Ji̧’qui̧cha̧hua̧ pine rä’opörö topi. Topätöjä katätä ye’ecu ö̧’a̧’a̧, ¿iso di̧? Koronö, ¿ucu’inä ye’ecuä’ijä?... Pi̧yȩ o’ca toi’önärö ’cuäopö’a̧nö̧ ja̧’a̧. Dios I̧huȩnȩ Isä’tänä jiähua’a yotöcunä Dios umöhuäyotörö ’cuäopinö huȩnȩ, yettecuinö huȩnȩ’i̧nä̧, katätä ttö̧ja̧’a̧ jä̧’i̧nö̧’a̧nö̧ ji̧nö̧ huȩnȩ’i̧nä̧. Pitöttö ya̧tȩmä̧ Elías pi̧nö̧do. Totätucua piderö däje ’cuäopina’a ja̧ pä’ö.

Elíasmä mo täbocö Israel rȩjȩnä̧ ki̧nö̧do̧, Jesús uhuäpächäcua’a ä’canä. Ja̧u̧nu̧ pä̧nä̧mä̧ Israel ttö̧ja̧ ttu̧ru̧hua̧, Acab pä’ö micuinödo, irecuamä Jezabel pä’ö micuinäjudo. Pitömä Jeohuarö, iso päi’önä ya̧tȩtä̧ Tö̧ä̧nä̧hua̧rö̧, esetocotö pi̧nä̧tö̧do. Jitötä ttamönä yapare ttö̧ä̧nä̧hua̧rö̧ ku̧nä̧ri̧nä̧tö̧do, Baal pä’ö mi̧cua̧rö̧. Israel ttö̧ja̧ttö̧ recuätö piderö esetinätödo. Jezabelmä o’ca toi’önä Jeohuarö esetätörö cuä’ö kicua pä’inäjudo, Elíasrö’inä Diosrö eseta’attö. ¿Däje jȩö̧’a̧nö̧ ji̧na̧’a̧ttö̧ Elíasmä?...

Elíasmä jopö oto tö’ipächinödo, rȩjȩ rȩba̧ jö̧nä̧ jo̧mȩ rȩbȩhui̧nö̧do, idoränä dajahuächinödo.  ¿Tta̧’a̧nö̧ pä’ö ödajahuächina’attö?... Yecua’attö. Ja̧’hua̧nö̧ ja̧’a̧nä̧ yecua pä’ömä jo̧ca̧’a̧ ji̧na̧’a̧. ¿Tta̧’a̧nö̧ pä’ö? Huo̧jui̧nö̧ Jeohuatä ja̧’a̧ ppädö’a̧nö̧ hua̧mä̧ pä’ö, täcö ä’coji ppäda’a toä’ija’attö. Koronö mo̧ro̧ Elíasmä Diosrö ucuocu jä’epinödo mo̧ro̧jä̧ra̧’a̧ttö̧ ocurä huearö pä’ö. Elías jäepäji ta’anö Diosmä ocurä hue’inödo. ¿Jeohuamä iso päi’önä rö̧ȩnä̧ ujuru ku̧nä̧rö̧ ja̧’a̧di̧? A̧’a̧, ujuru rö̧ȩnä̧ ku̧nä̧rö̧. Ja̧’hua̧nö̧ ja̧’a̧ttö̧ Elíasmä Jeohuarö a̧’cua̧ u̧huȩnä̧ra̧ pä’ö ji̧na̧’a̧.

Elías idorä jacuä ö̧ja̧’a̧ topö Jeohuamä jä’epinödo: “¿Tta̧’a̧nö̧ pä’ö po cu̧ja̧’a̧ttö̧?”. “Ucu cui̧huȩnȩ ucuocuäcuähuä ttö̧ja̧ recuätö ka̧cui̧nä̧tö̧. Ttötä katätä ki̧’ö̧sä̧. Yȩ’ȩcua̧sä̧ ttörö’inä cuä’ö tticua pä’ätö” ädätinödo. Elíasmä amöcuädinödo o’ca toi’önä Dios I̧huȩnȩ ucuocuäcuähuä ttö̧ja̧rö̧ cuä’ö icuäjätöcö̧ pä’ö. Jeohuamä päinäcudo: “Ucutä katätämä ki̧’o̧cö̧jä̧. Ttö siete milnö u̧mä̧tö̧ huotörö ku̧nä̧rö̧sä̧ chumöhuäyotö ttö̧ja̧ pä’ö. Yecuhuecuä’. Koro cuaditähuä chiyacu pä’ösä”. Pi̧yȩ Jeohua päö ä̧ju̧cuo̧mȩnä̧, ¿Elíasmä esehuina’a ja̧’a̧di̧?... A̧’a̧, esehuinödo.

Elíasrö ’cuäopinöttömä, ¿däje cu̧huo̧jui̧’ö̧’a̧nö̧ ja̧’a̧ttö̧?... Yedecua’a pä’ö’inä, katätä kö̧sä̧cö̧ pä’ö’inä cuamöcuäda pä’ömä jo̧ca̧’a̧. Recuätö Jeohuarö repe’ätörö cusa pä’ö ja̧’a̧, pitömä ucuru’inä repetta’attö. Jeohuamä rö̧ȩnä̧ ujuru ku̧nä̧rö̧, ucuru’inä ppädö’a̧nö̧ hua̧. Pi̧yȩ huȩnȩ cuä̧ju̧cuo̧mȩnä̧, ¿cuesehua’a ja̧’a̧di̧?...