Jeohuamä adiu cu̧huo̧jua̧rö̧ päʼö pä̧huä̧ rö̧jä̧cu̧. ¿Tocu päʼö? Chutä ötöʼcö, öadihuä, jȩö̧ jähuä, ucuru adihuä juäi iya päʼöʼinä cu̧huo̧ju̧ttu̧mä̧ a̧hua̧ru̧hua̧ päcuhuiʼa päʼö pä̧huä̧ rö̧jö̧nä̧ to̧cu̧ʼä̧cua̧jä̧. Ja̧ʼhua̧nö̧ ja̧ʼa̧nä̧, ¿iso päiʼönä Tö̧ä̧nä̧hua̧ a̧hua̧ru̧hua̧ jö̧nä̧ päcuhuiʼöʼa̧nö̧ ja̧ʼa̧? (Santiago 2:23 ucuocui). A̧hua̧ru̧hua̧ päcuhuiʼa päʼö, ¿däje jȩcu̧ʼa̧nö̧ ja̧ʼa̧ttö̧? Pi̧yȩ jäcuhuecu Dios I̧huȩnȩ Isäʼtä ädätö ppädaʼa. Ja̧ʼhua̧ta̧nö̧ jiähuaʼa Jeohuacu esecu cu̧ju̧ korottöʼinä abonänö rö̧ȩnä̧ micuäu ja̧ʼa̧ päʼö.

1. ¿Däje jȩcu̧ʼa̧ päaʼattö Jeohuamä?

“Diosrö töʼcöpächätucui. Ja̧u̧ru̧ cutöʼcöhuächätucuomenä, ja̧u̧ʼi̧nä̧ ucuturu ö̧tö̧ʼcö̧huä̧chä̧cua̧” (Santiago 4:8). Pi̧yȩmä̧, ¿däje pähuächaʼattö? Jeohua a̧hua̧ru̧hua̧ päcuhuiʼa päʼö päcujä. Diosrö tottocaʼattö yotöcunämä Chutä ahuaruhuä pätiʼö juiyöʼa̧nö̧ ja̧ʼa̧ päʼätö. Ja̧ʼhua̧nö̧ ja̧ʼa̧nä̧ Dios I̧huȩnȩ Isäʼtänä Chutä jähuä tu̧huo̧jua̧ päʼö jö̧ ku̧ni̧pi̧nö̧ Churutä tötöʼcöhuächa päʼö. Jeohuamä totococu ja̧ʼa̧nä̧, Chutä I̧huȩnȩ Isäʼtänä jiäu tucuocuomenä Ja̧u̧cu̧ esecu tö̧jö̧ ʼquiyönä juoächaʼa.

2. Esecu cu̧jä̧u̧ttu̧ʼi̧nä̧, ¿tocu päʼö Jeohuamä abonänö adihuä i̧sa̧ ja̧ʼa̧ttö̧?

Ka̧ra̧ repeö i̧jȩpö̧ttö̧ʼi̧nä̧ abonänö repeäcujä Jeohuamä. Ja̧u̧mä̧ pä̧huä̧ rö̧jä̧cu̧ eseu cu̧ja̧ päʼöʼinä, recuä rö̧jo̧mȩnä̧ʼi̧nä̧ jäcuhueparö päʼö. Oʼca juiyönä cuamöcuädömä Tö̧ä̧nä̧hua̧rö̧ jicuhuäuʼa̧nö̧ ja̧ʼa̧, Ja̧u̧mä̧ ucuru a̧mö̧cuä̧ra̧ʼa̧ttö̧ (1 Pedro 5:7). Jeohuamä ahuaruhuärö ppäda päʼöʼinä, tta̧ʼcua̧ ttȩmö̧nä̧ ppäda päʼöʼinä, ä̧ju̧cua̧ päʼöʼinä jo̧mȩnö̧ kö̧ ja̧ʼa̧ (2 Corintios 1:3, 4; 1 Pedro 3:12 ucuocui).

3. Jeohuacu esecu kä̧tö̧rö̧, ¿däje jȩtta̧ päaʼattö?

Jeohua oʼca toiʼönärö repeaʼanä jueönä jȩpä̧tö̧cu̧tä̧ esecu kö̧ (Proverbios 3:32). Jeohuamä pä̧huä̧ rö̧jä̧cu̧ ahuaruhuä Chutä öjöʼcötä jȩpö̧ ttujuruhuächa päʼö, öjöʼcocöttö yattocua päʼöʼinä. Yotöcunämä Jeohua päö taʼanö jȩtö̧ juiyöʼa̧nö̧ ja̧ʼa̧ päʼätö. Ja̧ʼhua̧nö̧ ja̧ʼa̧nä̧ Ja̧u̧mä̧ re rö̧jö̧nä̧ Toäcuähuä I̧sa̧ ja̧ʼa̧ttö̧ iso päiʼönä Churutä repeʼätöröʼinä, eseunä jȩtta̧ päʼö juruhuächätöröʼinä adiunä topö (Lucas 1:50; Hechos 10:34, 35).

 TÄCUNÄ TU̧HUO̧JUÄ̧CHÄ̧TU̧CUA̧

4. Abrahánmä Jeohuacu esecu ki̧nö̧

Dios I̧huȩnȩ Isäʼtänä Abrahán (ja̧ʼhua̧ta̧nö̧ micuinö Abrán) jȩi̧nö̧ huȩnȩmä̧ Tö̧ä̧nä̧hua̧ ahuaruhuä pätiʼa päʼö jȩtö̧ʼa̧nö̧ jö̧ tu̧huo̧ju̧nä̧ ppädaʼa. Génesis 12:1-4 Abrahán jähuä cucuocuätucu oʼcaʼa pi̧yȩ jähuäʼinä ucuocuäcuähuätucui:

• Jeohuamä Abrahánrö, ¿däje jȩa̧ päʼö hueinaʼattö?

• Jeohuamä, ¿tta̧ʼa̧nö̧ ppädäcuaʼa päinaʼattö?

• Jeohua hueäji oʼcaʼa Abrahánmä, ¿däje jȩi̧na̧ʼa̧ttö̧?

5. Jeohua esecu ö̧jä̧u̧ jȩtta̧ päö huȩnȩ

Ä̧tȩcuä̧nä̧ esecu tö̧jä̧u̧ adiu jȩtta̧tö̧ päʼö pä̧huä̧ rö̧jä̧u̧jä̧.

• Esecu cu̧jä̧u̧, ¿däje jȩtta̧ päcuhuaʼattö?

1 Juan 5:3 cucuocuätucu oʼcaʼa pi̧yȩ jähuäʼinä ucuocuäcuähuätucui:

• Jeohua esecu ö̧jä̧u̧, ¿däje jȩtta̧ päaʼattö?

Jeohua hueö teseta päʼömä tö̧jö̧ jähuäʼinä, tamöcuädöʼinä pärou ticua päʼö ja̧ʼa̧. Isaías 48:17, 18 cucuocuätucu oʼcaʼa pi̧yȩ jähuäʼinä ucuocuäcuähuätucui:

• Jeohuamä esecu ö̧jä̧u̧ru̧, ¿tocu päʼö ttö̧jö̧ jähuä pärou tticua päʼö hueaʼattö?

6. Jeohuacu esecu kä̧tö̧rö̧ ppäda päʼö jȩö̧

 CA̧CA̧TI̧PÖ̧ UCUOCUÄCUÄHUÄ

Jeohuamä a̧hua̧ru̧hua̧ päcuhuiʼa päaʼattö Churutä cutöʼcöhuächa päʼö ppä̧dä̧cua̧.

Cu̧huo̧juä̧chä̧ji̧ jiʼähui

• Jeohuamä esecu ö̧jä̧u̧ru̧, ¿tta̧ʼa̧nö̧ ppädaʼattö?

• Jeohuamä esecu ö̧jä̧u̧ ttö̧jö̧ jähuä pärou tticua päʼö, ¿tocu päʼö hueaʼattö?

• Jeohuamä ahuaruhuärö, ¿abora̧ʼa̧ jȩtta̧ päʼö hueaʼa ja̧ʼa̧di̧? ¿Tocu päʼö ja̧ʼhua̧nö̧ päcuhuaʼattö?