HUO̧JUI̧CUÄ̧ 11

Dios I̧huȩnȩ Isäʼtä adiu ppädacu päʼö, ¿däje jȩcu̧ʼa̧ päʼö ja̧ʼa̧ttö̧?

POJOPI TTI̧HUȨNȨ

Pätta rö̧ätta oto jo̧mȩra̧ʼa̧ cuadita päʼö cuamöcuädomenä abo ʼcuäoiʼönä cua̧ʼcua̧ roönä, ¿jȩä̧ʼi̧ja̧ʼa̧di̧? Abora̧ʼa̧ ʼquiyaʼa päʼö cuamöcuädö juiya päʼö, a̧ʼcuo̧po̧nä̧, a̧ʼcuo̧po̧nä̧ jȩcu̧ʼa̧nö̧ jö̧nä̧ amöcuädöjä a̧ʼcua̧ra̧ʼa̧. Ja̧ʼhua̧nö̧tä̧ ʼcuäopöʼa̧nö̧ ja̧ʼa̧ Dios I̧huȩnȩ Isäʼtä jättäʼtä ucuocuäcuähuänä cuamöcuädomenä. Torö ucuocu chö̧jä̧mä̧dö̧ʼa̧nö̧ ja̧ʼa̧ttö̧ päʼö jäʼecujä a̧ʼcua̧ra̧ʼa̧. Dios I̧huȩnȩ Isäʼtä cucuocuomenäʼinä, cu̧huo̧jui̧ʼo̧mȩnä̧ʼi̧nä̧ cuesehua päʼö ppädöʼa̧nö̧ jö̧ pi̧yȩ huo̧jui̧cuä̧nä̧ totäcuotöjä.

1. Dios I̧huȩnȩ Isäʼtä mo̧ro̧ jö̧ taʼanö tucuocua päʼö, ¿tocu päʼö adihuaʼattö?

Dios I̧huȩnȩ Isäʼtä, “Huȩyu̧cuä̧ Huȩnȩ Dios iyinö”, mo̧ro̧ jö̧ taʼanö ucuocumä eseu ö̧jä̧cua̧, oʼca juiyö jȩö̧mä̧ adiu räopäcuaʼa (2 Timoteo 3:16, 17 ucuocui). Ucuʼinä pi̧yȩ iso juocuhuepa päʼömä mo̧ro̧ jö̧ taʼanö ji̧yȩcu̧nä̧ minuto cucuocua päʼö juruhuächi. Pa̧ʼa̧nö̧ jȩpö̧ yoyojaʼa cu̧huo̧juä̧cho̧mȩnä̧ ji̧nä̧ isocu ucuocu cuȩsȩhuä̧cua̧jä̧.

2. Dios I̧huȩnȩ Isäʼtä cucuocuomenä adiu ppädacu päʼö, ¿däje jȩcu̧ʼa̧ päʼö ja̧ʼa̧ttö̧?

Dios I̧huȩnȩ Isäʼtä tucuocuomenä adiu ppäda päʼömä ucuocutä tucuocua päʼö jo̧ca̧ʼa̧, tucuocunä “ttu̧ʼȩpä̧rö̧nö̧ tamöcuäda päʼö ja̧ʼa̧” (Josué 1:8). Cucuocuomenä jäʼecui: “Pi̧yȩ versículo Jeohua ötöʼcö jähuä, ¿däje huo̧juȩta̧ʼa̧ttö̧? Pi̧yȩ päö taʼanö, ¿tocu jö̧nä̧ jȩchö̧ʼa̧nö̧ ja̧ʼa̧ttö̧? Korotörö, ¿tta̧ʼa̧nö̧ ppädädöʼa̧nö̧ ja̧ʼa̧ttö̧?”.

3. Dios I̧huȩnȩ Isäʼtä, ¿ti̧yȩnö̧ cucuocuʼa̧nö̧ ja̧ʼa̧ttö̧?

Recuätörömä koro jȩtta̧ʼa̧ttö̧ Dios I̧huȩnȩ Isäʼtä ttucuocua päʼö ʼquȩʼȩpö̧ ttu̧ju̧na̧ päʼö ʼquiyaʼa. Ucuruʼinä, ¿ja̧ʼhua̧nö̧ ʼcuäopäʼijaʼa? “Koro jȩcu̧ʼu̧ ka̧ʼa̧nä̧ adiu jȩpö̧ ʼquȩʼȩpö̧” cujuruhuächa päʼö ja̧ʼa̧, Dios I̧huȩnȩ Isäʼtä ucuocu iso juocuhuepa päʼö (Efesios 5:16, TNM ). Yotöcunä yo̧ä̧sa̧ ja̧ʼa̧nä̧ ucuocuätö, korotömä ttucua päʼö ʼcuäʼächiʼö ttö̧ʼä̧mä̧do̧mȩnä̧. Ja̧ʼhua̧ta̧nö̧ korotöʼinä Dios I̧huȩnȩ Isäʼtä ttäʼäcuaʼa äʼcanä ucuocuätö. Ucurumä, ¿ti̧yȩnö̧ cucuocua päʼö adiuʼa̧nö̧ ja̧ʼa̧ttö̧?

TÄCUNÄ TU̧HUO̧JUÄ̧CHÄ̧TU̧CUA̧

Dios I̧huȩnȩ Isäʼtä pä̧huä̧ rö̧jö̧nä̧ tucuocua päʼö jȩtö̧ʼa̧nö̧ jö̧ totätucua. Ucuru huo̧juȩtö̧ tti̧ʼchä̧cua̧ʼa̧ äʼcanä jo̧mȩnö̧ cu̧ja̧ päʼöʼinä, cu̧huo̧juä̧chö̧ huȩnȩ iso päiʼönä ppädacu päʼö tta̧ʼa̧nö̧ jȩcu̧ʼa̧nö̧ ja̧ʼa̧ttö̧ päʼöʼinä huo̧jui̧pi̧.

Dios I̧huȩnȩ Isäʼtä tucuocuomenä töjöʼcönä päiʼönä jȩtö̧ʼa̧nö̧ ja̧ʼa̧, koro juäi cuäcuähuä yoyojaʼa cuä̧nö̧ töjöʼcächö taʼanö.

4. Dios I̧huȩnȩ Isäʼtä eseunu cucuocua päʼö huo̧jui̧pi̧

Dios I̧huȩnȩ Isäʼtä ucuocu cu̧jä̧mä̧da̧ päʼö ʼquiyöʼa̧nö̧ ja̧ʼa̧ a̧ʼcua̧ra̧ʼa̧. Ja̧ʼhua̧nö̧ ja̧ʼa̧nä̧ Dios I̧huȩnȩ Isäʼtä tucuocua päʼö pä̧huä̧ rö̧jö̧nä̧ jȩtö̧ʼa̧nö̧ ja̧ʼa̧, cuäcuähuä tucuocö jä̧ʼi̧jö̧ yoyojaʼa tucuomenä töjöʼcaʼa jö̧ taʼanö. 1 Pedro 2:2 cucuocuätucu oʼcaʼa pi̧yȩ jähuäʼinä ucuocuäcuähuätucui:

Mo̧ro̧ jö̧ taʼanö Dios I̧huȩnȩ Isäʼtä cucuocuttumä, ¿röji ja̧ʼa̧cu̧mä̧ cujöʼcönä päiʼaʼattö ji̧nä̧ isocu cucuocua päcuhuäcuaʼa ja̧ʼa̧di̧?

Yotöcunä möäyotö Dios I̧huȩnȩ Isäʼtä ttucuocuomenä eseunu jȩtta̧ päʼö huo̧jui̧pi̧nä̧tö̧rö̧ cu̧huo̧juä̧tu̧cua̧ päʼö VIDEO topätucui. Ja̧u̧nu̧ oʼcaʼa pi̧yȩ jähuäʼinä ucuocuäcuähuätucui:

VIDEO: Möäyotö Dios I̧huȩnȩ Isäʼtä repeʼö köʼcönö totta päʼö huo̧juä̧chä̧ʼi̧jä̧tö̧ (5:33)

Möäyotö videonä räʼopätö, ¿tocu päʼö Dios I̧huȩnȩ Isäʼtä ttucuocu juiyönä ji̧na̧ʼa̧ttö̧?
Dios I̧huȩnȩ Isäʼtä mo̧ro̧ jö̧ taʼanö ttucuocua päʼö, ¿däje ppädinä̧u̧ ja̧ʼa̧ttö̧?
Dios I̧huȩnȩ Isäʼtä pä̧huä̧ rö̧jö̧nä̧ ttucuocua päʼö, ¿däje jȩtti̧na̧ʼa̧ttö̧?

Ucuocu cu̧jä̧mä̧da̧ päʼö jȩcu̧ʼa̧nö̧ jö̧:

Dios I̧huȩnȩ Isäʼtä huäjunä ttu̧huo̧juä̧chi̧ʼö̧nä̧ ppädäʼtä pojopi, jitä pä̧nä̧ ttucuocu taʼanö iso päiʼönä huȩnȩ ucuocuäʼtä. Dios I̧huȩnȩ Isäʼtä Traducción del Nuevo Mundo päʼö micuäʼtä cui̧huȩnȩnä̧ kö̧ttö̧mä̧ ucuocui.
Äcuomenäji, Dios I̧huȩnȩ Isäʼtänä ʼcuäopinö huȩnȩ cujöʼcönä jö̧ ucuocui. I̧so̧ca̧ “Dios I̧huȩnȩ Isäʼtä ucuocu ttö̧jä̧mä̧da̧ päʼö jȩttö̧ʼa̧nö̧ jö̧” päome topi.
Mo̧ro̧ jö̧ taʼanö cucuocuäji jähuä huȩyu̧ti̧. Pi̧yȩ jȩcu̧ʼa̧ päʼö i̧so̧ca̧ “Dios I̧huȩnȩ Isäʼtä chucuocu taʼanö saropö chu̧ju̧no̧mȩ” päome piʼtänä räopaʼa topi.
Aplicación JW Library^®päʼö micuaʼanä ucuocui. Cuhuäre teléfononäʼinä, tabletanäʼinä Dios I̧huȩnȩ Isäʼtä cucuocuʼa̧nö̧ ja̧ʼa̧ karaʼa cu̧ja̧ʼa̧ jö̧ttö̧ʼi̧nä̧. Ja̧ʼhua̧ta̧nö̧ ttucuocuaʼa rä̧mi̧pa̧ʼa̧ cuä̧ju̧cu̧ʼa̧nö̧ ja̧ʼa̧.
Dios I̧huȩnȩ Isäʼtä Traducción del Nuevo Mundo päʼö micuäʼtänä röji ja̧ʼa̧cu̧ räopö huo̧jui̧pi̧. Ju̧huȩnȩ cu̧ʼo̧cui̧ʼä̧cua̧jä̧ o̧ca̧hui̧yä̧ ppo̧ö̧ i̧jȩcuä̧ rö̧ȩnä̧ räopöʼinä, mapa a̧ʼcua̧jui̧yä̧ʼi̧nä̧, koro räopöʼinä. Pi̧yȩ ppädäcuaʼa Dios I̧huȩnȩ Isäʼtä köʼcächiʼönö cucuocua päʼö.

5. Dios I̧huȩnȩ Isäʼtä ucuru huo̧juȩtö̧ tti̧ʼchä̧cua̧ʼa̧ äʼcanä jo̧mȩnö̧ jȩpö̧ ku̧ni̧

Efesios 1:17 cucuocuätucu oʼcaʼa pi̧yȩ jähuäʼinä ucuocuäcuähuätucui:

Dios I̧huȩnȩ Isäʼtä cucuocuäcuaʼa äʼcanäʼinä, piʼtä cu̧mö̧nä̧ cu̧ju̧nä̧rä̧ʼtänä cu̧huo̧jui̧ʼä̧cuȩ jo̧mȩnö̧ jȩpö̧ cu̧ju̧na̧ päʼöʼinä, ¿tocu päʼö Diosrö cucuocua päʼö ja̧ʼa̧ttö̧?

Semana jö̧ taʼanö cu̧huo̧jui̧ʼö̧mä̧ ucuru ji̧nä̧ isocu adiu ppäda päʼömä, ¿däje jȩcu̧ʼa̧nö̧ ja̧ʼa̧ttö̧? Piʼtättö huo̧jui̧cuä̧ pö̧nä̧ cu̧huo̧jui̧ʼo̧mȩnä̧ pi̧yȩ jȩcu̧ʼa̧ päʼö juruhuächi:

Huo̧jui̧cuä̧ pö̧nä̧ äcuomenä päiʼönä jähuättö oʼca juiyönä obä ucuocui.
Oʼca juiyönä versículo räopö cuhuäre Dios I̧huȩnȩ Isäʼtänä baʼepö ucuocui. Ja̧ʼhua̧ta̧nö̧ versículo päömä cu̧huo̧juä̧chö̧cu̧, tta̧ʼa̧nö̧ todehuaʼattö päʼö amöcuädi.
Jäecuä ädätäcuähuä jähuäʼinä, rö̧ȩnä̧ micuäu huȩnȩʼi̧nä̧ saropi. Pi̧yȩ jȩcu̧ʼu̧ttu̧mä̧ adiu ppädäcuaʼa huo̧jui̧cuä̧ jähuä huo̧juȩcuä̧ i̧sa̧cu̧ cu̧huo̧jui̧ʼo̧mȩnä̧.

¿Cu̧huo̧juä̧ʼi̧ja̧ʼa̧?

Jeohua ötöʼcö jähuä jiʼähuätömä Dios I̧huȩnȩ oʼtä korotö rättepöttöʼinä ucuocu huo̧juȩtä̧ʼi̧jä̧tö̧jä̧. Ja̧ʼhua̧nö̧ ja̧ʼa̧nä̧ Dios I̧huȩnȩ Isäʼtä Traducción del Nuevo Mundo päʼö micuäʼtänä ucuocu tu̧huo̧jui̧ʼa̧ päʼö köʼcätöjä, Dios I̧huȩnȩ Isäʼtä mo täbocö äcuomenä tti̧huȩyu̧ti̧nö̧ taʼanö yoräteunä räopaʼattö, huäjunä ttu̧huo̧juä̧chi̧ʼa̧ päʼö ppädäʼtä ja̧ʼa̧ttö̧, Tö̧ä̧nä̧hua̧ i̧mi̧ʼi̧nä̧ räopaʼattö (jw.org internet isojättö pi̧yȩ huo̧jui̧cuä̧ topi: “¿Jeohua ötöʼcö jähuä jiʼähuätö ttamönä ttöäreʼtä Dios I̧huȩnȩ Isäʼtä ku̧nä̧rä̧tö̧ ja̧ʼa̧di̧?”).

YOTÖCUNÄ PÄʼÄTÖ: “Dios I̧huȩnȩ Isäʼtä chu̧huo̧jui̧ʼa̧ päʼö ʼquiyaʼa, rö̧ȩnä̧ jȩchö̧ ka̧ʼa̧ttö̧”.

Ucumä, ¿däje päcuhuaʼa?

CA̧CA̧TI̧PÖ̧ UCUOCUÄCUÄHUÄ

Dios I̧huȩnȩ Isäʼtä adiu ppädacu päʼö pi̧yȩ jȩcu̧ʼa̧ päʼö ja̧ʼa̧: mo̧ro̧ jö̧ taʼanö däje horanä cucuocuäcuaʼattö päʼö isojänä huȩyu̧ti̧, cucuocu jähuä cu̧huo̧juä̧chi̧ʼö̧nä̧ Dios ppädacu päʼö jäʼepi, ja̧ʼhua̧ta̧nö̧ ucuru huo̧juȩtö̧ tti̧ʼchä̧cua̧ʼa̧ äʼcanä jo̧mȩnö̧ jȩpö̧ ku̧ni̧.

Cu̧huo̧juä̧chä̧ji̧ jiʼähui

Dios I̧huȩnȩ Isäʼtä adiu ppädacu päʼö, ¿däje jȩcu̧ʼa̧ päʼö ja̧ʼa̧ttö̧?
Mo̧ro̧ jö̧ taʼanö, ¿däje horanä Dios I̧huȩnȩ Isäʼtä katä ucuocu cu̧huo̧jui̧ʼa̧ päcuhuaʼattö?
Ucuru huo̧juȩtö̧ tti̧ʼchä̧cua̧ʼa̧ äʼcanä cu̧huo̧jui̧ʼä̧cuȩ jähuä jo̧mȩnö̧ jȩpö̧ cu̧ju̧na̧ päʼö cujuruhuächöttömä, ¿tocu päʼö adihuaʼattö?

Huo̧jui̧pö̧ cäcuhuädö mo̧ro̧ huȩyu̧ti̧:

Pi̧yȩ jȩcu̧ʼa̧nö̧ ja̧ʼa̧

Koro huo̧jui̧cuä̧ jo̧mȩnö̧ jȩpö̧ cu̧ju̧na̧ päʼö isojä 47nä räopö cu̧huo̧juä̧chä̧ji̧ taʼanö jȩpi̧.

Koroʼinä jȩcu̧ʼa̧nö̧ jö̧:

Koroʼinä jȩcu̧ʼa̧nö̧ jö̧

KOROʼINÄ KA̧ʼA̧

Dios I̧huȩnȩ Isäʼtänä cucuocu ji̧nä̧ isocu ppädacu päʼö däje jȩcu̧ʼa̧nö̧ ja̧ʼa̧ttö̧ päʼö topi.

“Dios I̧huȩnȩ Isäʼtä cucuocuomenä esehui” (To̧pä̧rö̧ Jiähuäʼtä, núm. 1 2017)

Dios I̧huȩnȩ Isäʼtä cucuocua päʼö ppädöʼa̧nö̧ jö̧ huäbodäcuä jähuä topi.

“Dios I̧huȩnȩ Isäʼtä ttörö, ¿tta̧ʼa̧nö̧ ppädöʼa̧nö̧ ja̧ʼa̧ttö̧? Ucuocuäcuähuä 1: Rö̧ȩnä̧ micuäu dajö icuähuä jä̧ʼi̧nö̧ʼa̧nö̧ jö̧ Dios I̧huȩnȩ Isäʼtänä usi” (jw.org internet isojättö huo̧jui̧cuä̧)

Dios I̧huȩnȩ Isäʼtä cucuocuomenä cuesehua päʼö tta̧ʼa̧nö̧ jȩcu̧ʼa̧nö̧ ja̧ʼa̧ttö̧ päʼö topi.

“Dios I̧huȩnȩ Isäʼtä ttörö, ¿tta̧ʼa̧nö̧ ppädöʼa̧nö̧ ja̧ʼa̧ttö̧? Ucuocuäcuähuä 2: Dios I̧huȩnȩ Isäʼtä cucuocuomenä cuesehua päʼö huo̧jui̧pi̧” (jw.org internet isojättö huo̧jui̧cuä̧)

Yotöcunä Dios I̧huȩnȩ Isäʼtä recuo a̧ʼȩ jo̧mȩnä̧ ucuocuäʼijätö pättö jähuä topi.

Dios I̧huȩnȩ Isäʼtä tta̧ʼa̧nö̧ tu̧huo̧jui̧ʼö̧ʼa̧nö̧ ja̧ʼa̧ttö̧ ji̧nä̧ isocu ppädatö päʼömä (2:06)

ʼCUÄOPÖNÄ ESEUNU KÄ̧HUI̧. DIOS I̧HUȨN TTU̧HUO̧JUȨTO̧MȨN TTUCUOCUÄCUÄHUÄ PÄʼÖ JÖ̧