HUO̧JUI̧CUÄ̧ 09

Diosrö ucuocuäcuähuämä Ja̧u̧ru̧ cutöʼcöhuächönä ppädaʼa

POJOPI TTI̧HUȨNȨ

Oicuä huȩnȩ adiunä cu̧ju̧nä̧ jȩö̧ recuä rö̧ja̧ʼa̧ päʼö, ¿amöcuädäʼijöjä? Rö̧ȩnä̧ micuäu jäcuhuecu jähuä ttädätocö jä̧ʼi̧jö̧, ¿cu̧huo̧jua̧ päcuhuaʼa ja̧ʼa̧di̧? Cua̧ʼcua̧ cuȩmö̧nä̧ ppättädacu päʼö, ¿recuä rö̧ja̧ʼa̧di̧? ¿Jeohuacu todeunä cu̧ja̧ päcuhuaʼa ja̧ʼa̧di̧? Diosrö ucuocuäcuähuä ppädöʼa̧nö̧ ja̧ʼa̧. Ja̧ʼhua̧nö̧ ja̧ʼa̧nä̧ Diosrö, ¿tta̧ʼa̧nö̧ cucuocua päʼö ja̧ʼa̧ttö̧? Oʼca toiʼönä ttucuocu, ¿ä̧ju̧cua̧ʼa̧ ja̧ʼa̧di̧? Ucu Diosrö ucuocu jäcuhuepömä ä̧ju̧cu̧ ja̧ʼa̧ päʼö, ¿tta̧ʼa̧nö̧ cu̧huo̧ju̧ʼa̧nö̧ ja̧ʼa̧ttö̧? Totätucua.

1. ¿Dirö tucuocua päʼö ja̧ʼa̧ttö̧? Ja̧ʼhua̧ta̧nö̧, ¿däje jähuä tucuocuʼa̧nö̧ ja̧ʼa̧ttö̧?

Jesúsmä huo̧juȩti̧nö̧ Täʼo mo̧ro̧jä̧ra̧ʼa̧ kö̧rö̧tä̧ tucuocua päʼö ja̧ʼa̧ päʼö. Chutä ja̧ʼhua̧nö̧tä̧ jȩpä̧ʼi̧nö̧. Yaʼate mo̧ro̧ päʼinö: “Pa̧ʼa̧nö̧ ucuocuätucui: Täʼo Dios, mo̧ro̧jä̧ra̧ʼa̧ kö̧jä̧” (Mateo 6:9). Jeohuarö tucuocuomenä Ja̧u̧cu̧ esecu tö̧jö̧ ʼquiyönä juoächaʼa.

Dioscu tucuocuomenä oʼca juiyö tamöcuädöʼinä, koro jähuäʼinä jitäuʼa̧nö̧ ja̧ʼa̧. Ja̧ʼhua̧nö̧ ja̧ʼa̧nä̧ Dios ä̧ju̧cua̧tö̧ pätöttömä Ja̧u̧ öjöʼcocö jätepa päʼö jo̧ca̧ʼa̧. Dios I̧huȩnȩ Isäʼtä päaʼa: “Diosrö pä̧huä̧ rö̧jö̧ jäʼepö tucuocuomenä, ujuturu ä̧ju̧cua̧ʼa̧ttö̧, ja̧u̧ru̧ ta̧ʼcua̧ huȩnä̧rä̧tö̧jä̧” (1 Juan 5:14). Jesús huo̧juȩti̧nö̧ Dioscu tucuocuʼa̧nö̧ jö̧ (Mateo 6:9-13 ucuocui). Ujutu jähuä jitäuʼa̧nö̧ ja̧ʼa̧. Ja̧ʼhua̧nö̧ ja̧ʼa̧nä̧ tunichiʼa päʼö jo̧ca̧ʼa̧ Chutä iyäʼijönä eseu adihuaʼa päta päʼö. Ja̧ʼhua̧ta̧nö̧ korotörö ppäda päʼö jätepa päʼö ja̧ʼa̧.

2. Diosrömä, ¿tocu tucuocua päʼö ja̧ʼa̧ttö̧?

Dios I̧huȩnȩ Isäʼtä pi̧yȩ jȩta̧ päʼö hueä̧u̧jä̧: “Ja̧u̧ [Tö̧ä̧nä̧hua̧] äʼca jo̧mȩttö̧ cuami isoʼqui baʼepätucui” (Salmo 62:8). Ja̧ʼhua̧nö̧ ja̧ʼa̧ttö̧ Diosrö tucuocuomenä tami isoʼquittö tucuocua päʼö ja̧ʼa̧. Tucuocuʼa̧nö̧ ja̧ʼa̧ rä̧mi̧pö̧nä̧, ja̧ʼhua̧nö̧ jo̧ca̧ʼa̧ jö̧ttö̧mä̧ jacuänä ʼcorujuäinätä. Ja̧ʼhua̧nö̧ ja̧ʼa̧nä̧ kä̧nö̧cö̧, pä̧nö̧cö̧ Jeohuarö tucuocuttumä ucuotönö jȩta̧ päʼö ja̧ʼa̧. Ja̧ʼhua̧ta̧nö̧ tojusodettöʼinä, karaʼa tö̧ja̧ʼa̧ jö̧ttö̧ʼi̧nä̧ ʼcuäopönä Diosrö tucuocuʼa̧nö̧ ja̧ʼa̧.

3. Diosmä Ja̧u̧ru̧ tucuocu, ¿tta̧ʼa̧nö̧ ädätaʼattö?

Jeohua Churutä tucuocu ädäta päʼö jȩö̧ʼa̧nö̧ jö̧ rö̧ȩnä̧ ka̧ʼa̧. Chutä I̧huȩnȩ Isäʼtänä ujutu jätecu jähuä mö̧nä̧u̧ ädätö. Dios I̧huȩnȩ Isäʼtä ucuocuäcuähuämä “ttu̧ʼȩpä̧ro̧co̧tö̧rö̧ huo̧juä̧huä̧ iyaʼa” (Salmo 19:7; Santiago 1:5 ucuocui). Huȩnȩ tu̧ju̧nä̧ro̧mȩnä̧ʼi̧nä̧ Jeohua ta̧ʼcua̧ jacuänä eseu kä̧cuä̧huä̧ iyö. Ja̧ʼhua̧ta̧nö̧ ujuturu recuä rö̧jo̧mȩnä̧ tö̧jä̧hua̧tö̧ ppättädatö päʼö jȩö̧ʼa̧nö̧ ja̧ʼa̧.

TÄCUNÄ TU̧HUO̧JUÄ̧CHÄ̧TU̧CUA̧

Jeohuarö tucuocuomenä eseunu ä̧ju̧cua̧ päʼö tami isoʼquittö tta̧ʼa̧nö̧ tucuocuʼa̧nö̧ ja̧ʼa̧ttö̧ päʼöʼinä, pi̧yȩ ujuturu tta̧ʼa̧nö̧ ppädöʼa̧nö̧ ja̧ʼa̧ttö̧ päʼöʼinä totätucua.

4. Dios ä̧ju̧cua̧tö̧ päʼö jȩta̧ päʼö jö̧ ka̧ʼa̧

Dios ä̧ju̧cua̧tö̧ päʼömä, ¿däje jȩta̧ päʼö ja̧ʼa̧ttö̧? VIDEO topätucui.

VIDEO: Diosmä oʼca juiyö Ja̧u̧ru̧ jättepö, ¿ä̧ju̧cua̧ʼa̧ ja̧ʼa̧di̧? (juʼtometä) (2:42)

Jeohuamä Churutä tucuocua päʼö pä̧huä̧ rö̧jä̧cu̧, ka̧ra̧rö̧mä̧cö̧. 1 Juan 5:14 cucuocuätucu oʼcaʼa pi̧yȩ jähuäʼinä ucuocuäcuähuätucui:

Diosmä, ¿Ja̧u̧cu̧tä̧ cucuocua päaʼa ja̧ʼa̧di̧? ¿Tocu päʼö ja̧ʼhua̧nö̧ cuamöcuädaʼattö?

Dios ä̧ju̧cua̧tö̧ pätöttömä Chutä hueö taʼanö jȩpö̧ tö̧ja̧ päʼö tujuruhuächa päʼö ja̧ʼa̧. Juan 9:31; 1 Pedro 3:12 cucuocuätucu oʼcaʼa pi̧yȩ jähuäʼinä ucuocuäcuähuätucui:

Diosrö tucuocuomenä iso päiʼönä ä̧ju̧cua̧tö̧ päʼömä, ¿däje jȩta̧ päʼö ja̧ʼa̧ttö̧?

Yotöte su̧ro̧da̧u̧ curänä gana pätta päʼö Dios ppädatö päʼö jäʼepätö. Karaʼanä kä̧tö̧ʼi̧nä̧ ja̧ʼhua̧nö̧tä̧ jäʼepätö. Ja̧ʼhua̧nö̧ ja̧ʼa̧nä̧ pitö jättepömä, ¿iso päiʼönä Dios ä̧ju̧cuä̧cua̧ʼa̧ ja̧ʼa̧di̧?

5. Diosrö tucuocumä tami isoʼquittö räopa päʼö ja̧ʼa̧

Recuätörö huo̧juȩtä̧ʼi̧jä̧tö̧ Diosrö ji̧yȩä̧cuȩtä̧ ppa̧ʼä̧dä̧rö̧ ucuocuäcuähuä jähuä. Ja̧ʼhua̧nö̧ ja̧ʼa̧nä̧ Diosmä pa̧ʼa̧nö̧ ttucuocuarö päʼö, ¿iso päiʼönä öjöʼcaʼa ja̧ʼa̧di̧? Mateo 6:7 cucuocuätucu oʼcaʼa pi̧yȩ jähuäʼinä ucuocuäcuähuätucui:

Diosrö tucuocuomenä ji̧yȩä̧cuȩtä̧ ppa̧ʼä̧dä̧rö̧ tucuocu juiya päʼö, ¿däje jȩta̧ päʼö ja̧ʼa̧ttö̧?

Mo̧ro̧ jö̧ taʼanö ucuru adiu ʼcuäopö jähuänä amöcuädö, ¿Jeohuarö adihuaʼa päcuʼa̧nö̧ ja̧ʼa̧di̧? Semana ʼcuäoiʼönä pi̧yȩ jȩcu̧ʼu̧ttu̧mä̧ röji ja̧ʼa̧cu̧ 7nö jähuä Diosrö cu̧cuo̧cuä̧cua̧jä̧, ji̧yȩä̧cuȩtä̧ ppa̧ʼä̧dä̧rö̧ cucuocuocaʼa.

Ya̧tȩ ttäʼo adihuä i̧sa̧mä̧ i̧tti̧ ami isoʼquinä ka̧cu̧ yapare juiyönä jiähuarö päʼö pä̧huä̧ rö̧jä̧cu̧. Juhuaʼa jö̧ taʼanö Jeohua pä̧huä̧ rö̧jä̧cu̧ Ja̧u̧cu̧ tucuocuomenä tami isoʼquittö tucuocua päʼö.

6. Dios iyinä̧u̧jä̧ rö̧ȩnä̧ micuäu: Churutä ucuocuäcuähuä

Diosrö ucuocuäcuähuämä ʼquiyome päteʼö ʼcuätopomenä, ¿tta̧ʼa̧nö̧ ppädöʼa̧nö̧ ja̧ʼa̧ttö̧ tujuruhua päʼömä? VIDEO topätucui.

VIDEO: Diosrö ucuocuäcuähuämä tujuruhua päʼö ppädaʼa (1:32)

Dios I̧huȩnȩ Isäʼtänä päaʼa Diosrö ucuocuäcuähuämä ppädöʼa̧nö̧ ja̧ʼa̧ iso päiʼönä ta̧ʼcua̧ jacuänä eseu tö̧ja̧ päʼö. Filipenses 4:6, 7 cucuocuätucu oʼcaʼa pi̧yȩ jähuäʼinä ucuocuäcuähuätucui:

Diosrö ucuocuäcuähuämä oʼca juiyö huȩnȩ tu̧ju̧nä̧rö̧ jȩpö̧ icuocaʼanä ujuturu, ¿tta̧ʼa̧nö̧ ppädaʼattö?
Diosrö, ¿däje jähuä cucuocua pä̧huä̧ rö̧ja̧ʼa̧ttö̧?

¿Cu̧huo̧juä̧ʼi̧ja̧ʼa̧?

Amén päʼömä pähuächaʼa “ja̧ʼhua̧nö̧tä̧ ja̧ʼa̧ja̧” päʼö, ja̧ʼhua̧ta̧nö̧ “iso päiʼönätä ja̧ʼa̧” päʼöʼinä. Mo täbocötä päiʼönä Diosrö ucuocu cättädomenä “amén” päʼätö (1 Crónicas 16:36).

7. Koro jȩcu̧ʼa̧ʼa̧nä̧ʼi̧nä̧ Diosrö cucuocua päʼö ʼquȩʼȩpö̧ ku̧ni̧

Koronömä rö̧ȩnä̧ jȩtö̧ tu̧ju̧nä̧ra̧ʼa̧ttö̧ Diosrö tucuocua päʼö unichiʼätöjä. Jesúsmä Diosrö ucuocuäcuähuä, ¿tta̧ʼa̧nö̧ toinaʼattö? Mateo 14:23; Marcos 1:35 cucuocuätucu oʼcaʼa pi̧yȩ jähuäʼinä ucuocuäcuähuätucui:

Jesús koro jȩa̧ʼa̧nä̧ʼi̧nä̧ Diosrö ucuocua päʼö ʼquȩʼȩpö̧ u̧ju̧na̧ päʼömä, ¿tta̧ʼa̧nö̧ iso juoepinaʼattö?
Ucuʼinä koro jȩcu̧ʼa̧ʼa̧nä̧ Diosrö cucuocua päʼö ʼquȩʼȩpö̧ cu̧ju̧na̧ päʼömä, ¿däje jȩcu̧ʼa̧ päʼö ja̧ʼa̧ttö̧?

YOTÖCUNÄ PÄʼÄTÖ: “Diosrö ucuocuäcuähuämä iso päiʼönä ppädocaʼa, jurunä tta̧ʼcua̧ adihuächiʼönätä ppädö ja̧ʼa̧”.

Ucu, ¿däje päcuhuaʼa?

CA̧CA̧TI̧PÖ̧ UCUOCUÄCUÄHUÄ

Diosrö tami isoʼquittö tucuocuomenä Ja̧u̧ru̧ tötöʼcöhuächönä jȩa̧ʼa̧. Ja̧ʼhua̧ta̧nö̧ ta̧ʼcua̧ jacuänä eseu tö̧ja̧ päʼöʼinä, Jeohuarö pä̧huä̧ rö̧jö̧ jȩta̧ päʼö tujuruʼunäʼinä ppädaʼa.