʼijaʼa. Ja̧ʼhua̧nö̧ ja̧ʼa̧ttö̧ pi̧jä̧ pa̧ja̧cu̧nä̧ tti̧huȩnȩ pö̧nä̧ ucuocuätömä Dios I̧huȩnȩ Isäʼtä päö huȩnȩ ttu̧huo̧ju̧ʼa̧nö̧ ja̧ʼa̧.

3. Jeohuamä Chutä I̧huȩnȩ Isäʼtä, ¿tocu jö̧nä̧ tta̧huä̧ri̧na̧ʼa̧ttö̧?

Dios I̧huȩnȩ Isäʼtämä jurunä pparuhuächö juäinä huȩyu̧cui̧na̧ʼa̧. To̧rä̧huä̧ obamä isotö tti̧jȩti̧yu̧ttu̧ʼi̧nä̧, papiro päʼö micuäittöʼinä adicuä ji̧na̧ʼa̧. Ja̧ʼhua̧nö̧ ja̧ʼa̧ttö̧ yotöte Dios I̧huȩnȩ Isäʼtä repeʼätömä pi̧yȩ jähuättö ttu̧ȩcuä̧nä̧ jȩpö̧ boʼepinätö. Recuätö ruhuonä hueʼätöʼinä, iglesia ʼchu̧ä̧rä̧cuä̧huä̧ ttö̧ja̧ tturuhuotöʼinä siʼepö tticua päʼö jȩttä̧ʼchi̧na̧ʼa̧nä̧, Dios I̧huȩnȩ Isäʼtä repeʼätömä tta̧ʼcua̧rö̧ ra̧huȩpi̧jo̧mȩ päteʼö ja̧ʼa̧nä̧ piʼtä tta̧ttä̧ra̧ päʼö juruhuächinätö. Jeohuamä Chutä I̧huȩnȩ tucuocu juiyönä korotö jȩtta̧ʼa̧nä̧ jaropocö päʼijö. Dios I̧huȩnȩ Isäʼtä päaʼa: “Ja̧ʼhua̧nö̧ ja̧ʼa̧nä̧ʼi̧nä̧ Tu̧ru̧hua̧ i̧huȩnȩ yoröiso beipächocö” (1 Pedro 1:25).

 TÄCUNÄ TU̧HUO̧JUÄ̧CHÄ̧TU̧CUA̧

5. Dios I̧huȩnȩ Isäʼtä siʼepö tticua päʼö jȩttä̧ʼcha̧ʼa̧nä̧ʼi̧nä̧ ki̧ʼi̧na̧ʼa̧

 6. Oʼca toiʼönä ttö̧ja̧rö̧ iyähuiʼäʼtä

Mo täbocöttö päiʼönä Dios I̧huȩnȩ Isäʼtämä rö̧ȩnä̧ ttiyäʼchäʼijäʼtä, korotö tti̧huȩnȩnä̧ʼi̧nä̧ räʼepö tticuäʼijäʼtä. Hechos 10:34, 35 cucuocuätucu oʼcaʼa pi̧yȩ jähuäʼinä ucuocuäcuähuätucui:

• ¿Tocu päʼö Diosrömä pä̧huä̧ rö̧ja̧ʼa̧ttö̧ Chutä I̧huȩnȩ Isäʼtä recuätö tti̧huȩnȩnä̧ räʼepö tticua päʼöʼinä, ttiyäʼcha päʼöʼinä?

• Dios I̧huȩnȩ Isäʼtättö, ¿däje cujöʼcönä ja̧ʼa̧ttö̧?

 CA̧CA̧TI̧PÖ̧ UCUOCUÄCUÄHUÄ

Dios I̧huȩnȩ Isäʼtänä iso päiʼönä Chutä amöcuädö ka̧ʼa̧. Ja̧u̧mä̧ oʼca toiʼönä pi̧jä̧ ttö̧ja̧ juhuäʼtä ttu̧ju̧nä̧ra̧ päʼö jȩpä̧ʼi̧jö̧.

Cu̧huo̧juä̧chä̧ji̧ jiʼähui

• Dios I̧huȩnȩ Isäʼtä pi̧jä̧ ttö̧ja̧ tti̧huȩyu̧ti̧na̧ʼa̧ jö̧ttö̧mä̧, ¿tocu päʼö pätaʼattö Diosmä juhuäʼtä U̧ru̧hua̧ ja̧ʼa̧ päʼömä?

• Dios I̧huȩnȩ Isäʼtä siʼepö tticua päʼö jȩttä̧ʼchi̧na̧ʼa̧nä̧ jitä jubö ka̧ʼa̧ tocuʼomenä, ¿tta̧ʼa̧nö̧ päcuhuiʼönä ja̧ʼa̧ttö̧? Ja̧ʼhua̧ta̧nö̧ tti̧huȩnȩ pö̧nä̧ räʼepö icuähuäʼijaʼa päʼöʼinä, rö̧ȩnä̧ ttiyäʼchäʼtä ja̧ʼa̧ päʼöʼinä cu̧huo̧juä̧chi̧ʼo̧mȩnä̧, ¿däje cuamöcuädönä jȩa̧ʼa̧ttö̧?

• Dios ucucu ucuocua päʼö oʼca juiyö jȩä̧ʼi̧jö̧ cu̧huo̧juä̧chi̧ʼo̧mȩnä̧, ¿tta̧ʼa̧nö̧ päcuhuiʼönä ja̧ʼa̧ttö̧?