Yecuhuecuomenä, ¿däje jȩcu̧’a̧nö̧ ja̧’a̧ttö̧?... Cuä’orö’inä, cua̧ju̧ru̧’i̧nä̧ jä’epöjä a̧’cua̧ra̧’a̧ ppättädacu pä’ö. Ja̧’hua̧nö̧ ja̧’a̧nä̧, ya̧tȩ kö̧ ucuru ppädö’a̧nö̧ hua̧, korotöttö’inä abonänö ju̧ru̧hua̧. ¿Piderö cu̧huo̧jua̧’a̧?... A̧’a̧, pidemä Jeohuatä ja̧’a̧. Jitämä tucuocuäcuotöjä ya̧tȩ mö̧ä̧ya̧rö̧ ’cuäopinö Dios I̧huȩnȩ Isä’tänä räopö. Pidemä huo̧jui̧nö̧do Jeohuamä ja̧u̧ru̧ ’cuäopönä ppä̧dä̧cua̧ pä’ö. Ja̧’hua̧nö̧ ja̧’a̧ttö̧ ye’ecuocö pi̧nö̧do.

Davidmä a̧’u̧cuä̧i̧tä̧ päi’önä jä̧’o̧tö̧ ttu̧huo̧juȩti̧nä̧cu̧do Jeohuarö repea pä’ö. Pi̧yȩmä̧ ppädina’a Davidrö surojö huȩnȩ yecunä ’cuäopa’anä’inä yecu juiyönä ö̧ja̧ pä’ö. Huo̧jui̧nö̧do Jeohuamä a̧hua̧ru̧hua̧ ja̧’a̧ttö̧ ppä̧dä̧cua̧ pä’ö. Ya’ate mo̧ro̧, Davidmä o̧huȩja̧tö̧rö̧ tta̧huä̧ro̧mȩnä̧, mö yähui ichi’ö ya̧tȩ ohuejarö änä ȩmi̧pi̧nö̧do. Davidmä, ¿däje jȩi̧na̧’a̧ttö̧? O’ca’anä ru’i’ö mö yähuirö cuä’ö icuinödo, u̧mö̧nä̧tä̧ cuä’ö icuinäcu a̧’cua̧ra̧’a̧. Ja̧’hua̧ta̧nö̧, oso ya̧tȩ ohuejarö ȩmi̧po̧mȩnä̧ piderö’inä cuä’ö icuinödo Davidmä. Ucu päcumä, ¿di ppädina’attö Davidrömä?... A̧’a̧, Jeohuatä ji̧na̧’a̧ ppä’ädinömä.

Koronö mo̧ro̧ Davidrö ’cuäopinö totätucua. Ji̧yȩnö̧ mo̧ro̧ Israel ttö̧ja̧ Filistea ttö̧ja̧cu̧ rohuähuinätö. Ya̧tȩ su̧ro̧da̧u̧ Filistea ttö̧ja̧ i̧sa̧ abora’atä o̧to̧pa̧ ki̧nö̧do, Goliat pä’ö micuinödo. Pidemä ya̧’ä̧huä̧’chi̧nö̧do Jeohuarö’inä, Israel ttö̧ja̧ su̧ro̧da̧u̧ru̧’i̧nä̧, pitörö pä’inödo: “¿Dijä̧ttö̧ ttöcu yecuoca’a örohuähuä̧cua̧mä̧?”. O’ca toi’önä rö̧ȩnä̧ ye’ecuinätödo, ya̧tȩ’i̧nä̧ örohuähua pä’ocö pi̧nö̧do. Pi̧yȩ ä̧ju̧cu̧ Davidmä ädätinödo Goliatrö: “Ttötä ucucu chö̧ro̧huä̧huä̧cua̧mä̧, Jeohuamä ttörö ppä̧dä̧cua̧, ucuttu’inä abonänö chu̧ju̧ru̧huä̧cua̧sä̧”, pä’inödo. Ucu päcumä, ¿Davidmä ye’ecuocö pi̧nö̧ ja̧’a̧di̧?... A̧’a̧, ye’ecuocö pi̧nö̧. Ja̧u̧nu̧ o’ca’a, ¿däje ’cuäopina’attö?

Davidmä ido’qui säyuhuo’qui cinconö o’qui ȩmi̧nö̧do, ja̧’hua̧ta̧nö̧ ya’ate i̧sa̧ i̧jȩta̧ttö̧ tä̧u̧nä̧ adicuappä ȩpi̧nö̧do, juhuappänä ido’qui icu o̧to̧pa̧cu̧ örohuähua pä’ö ’chi̧nö̧do. Goliatmä Davidrö topö ya̧’ä̧huä̧’chi̧nö̧do, ucumä mö̧ä̧ya̧jä̧ pä’ö. Ya̧huä̧huä̧’cha̧ topö David ädätinödo: “Ucumä curodäcu ichöjä, ttömä Jeohua i̧mi̧cu̧ ichösä”. Davidmä Goliat ö̧jo̧mȩcu̧ jopinödo, i̧sa̧ttö̧ adicuappänä ya’ate ido’qui ȩnä̧ji̧’ca̧ icuinödo. Ido’quimä Goliat ö’ocuoränä di’ö kä̧mä̧di̧na̧’a̧do, ’corupäi’äji’ca̧  rȩjȩcu̧ ma̧’i̧nö̧do. Filistea su̧ro̧da̧u̧ ye’ecue’u jopö tö’ipächinätödo. David mö̧ä̧ya̧ ja̧’a̧nä̧ Goliat o̧to̧pa̧ttö̧’i̧nä̧ abonänö juruhuinödo. ¿Tocu pä’ö ujuruhuina’attö pidettö’inä abonänömä?... Jeohuatä ppäda’attö juruhuinödo. Jeohuamä pide o̧to̧pa̧ttö̧’i̧nä̧ abonänö juruhuinödo.

Davidrö ’cuäopinöttömä, ¿däje tu̧huo̧jui̧’a̧’a̧ttö̧?... Jeohuamä ka̧ra̧ttö̧’i̧nä̧ abonänö ju̧ru̧hua̧ pä’ö huo̧jui̧pä̧tö̧jä̧. Ja̧’hua̧ta̧nö̧ ucu’inä cua̧hua̧ru̧hua̧. Ja̧’hua̧nö̧ ja̧’a̧ttö̧, koronö yecuhuecuomenä Jeohuamä ucuru ppädö’a̧nö̧ ja̧’a̧ yecuhuecu juiyönä.