Jeohua ötöʼcö jähuä jiʼähuätömä, ¿tö̧ca̧ca̧cuä̧ro̧mȩra̧ʼa̧ ttä̧tȩpä̧ʼi̧jä̧cu̧jä̧? Cui̧ʼcho̧ca̧ʼa̧ jä̧ʼi̧ja̧ʼa̧ jö̧ttö̧mä̧ yecuhuecunä jä̧cu̧jä̧ a̧ʼcua̧ra̧ʼa̧, jäʼecujäcö̧: “Ttö̧ca̧ca̧cuä̧ro̧mȩttö̧, ¿däje jȩtta̧ʼa̧ttö̧? Jahuätörö, ¿tocu päʼö rö̧ȩnä̧ micuähuaʼattö? ¿Chi̧ʼchö̧ʼa̧nö̧ ja̧ʼa̧di̧?”. Pi̧yȩ huo̧jui̧cuä̧nä̧ cu̧huo̧jui̧ʼä̧cua̧jä̧ tö̧ca̧ca̧cuä̧ro̧mȩ cui̧ʼcho̧mȩnä̧ Tö̧ä̧nä̧hua̧rö̧ cutöʼcöhuächönäʼinä, adiu cu̧ju̧nä̧ʼi̧nä̧ tocu ppädaʼattö päʼö.

1. Jeohua ötöʼcö jähuä jiʼähuätömä, ¿tocu päʼö ji̧nä̧ yo̧mȩtȩ tö̧ca̧ca̧cuä̧ra̧ʼa̧ttö̧?

Ya̧tȩ Dios I̧huȩnȩ huȩyu̧ti̧nö̧ päʼinö tocu päʼö rö̧ȩnä̧ micuähuaʼattö tö̧ca̧ca̧cuä̧ra̧ päʼö: “recuätö ji̧nä̧ yo̧mȩtȩ pättiʼomettö Jeohuarö chȩsȩhuä̧cua̧sä̧” (Salmo 26:12). Jitä pä̧nä̧ʼi̧nä̧ Jeohua ötöʼcö jähuä jiʼähuätömä tö̧ca̧ca̧cuä̧ro̧mȩnä̧ rö̧ȩnä̧ teseunä jȩa̧ʼa̧. Pi̧jä̧ pa̧ja̧cu̧nä̧ semana jö̧ taʼanö ca̧ca̧cuä̧rä̧tö̧jä̧ Diosrö tesehua päʼöʼinä, ra̧ta̧rö̧ päʼöʼinä, ji̧nä̧ yo̧mȩtȩ tucuocuarö päʼöʼinä. Ja̧ʼhua̧ta̧nö̧ʼi̧nä̧ a̧ʼȩ jö̧ taʼanö asamblea jȩpö̧ ca̧ca̧cuä̧rä̧tö̧jä̧ Tö̧ä̧nä̧hua̧rö̧ ucuo tetähua päʼö.

2. Tö̧ca̧ca̧cuä̧ro̧mȩra̧ʼa̧ cui̧ʼcho̧mȩnä̧, ¿däje cu̧huo̧jui̧ʼä̧cua̧ʼa̧ttö̧?

Tö̧ca̧ca̧cuä̧ro̧mȩnä̧ Dios I̧huȩnȩ Isäʼtä päöttö huäjunä tu̧huo̧juä̧chi̧ʼa̧ päʼö jittäutä ä̧ju̧cuä̧tö̧jä̧ (Nehemías 8:8 ucuocui). Pi̧nȩ cui̧ʼchö̧ttö̧mä̧ Jeohua jähuäʼinä, Chutä öadihuä jähuäʼinä ji̧nä̧ isocu cu̧huo̧jui̧ʼä̧cua̧jä̧. Repeäcujä päʼö cu̧huo̧juä̧cho̧mȩnä̧ a̧hua̧ru̧hua̧ päcuhuiʼa pä̧cu̧huä̧cua̧jä̧, cua̧ʼcua̧ jacuänä eseu cu̧ja̧ päʼöʼinä tocu ppädöʼa̧nö̧ ja̧ʼa̧ttö̧ päʼö cu̧huo̧juä̧chä̧cua̧jä̧ (Isaías 48:17, 18).

3. Tö̧ca̧ca̧cuä̧ro̧mȩra̧ʼa̧ cui̧ʼchö̧ttö̧mä̧ ju̧huȩnȩ kä̧tö̧ ucurumä, ¿tocu ppättädöʼa̧nö̧ ja̧ʼa̧ttö̧?

Jeohua hueä̧u̧jä̧ tö̧ca̧ca̧cuä̧ro̧mȩra̧ʼa̧ ʼchä̧nö̧ cätädiʼocaʼa “korotö, korotönörö adiu repeʼö adihuä juäiʼinä” jȩpö̧ ppätädäcuähua päʼö, “jahuätöʼinä korotörö repeʼö adiu jȩttä̧cua̧ʼa̧nö̧” (Hebreos 10:24, 25). Tö̧ca̧ca̧cuä̧ro̧mȩttö̧ ucu jö̧ taʼanö Tö̧ä̧nä̧hua̧rö̧ ttu̧huo̧jua̧ päʼätörö to̧cu̧ʼä̧cua̧jä̧, pitömä iso päiʼönä repeʼäcuähuätö päʼö cu̧huo̧juä̧chä̧cua̧jä̧. Ja̧ʼhua̧ta̧nö̧ Dios I̧huȩnȩ Isäʼtättö ȩmö̧ cua̧ʼcua̧ adihuächiʼönä jittäuʼinä, ttucuocuʼinä cuä̧ju̧cuä̧cua̧jä̧ (Romanos 1:11, 12 ucuocui). Ja̧ʼhua̧ta̧nö̧ porö ttirecuo toʼätöʼinä, ttirecuo ku̧nä̧rä̧tö̧ʼi̧nä̧ ʼquiyome päteʼö ʼcuättopaʼanä eseu kä̧tö̧cu̧ cu̧cuo̧cuä̧cua̧jä̧. Ja̧ʼhua̧nö̧ ja̧ʼa̧ttö̧ Jeohuamä pä̧huä̧ rö̧jä̧cu̧ tihueye päiʼönä tö̧ca̧ca̧cuä̧ra̧ päʼö.

 TÄCUNÄ TU̧HUO̧JUÄ̧CHÄ̧TU̧CUA̧

4. Jeohua ötöʼcö jähuä jiʼähuätö tö̧ca̧ca̧cuä̧rö̧ jähuä

Cristorö esetätö Chutä ʼcorujuoächinö oʼcaʼa ki̧nä̧tö̧mä̧ ttihueye päiʼönä ca̧ca̧cuä̧rä̧ʼi̧nä̧tö̧ Jeohuarö ucuo tettähua päʼö (Romanos 16:3-5). Colosenses 3:16 cucuocuätucu oʼcaʼa pi̧yȩ jähuäʼinä ucuocuäcuähuätucui:

• Äcuomenä Cristorö esetinätömä Jeohuarö ucuo tettähua päʼö, ¿tocu jö̧nä̧ jȩtti̧na̧ʼa̧ttö̧?

1. Tö̧ca̧ca̧cuä̧ro̧mȩnä̧ tö̧jä̧mä̧da̧ päʼöʼinä, cätäda päʼöʼinä yaʼate ra̧huä̧huä̧ ra̧ʼä̧tö̧jä̧, ja̧u̧nu̧ oʼcaʼa ya̧tȩ Diosrö ucuocu. Ja̧ʼhua̧ta̧nö̧ jiäcuähuäʼinä, jȩttä̧cuȩ i̧jȩcuä̧ʼi̧nä̧, videoʼinä ka̧ʼa̧.

2. Koronö ya̧tȩ jäepomenä ca̧ca̧cuä̧rä̧tö̧mä̧ ttu̧mö̧ cäʼepö ttädätöʼa̧nö̧ ja̧ʼa̧.

3.   Oʼca toiʼönä dottächöʼa̧nö̧ ja̧ʼa̧: u̧mä̧tö̧ʼi̧nä̧, nä̧tö̧ʼi̧nä̧, böäcuächätöʼinä, ppo̧ʼä̧tö̧ʼi̧nä̧...

4. Jeohua ötöʼcö jähuä jiʼähuätö tö̧ca̧ca̧cuä̧ro̧mȩnä̧ pärätä jäʼepocotöjä, dotächa päʼöʼinä mitocotöjä.

5. Tö̧ca̧ca̧cuä̧ro̧mȩra̧ʼa̧ cui̧ʼcha̧ päʼömä cujuruhuächa päʼö ja̧ʼa̧

• Tihueye päiʼönä, ¿tocu päʼö tö̧ca̧ca̧cuä̧ra̧ päʼö ja̧ʼa̧ttö̧?

 CA̧CA̧TI̧PÖ̧ UCUOCUÄCUÄHUÄ

Tö̧ca̧ca̧cuä̧ro̧mȩra̧ʼa̧ cui̧ʼcho̧mȩnä̧ Jeohuarö ji̧nä̧ isocu cu̧huo̧juä̧cha̧ päʼöʼinä, Ja̧u̧cu̧ esecu cu̧ju̧ ʼquiyönä ka̧ päʼöʼinä, korotöcu ucuo tecuhuähuarö päʼöʼinä ppädäcuaʼa.

Cu̧huo̧juä̧chä̧ji̧ jiʼähui

• Jeohuamä, ¿tocu päʼö tö̧ca̧ca̧cuä̧ra̧ päʼö ä̧tȩpa̧ʼa̧ttö̧?

• Jeohua ötöʼcö jähuä jiʼähuätö tö̧ca̧ca̧cuä̧ro̧mȩra̧ʼa̧ cui̧ʼcho̧mȩnä̧, ¿däje cu̧huo̧jui̧ʼä̧cua̧ʼa̧ttö̧?

• Tö̧ca̧ca̧cuä̧ro̧mȩra̧ʼa̧ cui̧ʼchö̧ttö̧mä̧, ¿tocu jö̧nä̧ʼi̧nä̧ ppädöʼa̧nö̧ ja̧ʼa̧ttö̧?