Koronömä, Jeohua ötö’cö jähuä jitähuomenä ttä̧ju̧cua̧ pä’ocotömä ujuturu ya̧’ä̧huä̧’chä̧tö̧, ra̧huä̧rä̧tö̧. Pi̧yȩ ’cuäopomenä jidäu juiyö’a̧nö̧ ja̧’a̧ yedecua’a pä’ö tamöcuädö’a̧nö̧ ja̧’a̧. ¿Pi̧yȩmä̧ ucuru’inä’cuäopä’ija’a?... Dios I̧huȩnȩ Isä’tänä ucuocua’a ya̧tȩ mö̧ä̧ya̧rö̧ Jeohuarö repea’anä, täcö jidäu juiyö’a̧nö̧ ja̧’a̧ päa’anä, juhua’a yabocu Jeohua ötö’cö jähuä ji’ähuinödo pä’ö. Pidemä Jeremías pä’ö micuinödo. Pide ötö’cö jähuä tu̧huo̧jui̧’ä̧tu̧cua̧.

Jeremías mö̧ä̧ya̧ ö̧ja̧’a̧ Jeohua hueinäcu jiähua pä’ö ttö̧ja̧rö̧ suronä jȩttö̧ cättädächa pä’ö. Pi̧yȩmä̧ jȩchö̧ juiyö’a̧nö̧ ja̧’a̧ päa’attö ye’ecuinödo. Jeohuarö pä’inödo: “Jȩru̧pa̧sä̧ jidähuä̧cuȩmä̧. Ttömä mö̧ä̧ya̧tä̧ hua̧sä̧”. Ja̧’hua̧nö̧ päiyäcu Jeohua ädätinödo: “Yecuhuecuä’. Ttö ppä̧dä̧dä̧cua̧jä̧.”

 Ja̧’hua̧nö̧ ja̧’a̧ttö̧ Jeremíasmä ttö̧ja̧rö̧ ji’äu kä̧mä̧di̧nö̧do suronä jȩcu̧’ä̧tu̧cu̧ cäcuhuädi’ätucuoca’a jö̧ttö̧mä̧ Diosmä ro̧ȩpä̧cuo̧tö̧jä̧ pä’ö. Ttö̧ja̧mä̧ Jeremías päö ta’anö, ¿jȩtti̧na̧’a̧ ja̧’a̧di̧?... Jȩpo̧co̧tö̧ pi̧nä̧tö̧do. Ja̧u̧ru̧ ya̧’ä̧huä̧’chi̧nä̧tö̧do, ra̧huä̧ri̧nä̧tö̧do. Korotömä cuä’ö tticua pä’inätödo. Ja̧’hua̧nö̧ ’cuäopomenämä, ¿Jeremías yecuina’a ja̧’a̧di̧?... A̧’a̧, ye’ecuinödo. Ja̧’hua̧nö̧ ja̧’a̧ttö̧ pä’inödo: “Jeohua ötö’cö jähuämä täcö ji’ähuocösä”. Pi̧yȩ päjimä, ¿iso päi’önä jȩi̧na̧’a̧ ja̧’a̧di̧?... Jȩpo̧cö̧ pi̧nö̧do. Jeremías Jeohuarö rö̧ȩnä̧ repe’inödo. Pide ötö’cö jähuä jiäumä cä’ädi’ocö pi̧nö̧do. Ja̧’hua̧nö̧ ja̧’a̧ttö̧ Diosmä aboiyotöttö tta̧huä̧ri̧nä̧cu̧do.

Ya’ute mo̧ro̧, yotöcunä u̧mä̧tö̧ suropätömä Jeremíasrö reju jacuä icuinätödo. Piju reju jacuämä redähuatä ka̧’a̧ttö̧ ma̧’ä̧chi̧nö̧do. Jahuäju jacuämä ajiya’inä, cuäcuähuä’inä juiyina’ado. Pitö u̧mä̧tö̧mä̧ piju reju jacuättö Jeremías ’corujuoächa pä’inätödo. Ja̧’hua̧nö̧ ja̧’a̧nä̧ Jeohua jȩpi̧nö̧do korotö u̧mä̧tö̧nä̧ reju jacuättö rä’epö tticuarö pä’ö.

Jeremías jȩi̧nö̧ huȩnȩttö̧mä̧, ¿däje tu̧huo̧jui̧’ö̧’a̧nö̧ ja̧’a̧ttö̧?... Koronö yecua’a ja̧’a̧nä̧’i̧nä̧ Jeohua ötö’cö jähuämä ’cuäopönätä ji’ähuinödo. Ucu’inä Jeohua ötö’cö jähuä jicuhuähuomenä korotö pö̧nä̧mä̧ ya̧ttä̧huä̧’chö̧’a̧nö̧ ja̧’a̧, ttö̧ra̧huä̧rö̧’a̧nö̧ ja̧’a̧. Ja̧’hua̧nö̧ ’cuäopöttömä yecuhuecu’a̧nö̧ ja̧’a̧. Ja̧’hua̧nö̧ ja̧’a̧nä̧ Jeohua ötö’cö jähuä jicuhuäumä yoröiso cäcuhuädi’ä’. Jeremíasrö ppädinö ta’anö ucuru’inä ppä̧dä̧cua̧.