Jeohuarö pä̧huä̧ rö̧jö̧tä̧ jȩta̧ pä’ömä, ¿’quiya’a ja̧’a̧di̧?... Recuätö ttö̧ja̧mä̧ ’quiya’a pä’ö amöcuädätö. Dios I̧huȩnȩ Isä’tänä ucuocua’a ya̧tȩ ji̧’qui̧cha̧hua̧ Jeohuarö pä̧huä̧ rö̧jö̧ jȩa̧ päa’anä ’quiyinäcudo pä’ö. Pidemä Josías pä’ö micuinödo. Ja̧’hua̧nö̧ ja̧’a̧nä̧ ahuaruhuä adiu jȩpö̧ ppättädinäcudo. Josías ötö’cö jähuä’inä, ahuaruhuä ttötö’cö jähuä’inä tu̧huo̧jui̧’ä̧tu̧cua̧.

Josías jä’omä Judá rȩjȩ ru̧hua̧ päi’önä ki̧nö̧do, Amón pä’ö micuinödo. Amónmä rö̧ȩnä̧ surojö jȩpi̧nö̧do, tätähuä’ca ö̧ä̧nä̧huo̧tö̧ päi’önä esetinödo. Amón ’corujuoächomenä, Josíasmä Judá rȩjȩ ru̧hua̧ päi’önä kä̧mä̧di̧nö̧do. Ja̧u̧nu̧ pä̧nä̧mä̧ Josíasmä ochonö a̧’ȩtä̧ ku̧nä̧ri̧nö̧do. ¿Jä’ö jö̧ ta’anö suronä jȩpi̧nö̧ ja̧’a̧di̧?... Suronämä jȩpo̧cö̧ pi̧nö̧.

A̧’u̧cuä̧i̧tä̧ päi’önä, Josíasmä Jeohuarö pä̧huä̧ rö̧jö̧tä̧ jȩa̧ pä’inödo. Ja̧’hua̧nö̧ ja̧’a̧ttö̧ ahuaruhuärö’inä Jeohuarö repe’ätörötä usinödo. Pitömä ppä’ädinätödo Jeohuarö pä̧huä̧ rö̧jö̧tä̧ jȩa̧ pä’ö. Josías ahuaruhuä pi̧nä̧tö̧mä̧, ¿titö ji̧na̧’a̧ttö̧?

 Pitöttö ya̧tȩmä̧ Sofonías ji̧na̧’a̧do. Pidemä Dios I̧huȩnȩ jiäcuähuä i̧sa̧ pi̧nö̧do, Judá ttö̧ja̧rö̧ ji’ähuinödo tätähuä’ca ttö̧ä̧nä̧huo̧tö̧ päi’önä ttesetöttömä suronä ’cuäopäcua’a pä’ö. Josíasmä Sofonías jiäu ä̧ju̧cui̧nö̧do, ja̧’hua̧nö̧ ja̧’a̧ttö̧ Jeohuarötä esetinödo, tätähuä’camä̧cö̧.

Ka̧ra̧ Josías a̧hua̧ru̧hua̧mä̧ Jeremías pi̧nö̧do. Jeremíasmä Josías jö̧ ta’anö yoräteunä mö̧ä̧ya̧ huinödo, Josías idepiyu tö’cö ki̧nö̧do. Jeremías’inä, Josías’inä ppä’ädäcuähuinätö Jeohuarö pä̧huä̧ rö̧jö̧tä̧ jȩpö̧ adiutä jȩtta̧ pä’ö. Pitömä rö̧ȩnä̧ repeäcuähuinätödo. Ja̧’hua̧nö̧ ja̧’a̧ttö̧ Josías ’corujuoächomenä Jeremíasmä ra̧huä̧huä̧ huȩyu̧ti̧nö̧do a̧’cua̧ tta̧huȩcua̧’a̧ttö̧.

Josías jȩi̧nö̧ttö̧mä̧, ¿däje tu̧huo̧jui̧’ö̧’a̧nö̧ ja̧’a̧ttö̧?... Josíasmä a̧’u̧cuä̧i̧tä̧ päi’önä Dios päö ta’anö jȩa̧ pä’inödo. Ja̧’hua̧nö̧ jȩa̧ pä’ömä, ahuaruhuä Jeohuarö repe’ätöcutä ö̧ja̧ pä’ö ji̧na̧’a̧do. Ucu’inä, ¿Jeohuarö pä̧huä̧ rö̧jö̧tä̧ jȩcu̧’a̧ päcuhua’a ja̧’a̧di̧? Ja̧’hua̧nö̧ ja̧’a̧ttö̧ cuahuaruhuä Jeohuarö repe’ätörötä cusa pä’ö ja̧’a̧.