Ya̧tȩ mö̧ä̧ya̧ i̧mi̧ya̧rö̧ ppädinö huȩnȩ tu̧huo̧jui̧’ä̧tu̧cua̧. Pide mö̧ä̧ya̧ i̧mi̧ya̧mä̧ Jesús u̧mö̧huä̧ya̧ pi̧nö̧do, Pablo pä’ö micuinödo. Pide mö̧ä̧ya̧ i̧mi̧mä̧ jerupätöjä. Ja̧’hua̧nö̧ ja̧’a̧nä̧ huo̧juä̧tö̧jä̧ i̧mi̧ya̧ Pablorö yecuoca’a ppä’ädinödo pä’ö. ¿Pi̧yȩ ötö’cö jähuä juhua’a yabocu cu̧huo̧jua̧ päcuhua’a?...

Pablomä Jerusalén ötahuiyänä cärenä pi̧nö̧do. Jesús ötö’cö jähuä ttö̧ja̧rö̧ jiähua’attö cärenä ttötinäcudo. Yotöcunä Pablorö a̧ʼu̧tu̧ suronä jȩtta̧ päʼinätödo. Ja̧ʼhua̧nö̧ ja̧ʼa̧ttö̧ päʼinätödo: “Su̧ro̧da̧u̧ ttu̧ru̧hua̧rö̧ jitähuätucua su̧ro̧da̧u̧ Pablorö tti’cächa pä’ö ruhuotö ttö̧tä̧bo̧to̧mȩcu̧. Mä̧nä̧ jäyä tödajahuächäcuotöjä, ’cuäopomenä cuä’ö ticuarö pä’ö.”

Pablo ö̧jo̧ri̧mä̧ cuä’ö tticua pä’ö ttucuocua’a ä̧ju̧cui̧nö̧do. Pi̧yȩ ä̧ju̧cuo̧mȩnä̧, ¿däje jȩa̧ pä’ö ji̧na̧’a̧ttö̧? I̧mi̧ya̧ cärenä ö̧’o̧mȩcu̧ ’chi̧nö̧do jiähua pä’ö. Pi̧yȩ huȩnȩ ä̧ju̧cu̧ Pablo pä’inödo “su̧ro̧da̧u̧ ttu̧ru̧hua̧rö̧ ji’ähui ttörö jȩtta̧ pättö”. Pablo ö̧jo̧ri̧ su̧ro̧da̧u̧ ttu̧ru̧hua̧cu̧ ucuocua pä’ömä, ¿yecuina’a ja̧’a̧di̧?... A̧’a̧, ye’ecuinödo, su̧ro̧da̧u̧ ttu̧ru̧hua̧mä̧ ucuo i̧sa̧ ja̧’a̧ttö̧. Ja̧’hua̧nö̧ ja̧’a̧nä̧ yecuoca’a ucuocuinödo.

Su̧ro̧da̧u̧ ttu̧ru̧hua̧mä̧ Pablo ö̧jo̧ri̧ jiähua’a ä̧ju̧cui̧nö̧do. Pablo toei’ö juiya pä’ö 500nö huotö su̧ro̧da̧u̧cu̧ kara’a ötahuiyä Cesarea pä’ö micua’acu ja̧u̧tä̧ yodo ȩpö̧ tti̧’cha̧ pä’ö hue’inödo. ¿Pablomä a̧’cua̧ri̧’i̧na̧’a̧ ja̧’a̧di̧?... A̧, a̧’cua̧ri̧’i̧nö̧do. U̧mä̧tö̧ suronä jȩtta̧ pä’ätömä hueyecuinätödo.

Pi̧yȩ huȩnȩttö̧mä̧, ¿däje cu̧huo̧jui̧’ö̧’a̧nö̧ ja̧’a̧ttö̧?... Pablo ö̧jo̧ri̧ yecuoca’a jȩi̧nö̧ ta’anö ucu’inä yecuhuecuoca’a jȩcu̧’a̧nö̧ ja̧’a̧. Ujutumä o’ca toi’önä recuä rö̧jä̧u̧jä̧ Jeohua ötö’cö jähuä korotörö jitähuomenä yetecuoca’a jitähua pä’ö. ¿Yeähuä juiyönä Jeohua ötö’cö jähuä ji̧nä̧ isocu jicuhuäu’a̧nö̧ ja̧’a̧?... Yecuhuecuoca’a jicuhuäuttumä recuätö tta̧’cua̧ri̧’a̧ pä’ö ppäcuhuädö’a̧nö̧ ja̧’a̧.