HUO̧JUI̧CUÄ̧ 06
Tta̧ʼcua̧rö̧mä̧, ¿tocu kä̧mä̧di̧na̧ʼa̧ttö̧?
Tö̧ä̧nä̧hua̧tä̧ “tujuru iyö tö̧ja̧cua̧ päʼö” (Hechos 17:28). ¿Pi̧yȩ cuesetaʼa ja̧ʼa̧di̧? Yotöcunä päʼätö tta̧ʼcua̧rö̧ ja̧ʼa̧tä̧ kä̧mä̧di̧na̧ʼa̧ päʼö, Uhuäbeʼäcuähuä I̧sa̧ toaʼa päʼö. Jahuätö ttamöcuädö iso päiʼönä jö̧ttö̧mä̧ ta̧ʼcua̧rö̧ʼi̧nä̧, tö̧jö̧ʼi̧nä̧ ja̧ʼa̧tä̧ jö̧ʼa̧nö̧ ja̧ʼa̧. Ja̧ʼhua̧nö̧ ja̧ʼa̧nä̧ Jeohua ta̧ʼcua̧rö̧ iyinöttömä ja̧ʼa̧tä̧ra̧ʼa̧ amöcuädö jȩpo̧cö̧ pi̧nö̧, ¿isodi̧? a Tta̧ʼcua̧rö̧ kä̧mä̧di̧nö̧ ötöʼcö jähuäʼinä, tocu päʼö adiu pätecuächaʼattö päʼöʼinä huo̧juä̧chi̧ Dios I̧huȩnȩ Isäʼtä jiäu huȩnȩcu̧.
1. Oʼca juiyö mo̧ro̧jä̧ra̧ʼa̧ ka̧cu̧ʼi̧nä̧, pi̧jä̧ rȩjȩnä̧ ka̧cu̧ʼi̧nä̧, ¿tocu kä̧mä̧di̧na̧ʼa̧ttö̧?
Recuätö científicos huotö päʼätödo oʼca juiyö mo̧ro̧jä̧ra̧ʼa̧ ka̧cu̧ʼi̧nä̧, pi̧jä̧ rȩjȩnä̧ ka̧cu̧ʼi̧nä̧ kä̧mä̧di̧nö̧ ja̧ʼa̧ päʼö. Dios I̧huȩnȩ Isäʼtänäʼinä päaʼa: “Kä̧mä̧di̧no̧mȩttö̧ Tö̧ä̧nä̧hua̧mä̧ pi̧jä̧ rȩjȩʼi̧nä̧, mo̧ro̧jä̧ʼi̧nä̧ uhuäbeʼinödo” (Génesis 1:1). ¿Tocu uhuäbeʼinaʼattö Diosmä? Chutä ujuru a̧di̧tä̧ra̧ʼa̧nä̧ (öäre espíritu santonä) jȩpi̧nö̧ oʼca juiyönä mo̧ro̧jä̧ra̧ʼa̧ ka̧cu̧ʼi̧nä̧, pi̧jä̧ rȩjȩnä̧ ka̧cu̧ʼi̧nä̧ adita päʼömä: galaxias pättö, si̧ri̧ʼcö̧, ti̧rȩjä̧ba jö̧ taʼanö jö̧ʼi̧nä̧ (Génesis 1:2).
2. Tö̧ä̧nä̧hua̧mä̧ rȩjȩ uhuäbeʼomenä, ¿tocu päʼö jȩi̧na̧ʼa̧ttö̧?
Jeohuamä rȩjȩ uhuäbeʼinö “pi̧jä̧ oʼca juiyönä ttö̧ja̧cua̧ päʼö” (Hechos 17:26). Ja̧u̧mä̧ pi̧jä̧ rȩjȩ aditinö adihuome jö̧nä̧ eseu tö̧ja̧ päʼö, recuä rö̧jö̧ ku̧nä̧rö̧ ʼcuäopönä tö̧ja̧ päʼöʼinä (Hechos 17:25; Apocalipsis 4:11 ucuocui). Científicos huotö päʼätö ti̧rȩjä̧banätä recuä rö̧jö̧ ka̧ʼa̧ ttö̧ja̧ ttö̧ja̧cua̧ päʼömä.
3. Ttö̧ja̧mä̧ isotöttöʼinä, ¿tocu päʼö i̧mi̧cu̧nä̧ huotö ja̧ʼa̧ttö̧?
Pi̧jä̧ rȩjȩ aditäji oʼcaʼa Jeohuamä dauhuiyäʼinä, isotöröʼinä uhuäbeʼinö. Ja̧u̧nu̧ oʼcaʼa “Tö̧ä̧nä̧hua̧ ttö̧ja̧rö̧ aditö kä̧mä̧di̧nö̧ Chutä jö̧ taʼanö huotörö” (Génesis 1:27 ucuocui). Ttö̧ja̧mä̧ isotöttöʼinä, ¿tocu päʼö i̧mi̧cu̧nä̧ huotö taʼattö? Tö̧ä̧nä̧hua̧mä̧ Chutä jö̧ taʼanö huotö ta päʼö uhuäbeʼinaʼattö öadihuä ti̧jȩpö̧ʼa̧nö̧ ja̧ʼa̧: repeäcuähuäʼinä, jueönä jȩä̧cuä̧huä̧ʼi̧nä̧. Ja̧ʼhua̧ta̧nö̧ huo̧juä̧huä̧ tu̧ju̧nä̧rö̧nä̧ jȩpi̧nö̧ korotö tti̧huȩnȩ tu̧huo̧jui̧ʼa̧ päʼö, adihuä juäi topö köʼcächiʼönö tota päʼö, música tä̧ju̧cuo̧mȩnä̧ tesehua päʼöʼinä. Ja̧ʼhua̧ta̧nö̧ isotöttöʼinä i̧mi̧cu̧nä̧ huotöjä Uhuäbeʼäcuähuä I̧sa̧rö̧ ucuo tetäuʼa̧nö̧ ja̧ʼa̧ttö̧.
TÄCUNÄ TU̧HUO̧JUÄ̧CHÄ̧TU̧CUA̧
Ji̧yȩcu̧nä̧ huäjunä i̧jȩcuä̧chö̧nä̧ totätucua Tö̧ä̧nä̧hua̧mä̧ oʼca juiyö pi̧jä̧nä ka̧cu̧ adiu amöcuädö uhuäbeʼinö päʼöʼinä, tocu päʼö Dios I̧huȩnȩ Isäʼtänä jiäucu adiu pätecuächaʼattö päʼöʼinä. Ja̧ʼhua̧ta̧nö̧ tu̧huo̧juä̧chä̧tu̧cua̧ ttö̧ja̧ ttöadihuä tti̧jȩpö̧ttö̧ Tö̧ä̧nä̧hua̧ ötöʼcö jähuä däje huo̧juȩta̧ʼa̧ ja̧ päʼö.
4. Oʼca juiyö pi̧jä̧nä̧ ka̧cu̧ ya̧tȩ adiu amöcuädö aditinö
Ttö̧ja̧mä̧ uhuäbeʼäcuähuä topötä adiu amöcuädö koro juäi ttaditomenä korotö eseu tottä̧u̧. Ja̧ʼhua̧nö̧ ja̧ʼa̧nä̧ iso päiʼönä Uhuäbeʼinörö, ¿ttesehuaʼa ja̧ʼa̧di̧? VIDEO topätucui, ja̧u̧nu̧ oʼcaʼa pi̧yȩ jähuäʼinä ucuocuäcuähuätucui:
-
Ttö̧ja̧mä̧ uhuäbeʼäcuähuä topötä, ¿däje koro juäi ttaditäʼijaʼattö?
Isode ka̧ päʼömä ya̧tȩ adiu amöcuädö aditödo. Ja̧ʼhua̧nö̧ ja̧ʼa̧nä̧, oʼca juiyö uhuäbeʼäcuähuä ka̧ päʼömä, ¿di adiu amöcuädö aditinaʼattö? Hebreos 3:4 cucuocuätucu oʼcaʼa pi̧yȩ jähuäʼinä ucuocuäcuähuätucui:
-
Tö̧ä̧nä̧hua̧ uhuäbeʼinö jähuättö, ¿däje cujöʼcönä tocuʼaʼattö?
-
Oʼca juiyö mo̧ro̧jä̧ra̧ʼa̧ ka̧cu̧ʼi̧nä̧, pi̧jä̧nä̧ ka̧cu̧ʼi̧nä̧ ya̧tȩ adiu amöcuädö jȩi̧na̧ʼa̧ päʼö, ¿cuamöcuädaʼa ja̧ʼa̧di̧? ¿Tocu päʼö?
¿Cu̧huo̧juä̧ʼi̧ja̧ʼa̧?
jw.org internet isojänä huo̧jui̧cuä̧ʼi̧nä̧, videoʼinä pi̧yȩ ötöʼcö jähuä jiähuaʼa cu̧ʼo̧cui̧ʼä̧cua̧jä̧. Todeunä jö̧nä̧ “¿Ya̧tȩ adiu amöcuädö jȩi̧na̧ʼa̧ ja̧ʼa̧di̧?”, “Tta̧ʼcua̧rö̧ kä̧mä̧di̧nö̧ huȩnȩ ötöʼcö pättö” päomeʼinä usi.
“Isodemä aditö toönämä adicuocödo. Ja̧ʼhua̧nö̧ ja̧ʼa̧nä̧ Dios oʼca juiyönä ka̧cu̧mä̧ aditinödo”.
5. Tö̧ä̧nä̧hua̧ uhuäbeʼinö huȩnȩ Chutä I̧huȩnȩ Isäʼtänä jiäu taʼanö adiu pätecuächaʼa
Génesis capítulo 1nä, Dios I̧huȩnȩ Isäʼtänä jiähuaʼa pi̧jä̧ rȩjȩnä̧ʼi̧nä̧, ju̧huä̧jä̧nä̧ oʼca juiyö ka̧cu̧ʼi̧nä̧ kä̧mä̧di̧nö̧ huȩnȩ. ¿Iso päiʼönä ʼcuäopinaʼa ja̧ʼa̧di̧? ¿Amönä ttucuocu huȩnȩ ja̧ʼa̧di̧? VIDEO topätucui, ja̧u̧nu̧ oʼcaʼa pi̧yȩ jähuäʼinä ucuocuäcuähuätucui:
-
Pi̧jä̧ rȩjȩʼi̧nä̧, ju̧huä̧jä̧nä̧ oʼca juiyönä ka̧cu̧ʼi̧nä̧ 6nö mo̧ro̧ jo̧mȩnä̧tä̧ adicuinaʼa päʼö, ¿Dios I̧huȩnȩ Isäʼtänä huo̧juȩta̧ʼa̧ ja̧ʼa̧di̧?
-
Tö̧ä̧nä̧hua̧ uhuäbeʼinö huȩnȩ Chutä I̧huȩnȩ Isäʼtä jiäu taʼanö adiu pätecuächaʼa, ¿päcuhuaʼa ja̧ʼa̧di̧? ¿Tocu päʼö?
Génesis 1:1 cucuocuätucu oʼcaʼa pi̧yȩ jähuäʼinä ucuocuäcuähuätucui:
-
Recuätö científicos huotö päʼätö oʼca juiyö mo̧ro̧jä̧ra̧ʼa̧ ka̧cu̧ʼi̧nä̧, pi̧jä̧ rȩjȩnä̧ ka̧cu̧ʼi̧nä̧ kä̧mä̧di̧nö̧ ja̧ʼa̧ päʼö. Pi̧yȩmä̧ versículonä cucuocuäjicu, ¿pätecuächaʼa ja̧ʼa̧di̧?
Yotöcunä ttö̧ja̧ päʼätö Dios ji̧yȩtȩ jähuä uhuäbeʼäji oʼcaʼa, pi̧yȩttö̧ oʼca juiyö ka̧cu̧mä̧ ja̧ʼa̧tä̧ kä̧mä̧di̧na̧ʼa̧ päʼö. Génesis 1:21, 25, 27, cucuocuätucu oʼcaʼa pi̧yȩ jähuäʼinä ucuocuäcuähuätucui:
-
Dios ji̧yȩtȩ jähuä uhuäbeʼäji oʼcaʼa pi̧yȩttö̧ a̧ʼcuo̧po̧nä̧ po̧i̧ʼi̧nä̧, isotöʼinä, ttö̧ja̧ʼi̧nä̧ juottächinaʼa päʼömä, ¿Dios I̧huȩnȩ Isäʼtänä huo̧juȩta̧ʼa̧ ja̧ʼa̧di̧? Chutä oʼca juiyö “géneros” pättö pö̧nä̧, ¿uhuäbeʼinaʼa ja̧ʼa̧di̧? b
6. Tö̧ä̧nä̧hua̧ uhuäbeʼinöttö i̧mi̧cu̧nä̧ huotöjä
Ujutumä isotöttöʼinä yorätehuocotöjä. Génesis 1:26, cucuocuätucu oʼcaʼa pi̧yȩ jähuäʼinä ucuocuäcuähuätucui:
-
Ttö̧ja̧mä̧ repeäcuähuäʼinä, re rö̧jö̧nä̧ toäcuähuäʼinä ti̧jȩpö̧ʼa̧nö̧ ja̧ʼa̧ Tö̧ä̧nä̧hua̧mä̧ Chutä taʼanö huotö ta päʼö aditinaʼattö. Pi̧yȩmä̧ Jeohua öadihuä jähuä, ¿däje i̧jȩpa̧ʼa̧ttö̧?
YOTÖCUNÄ PÄʼÄTÖ: “Dios I̧huȩnȩ Isäʼtänä uhuäbeʼäcuähuä jähuä jiäumä amönä ttucuocu huȩnȩtä̧ ja̧ʼa̧”.
-
Ucumä, ¿däje cuamöcuädaʼattö? ¿Tocu päʼö?
CA̧CA̧TI̧PÖ̧ UCUOCUÄCUÄHUÄ
Jeohuamä oʼca juiyö mo̧ro̧jä̧ra̧ʼa̧ ka̧cu̧ʼi̧nä̧, pi̧jä̧nä̧ ka̧cu̧ʼi̧nä̧ uhuäbeʼinö.
Cu̧huo̧juä̧chä̧ji̧ jiʼähui
-
Oʼca juiyö mo̧ro̧jä̧ra̧ʼa̧ ka̧cu̧ʼi̧nä̧, pi̧jä̧nä̧ ka̧cu̧ʼi̧nä̧ kä̧mä̧di̧nö̧ huȩnȩ, Dios I̧huȩnȩ Isäʼtänä, ¿däje huo̧juȩta̧ʼa̧ttö̧?
-
Tö̧ä̧nä̧hua̧ ji̧yȩtȩ jähuä uhuäbeʼäjittö, ¿oʼca juiyö ka̧cu̧mä̧ a̧ʼcuo̧po̧nä̧ kä̧mä̧da̧ päʼö jaroinaʼa ja̧ʼa̧di̧? Pärocuaʼacu oʼca juiyö ka̧cu̧mä̧, ¿Chutä uhuäbeʼinaʼa ja̧ʼa̧di̧?
-
Tö̧ä̧nä̧hua̧ uhuäbeʼinöttö, ¿tocu päʼö i̧micu̧nä̧ huotö taʼattö?
KOROʼINÄ KA̧ʼA̧
Uhuäbeʼäcuähuänä huo̧juä̧chi̧ ya̧tȩ adiu amöcuädö jȩpi̧nö̧ päʼö.
“Uhuäbeʼäcuähuättö, ¿däje tu̧huo̧jui̧ʼa̧ʼa̧ttö̧?” (¡Despertad!, septiembre 2006)
Tö̧ä̧nä̧hua̧ uhuäbeʼinö huȩnȩ Chutä I̧huȩnȩ Isäʼtänä jiäu taʼanö ya̧tȩ i̧tti̧ba̧rö̧ adiu jiähuaʼa topi.
A̧ʼcuo̧po̧nä̧ pärohuächinaʼa pättömä Dios I̧huȩnȩ Isäʼtänä huo̧juȩtö̧cu̧ iso päiʼönä todehuaʼa ja̧ päʼö huo̧juä̧chi̧.
Mo täbocö ka̧cui̧nä̧tö̧ ttihueʼquiyu jähuä ttö̧ʼo̧cui̧ʼä̧ʼi̧jö̧ʼi̧nä̧, científicos huotö ttu̧huo̧jua̧ päʼö jȩttö̧ i̧jȩpö̧ jähuäʼinä huo̧juä̧chi̧: ¿tta̧ʼcua̧rö̧ ja̧ʼa̧tä̧ kä̧mä̧di̧na̧ʼa̧ ja̧ʼa̧di̧?, ¿ya̧tȩ uhuäbeʼinaʼa ja̧ʼa̧di̧?
Tta̧ʼcua̧rö̧ kä̧mä̧di̧nö̧ huȩnȩ. Cinconö jähuä jättecuttu tu̧huo̧juä̧cha̧ päʼö jö̧ (Cuyäruʼtä)
