Dios I̧huȩnȩ Isäʼtä cu̧huo̧jui̧ʼo̧mȩnä̧ rö̧ȩnä̧ ppädaʼa. Ja̧ʼhua̧nö̧ ja̧ʼa̧nä̧ koronömä ʼquiyaʼattö jäʼecujä a̧ʼcua̧ra̧ʼa̧: “¿ji̧nä̧ isocu chu̧huo̧jui̧ʼö̧ʼa̧nö̧ ja̧ʼa̧di̧?”. Juhuaʼa yabocu cujuruhuächöttömä, ¿iso päiʼönä ppädäcuaʼa ja̧ʼa̧di̧? Surojö ʼcuäcuhuopaʼanä huo̧jui̧pö̧ cäcuhuädiʼö juiya päʼö, ¿däje ppädäcuaʼattö?

1. Dios I̧huȩnȩ Isäʼtä cu̧huo̧jui̧ʼa̧ päʼö cujuruhuächöttömä, ¿tocu päʼö adihuaʼattö?

“Dios i̧huȩnȩmä̧ ʼcuäopönä kö̧do. Ja̧ʼhua̧ta̧nö̧ ʼcuäopönä juruhuaʼado” (Hebreos 4:12). Dios I̧huȩnȩ Isäʼtämä Tö̧ä̧nä̧hua̧ amöcuädöʼinä, ucuru repeö huȩnȩʼi̧nä̧ jiähuaʼattö rö̧ȩnä̧ micuähuäʼtä. Iso päiʼönä huȩnȩ cu̧huo̧jua̧ päʼö ppädaʼa, ja̧ʼhua̧ta̧nö̧ jȩcu̧ʼä̧cuȩ adiu jȩpö̧ cuʼojopa päʼöʼinä, yodoji ʼcuäopä̧cuȩ esetö tta̧cu̧huä̧ra̧ päʼöʼinä ppädaʼa. Pi̧yȩttö̧ʼi̧nä̧ abonänö Jeohua a̧hua̧ru̧hua̧ päiʼönä cu̧ju̧nä̧ ppädaʼa. Dios I̧huȩnȩ Isäʼtä päömä juruhuaʼattö ji̧nä̧ isocu cu̧huo̧jui̧ʼo̧mȩnä̧ adiu cu̧ju̧nä̧ ppädäcuaʼa.

2. Dios I̧huȩnȩ Isäʼtänä ka̧cu̧, ¿tocu päʼö micuäu jö̧nä̧ tota päʼö ja̧ʼa̧ttö̧?

Dios I̧huȩnȩ Isäʼtä jiäu iso päiʼönä huȩnȩ ja̧ʼa̧ttö̧ rö̧ȩnä̧ micuäu dajö icuähuä jä̧ʼi̧nö̧ʼa̧nö̧ jö̧ ja̧ʼa̧. Ja̧ʼhua̧nö̧ ja̧ʼa̧ttö̧ piʼtänä jiähuaʼa: “iso päiʼönä huȩnȩ micuänä mitö ȩmi̧, pi̧yȩmä̧ yoröiso micuänä cuiyäʼ ” (Proverbios 23:23). “Pärätä ttusaʼa jö̧ taʼanö, rö̧ȩnä̧ micuäu dajö icuähuä ttusaʼa jö̧ taʼanöʼinä [iso päiʼönä huȩnȩ päö] ji̧nä̧ isocu cusuttumä” ʼquiyome päteʼö ʼcuäcuhuopaʼanä juhuaʼa yabocu cu̧huo̧juä̧cha̧ päʼö cu̧ju̧ru̧huä̧chä̧cua̧jä̧ (Proverbios 2:4, 5).

3. Ji̧nä̧ isocu cu̧huo̧jui̧ʼa̧ päʼö Jeohuamä, ¿tta̧ʼa̧nö̧ ppädäcuaʼattö?

Jeohua Uhuäbeʼäcuähuä I̧sa̧, Oʼca juiyö Ju̧ru̧hua̧, cua̧hua̧ru̧hua̧ʼi̧nä̧ ja̧ʼa̧ttö̧ ppäda päʼö pä̧huä̧ rö̧jä̧cu̧ Chutä ötöʼcö jähuä adiu cu̧huo̧jua̧ päʼö. Tö̧ä̧nä̧hua̧mä̧ ppädöʼa̧nö̧ ja̧ʼa̧ jȩcu̧ʼa̧ päʼö pä̧huä̧ rö̧jö̧nä̧ʼi̧nä̧, cujuruhuächiʼönäʼinä (Filipenses 2:13 ucuocui). Ja̧ʼhua̧nö̧ ja̧ʼa̧ttö̧ cu̧huo̧jui̧ʼa̧ päcuhuocomenäʼinä, cu̧huo̧jui̧ʼö̧ taʼanö jȩcu̧ʼa̧ päcuhuocomenäʼinä Jeohua ppä̧dä̧cua̧jä̧ toppo rö̧jö̧nä̧ jȩcu̧ʼa̧ päʼö. Ja̧ʼhua̧ta̧nö̧ ʼquiyome päteʼö ʼcuäcuhuopomenäʼinä, ucuru toʼojicu suronä jȩtto̧mȩnä̧ʼi̧nä̧ ji̧nä̧ isocu cujuruʼunä ppä̧dä̧cua̧jä̧. Juhuaʼa yabocu Dios I̧huȩnȩ Isäʼtä cu̧huo̧jui̧ʼa̧ päʼö cäcuhuädiʼö juiyönä ppädacu päʼö Jeohuarö jäʼepi (1 Tesalonicenses 5:17).

 TÄCUNÄ TU̧HUO̧JUÄ̧CHÄ̧TU̧CUA̧

4. Dios I̧huȩnȩ Isäʼtänä cu̧huo̧jui̧ʼö̧mä̧ rö̧ȩnä̧ micuäu jö̧nä̧ topi

Koronömä rö̧ȩnä̧ jȩtö̧ ka̧ʼa̧ttö̧ Dios I̧huȩnȩ Isäʼtä tu̧huo̧jui̧ʼa̧ päʼö ʼquȩʼȩpö̧ tu̧ju̧na̧ päʼö ʼquiyaʼa. ¿Däje jȩtö̧ʼa̧nö̧ ja̧ʼa̧ttö̧? Dios I̧huȩnȩ Isäʼtä päaʼa: “Korottöʼinä abonänö micuäunä jö̧mä̧ huäjunä cu̧huo̧juä̧chi̧ʼä̧tu̧cua̧ja̧, surojö juiyönä cu̧jä̧tu̧cua̧ päʼöʼinä, korotö ma̧ttä̧chö̧ juiyönä jȩcu̧ʼä̧tu̧cua̧ päʼöʼinä Cristo u̧mo̧ro̧ jubö” (Filipenses 1:10, TNM). Pi̧yȩ jähuä ucuocuäcuähuätucui:

• Ucurumä, ¿ti̧yȩ ja̧ʼa̧ttö̧ “korottöʼinä abonänö micuäunä jö̧mä̧”?

• Dios I̧huȩnȩ Isäʼtänä cu̧huo̧jui̧ʼö̧ korottöʼinä äcuomenä jȩcu̧ʼa̧ päʼö, ¿däje jȩcu̧ʼa̧nö̧ ja̧ʼa̧ttö̧?

1. I̧so̧ʼta̧nä̧ äcuomenä rȩba̧ cuȩnö̧ttö̧mä̧ inä ote oʼca juiyö ȩqui̧pö̧ juiyäcuaʼa.

2. Pärocuaʼacu äcuomenä inä ote cuȩnö̧ttö̧mä̧ rȩba̧ oʼca juiyö cuȩna̧ päʼö pa̧ja̧cuä̧chä̧cua̧ʼa̧. Juhuaʼa jö̧ taʼanö “korottöʼinä abonänö micuäunä jö̧” äcuomenä jȩcu̧ʼu̧ttu̧mä̧, koro jȩcu̧ʼa̧ päʼö jö̧ʼi̧nä̧ iso juo̧cu̧huȩpä̧cua̧jä̧.

Ujutu pi̧jä̧ ttö̧ja̧mä̧ recuä rö̧jä̧u̧jä̧ Tö̧ä̧nä̧hua̧rö̧ tu̧huo̧jua̧ päʼöʼinä, ucuo tetähuarö päʼöʼinä adiunä tö̧ja̧ päʼö. I̧huȩnȩ Isäʼtä tu̧huo̧jui̧ʼo̧mȩnä̧ ppädaʼa pi̧yȩ jȩta̧ päʼö. Lucas 11:28 cucuocuätucu oʼcaʼa pi̧yȩ jähuäʼinä ucuocuäcuähuätucui:

• Dios I̧huȩnȩ Isäʼtä huo̧jui̧cuä̧ korottöʼinä abonänö micuäu jö̧nä̧ totöttömä, ¿tocu ppädaʼattö?

 5. Ucuru toʼojicu jȩtta̧ʼa̧nä̧ huo̧jui̧pö̧ cäcuhuädiʼäʼ

6. Jeohua ppä̧dä̧cua̧jä̧ päʼö cua̧ʼcua̧ huȩnä̧ri̧

 CA̧CA̧TI̧PÖ̧ UCUOCUÄCUÄHUÄ

Koronömä Dios I̧huȩnȩ Isäʼtä cu̧huo̧jui̧ʼa̧ päʼö ʼquiyaʼa. Ja̧ʼhua̧nö̧ ja̧ʼa̧nä̧ ʼcuäopönä eseunu cu̧ja̧ päʼö ppädäcuaʼa. Ji̧nä̧ isocu Jeohuarö cua̧ʼcua̧ cu̧huȩnä̧rö̧ttö̧mä̧ adihuä juäi i̧yä̧cua̧jä̧.

Cu̧huo̧juä̧chä̧ji̧ jiʼähui

• Dios I̧huȩnȩ Isäʼtä jiäu ucurumä, ¿tocu päʼö rö̧ȩnä̧ micuähuaʼattö?

• “Korottöʼinä abonänö micuäunä jö̧” cu̧huo̧jui̧ʼö̧ oʼcaʼa, ¿däje jȩcu̧ʼa̧ päʼö ja̧ʼa̧ttö̧?

• Dios I̧huȩnȩ Isäʼtä ji̧nä̧ isocu cu̧huo̧jui̧ʼa̧ päʼömä, ¿tocu päʼö Jeohua ppädacu päʼö jäcuhuepa päʼö ja̧ʼa̧ttö̧?