HUO̧JUI̧CUÄ̧ 07

Jeohua, ¿tta̧ʼa̧nö̧ hua̧ ja̧ʼa̧ttö̧?

POJOPI TTI̧HUȨNȨ

Jeohua ötöʼcö cuamöcuädomenä, ¿tta̧ʼa̧nö̧ tocuʼaʼattö? Si̧ri̧ʼcö̧ ttö̧rö̧jö̧ taʼanö, oto kö̧ päʼö, ¿cuamöcuädaʼa? I̧sa̧ huocö, cuʼupä cuäaʼa jö̧ taʼanö juruʼu ja̧ʼa̧ päʼö, ¿cuamöcuädaʼa? Jeohua iso päiʼönä, ¿tta̧ʼa̧nö̧ hua̧ttö̧? I̧huȩnȩ Isäʼtänä ji̧yȩcu̧nä̧ Chutä öadihuä jähuäʼinä, ucuru a̧mö̧cuä̧rö̧ päʼöʼinä i̧jȩpö̧.

1. Tö̧ä̧nä̧hua̧rö̧, ¿tocu päʼö totocaʼattö?

Tö̧ä̧nä̧hua̧mä̧ uhuäpocö (1 Timoteo 1:17). Jeohua idepäʼinä, ihueʼcaʼinä jui̧ʼa̧. Ja̧u̧mä̧ isoppa hua̧ mo̧ro̧jä̧nä̧ totö juiyöʼa̧nö̧ jo̧mȩ kö̧.

2. Jeohua öadihuättö ji̧yȩcu̧nä̧, ¿ti̧yȩ ja̧ʼa̧ttö̧?

Jeohuarö totocaʼanä Ja̧u̧ru̧ tu̧huo̧juä̧cho̧mȩnä̧ repetönä ja̧ʼa̧ öadihuä juiyo adiu u̧ju̧nä̧ra̧ʼa̧ttö̧. Dios I̧huȩnȩ Isäʼtä päaʼa: “Jeohua jueönä jȩä̧cuä̧huä̧ repeaʼattö Churutä repeʼö esetätörö icuipi̧yä̧cua̧” (Salmo 37:28). Ja̧ʼhua̧ta̧nö̧ ttu̧ȩcuä̧nä̧ repeʼönö “re rö̧jö̧nä̧ topö”, pa̧ʼa̧nö̧ jȩpö̧ ji̧nä̧ isocu usurä ȩmä̧huä̧tö̧rö̧ (Santiago 5:11). “Ttami isoʼquinä ubara ttuʼätö ttötöʼcö kö̧ Jeohuamä, juiyo tta̧ʼcua̧nä̧ juiyupätörö ppäʼädö” (Salmo 34:18). Ujutu jȩtö̧mä̧ Jeohua eseunäʼinä, a̧ʼcua̧ tta̧huȩcu̧nä̧ʼi̧nä̧ jȩö̧ʼa̧nö̧ ja̧ʼa̧ päʼö, ¿cu̧huo̧juä̧ʼi̧ja̧ʼa̧? Ya̧tȩ suronä jȩa̧ päʼö öʼojopomenä Jeohuarö a̧ʼcua̧ tta̧huȩcu̧nä̧ʼi̧nä̧, juiyo barahuächiʼönäʼinä jȩpö̧ (Salmo 78:40, 41). Pärocuaʼacu ya̧tȩ adiu jȩa̧ päʼö öʼojopomenä Ja̧u̧ru̧ juiyo eseunä jȩpö̧ (Proverbios 27:11 ucuocui).

3. Jeohua repeä̧u̧jä̧ päʼö, ¿tta̧ʼa̧nö̧ i̧jȩpa̧ʼa̧ttö̧?

Jeohua öadihuättö abonänö micuäumä repeäcuähuä ja̧ʼa̧. Ja̧ʼhua̧nö̧ ja̧ʼa̧ttö̧ “Dios repeäcuähuä hua̧” (1 Juan 4:8, TNM). Jeohua ujuturu repeʼö päʼö Chutä I̧huȩnȩ Isäʼtänä i̧jȩpö̧, ja̧ʼhua̧ta̧nö̧ oʼca juiyö uhuäbeʼinönäʼinä (Hechos 14:17 ucuocui). Amöcuädi: ¿Tta̧ʼa̧nö̧ ta päʼö uhuäbeʼinaʼattö? Colores a̧ʼcua̧cu̧nä̧ tota päʼöʼinä, música ä̧ju̧cu̧ tesehua päʼöʼinä, cuäcuähuä nö̧ʼö̧ cuä̧nö̧ tesehua päʼöʼinä aditinä̧u̧jä̧. Jeohuamä pä̧huä̧ rö̧jä̧çu̧ eseunu tö̧ja̧ päʼö.

TÄCUNÄ TU̧HUO̧JUÄ̧CHÄ̧TU̧CUA̧

Jeohuamä juiyo adihuä juäi a̧ʼcua̧cu̧ däjenä jȩa̧ʼa̧ttö̧ päʼö totätucua. Ja̧u̧nu̧ oʼcaʼa, Chutä öadihuä töjöʼcönä jö̧mä̧ tta̧ʼa̧nö̧ i̧jȩpa̧ʼa̧ttö̧ päʼöʼinä tu̧huo̧juä̧chä̧cuo̧tö̧jä̧.

4. Espíritu santo: Dios ujuru a̧di̧tä̧ra̧ʼa̧

Jeohua öäre espíritu santonä a̧di̧tä̧rö̧, ujutu tu̧mö̧nä̧ taditaʼa jö̧ taʼanö. Dios I̧huȩnȩ Isäʼtä jiähuocaʼa espíritu santo i̧sa̧ ja̧ʼa̧ päʼö. Pärocuaʼacu jiähuaʼa Tö̧ä̧nä̧hua̧ ujuru a̧di̧tä̧ra̧ʼa̧ ja̧ʼa̧, oʼca juiyönä jȩa̧ päʼö. Lucas 1:15 cucuocuätucu oʼcaʼa pi̧yȩ jähuäʼinä ucuocuäcuähuätucui:

Ttö̧ja̧mä̧ espíritu santottö suttädiʼöʼa̧nö̧ ja̧ʼa̧, eseäcuähuättö suttädiʼaʼa jä̧ʼi̧nö̧ʼa̧nö̧ jö̧nä̧. Ja̧ʼhua̧nö̧ ja̧ʼa̧ttö̧ espíritu santo, ¿i̧sa̧ ja̧ʼa̧di̧? ¿Tö̧ä̧nä̧hua̧ ujuru a̧di̧tä̧ra̧ʼa̧ ja̧ʼa̧di̧? ¿Tocu päʼö ja̧ʼhua̧nö̧ cuamöcuädaʼattö?

Jeohua öäre espíritu santonä juiyo adihuä juäi jȩpö̧. Salmo 33:6; 2 Pedro 1:20, 21 cucuocuätucu oʼcaʼa pi̧yȩ jähuäʼinä ucuocuäcuähuätucui:

Jeohua öäre espíritu santonä, ¿däje jȩä̧ʼi̧ja̧ʼa̧ttö̧?

5. Jeohuamä öadihuä töjöʼcönä jö̧ ku̧nä̧rö̧

Moisés Diosrö pä̧huä̧ rö̧jö̧ ʼcuäopönä jȩpi̧nö̧. Churutä Uhuäbeʼinörö adiu u̧huo̧jua̧ päʼinö. Ja̧ʼhua̧nö̧ ja̧ʼa̧ttö̧ Moisés päinäcu: “Cu̧mä̧ni̧yä̧ jähuä huo̧juȩti̧ttö̧, ucuru adiu chu̧huo̧juä̧chä̧cua̧ʼa̧nö̧” (Éxodo 33:13). Jeohua ji̧yȩcu̧nä̧ öadihuä jähuä ucuocu ädätinäcu. Éxodo 34:4-6 cucuocuätucu oʼcaʼa pi̧yȩ jähuäʼinä ucuocuäcuähuätucui:

Jeohuamä Chutä öadihuä u̧ju̧nä̧rö̧ttö̧ Moisésrö, ¿ti̧yȩ ötöʼcö jähuä ucuocuinaʼattö?
Jeohua öadihuättö, ¿ti̧yȩ juiyo cujöʼcönä ja̧ʼa̧ttö̧?

6. Jeohuamä ttö̧ja̧rö̧ a̧mö̧cuä̧rö̧

Mo täbocö Dios umöhuäyotö hebreos ttö̧ja̧mä̧ Egipto rȩjȩra̧ʼa̧ korotö huȩttä̧ra̧ʼa̧nä̧ aditötä ki̧nä̧tö̧. Jeohuamä jahuätö ubara ttuttaʼa tomenä, ¿tta̧ʼa̧nö̧ päiʼinaʼattö? TTÄ̧JU̧CUA̧ PÄʼÖ ʼCHUÄDÄCUÄHUÄ cuä̧ju̧cuä̧tu̧cua̧ʼa̧nä̧ huȩyu̧cuä̧ to̧pä̧rä̧tu̧cui̧, ja̧ʼhua̧nö̧ jo̧ca̧ʼa̧ jö̧ttö̧mä̧ Éxodo 3:1-10 cucuocuätucu oʼcaʼa pi̧yȩ jähuäʼinä ucuocuäcuähuätucui:

TTÄ̧JU̧CUA̧ PÄʼÖ ʼCHUÄDÄCUÄHUÄ: Jeohuamä umöhuäyotö ubara ttuttaʼa tomenä barahuächiʼinäcu (2:45)

Jeohuamä ttö̧ja̧ ubara ttuttaʼa tomenä tta̧ʼa̧nö̧ päiʼaʼattö päʼö cu̧huo̧juä̧cha̧ päʼö, ¿tta̧ʼa̧nö̧ ppädaʼattö pi̧yȩ huȩnȩmä̧? (Versículo 7, 8 topätucui).
Jeohua pi̧jä̧ ttö̧ja̧rö̧ iso päiʼönä ppäda pä̧huä̧ rö̧jä̧cu̧ päʼö, ¿cuesetaʼa ja̧ʼa̧di̧? ¿Iso päiʼönä jȩö̧ʼa̧nö̧ ja̧ʼa̧di̧? ¿Tocu päʼö ja̧ʼhua̧nö̧ cuamöcuädaʼattö?

7. Jeohua uhuäbeʼinönä Chutä öadihuä i̧jȩcuä̧cha̧ʼa̧ topätöjä

Jeohua Chutä uhuäbeʼinönä u̧huo̧juȩtä̧u̧jä̧ tocu hua̧ ja̧ʼa̧ttö̧ päʼö. VIDEO topätucui. Romanos 1:20 cucuocuätucu oʼcaʼa pi̧yȩ jähuäʼinä ucuocuäcuähuätucui: