¿U̧mä̧tö̧ pine rä’opätörö cu̧huo̧jua̧’a̧?... Pitömä Mateo’inä, Marcos’inä, Lucas’inä, Juan’inä, Pedro’inä, Santiago’inä, Judas’inä, Pablo’inä pä’ö micuinätödo. Pitö o’ca toi’önä Jesús ö̧ji̧nö̧ pä̧nä̧ ka̧cui̧nä̧tö̧do, Jesús ötö’cö jähuä huȩyu̧ti̧nä̧tö̧do. Pitö ttötö’cö jähuä juhua’a yabocu tu̧huo̧juä̧chä̧tu̧cua̧.

Pitöttö huämetucuämä Jesús hue’ähuotö ji̧na̧’a̧do, Jesúscu Dios I̧huȩnȩ ji’äu cue’ächinätödo. ¿Pitö huämetucuämä titö ja̧’a̧ttö̧?... Pitömä Mateo’inä, Juan’inä, Pedro’inä pä’ö micuinätödo. Mateo’inä, Juan’inä Jesúsru adiunä huo̧jui̧nä̧tö̧do,  katä pö̧nä̧ Jesús ö̧ji̧nö̧ jähuä huȩyu̧ti̧nä̧tö̧do. Juanmä Apocalipsis cuyäru’tä’inä, huäbodäcuä cuyäru ojiyä’inä huȩyu̧ti̧nö̧do, pi̧yȩ cuyäru ojiyä Primera de Juan, Segunda de Juan, Tercera de Juan pä’ö o’ätöjä. Pedromä tojäre cuyäru ojiyä huȩyu̧ti̧nö̧do, pi̧yȩ cuyäru ojiyä Primera de Pedro, Segunda de Pedro pä’ö o’ätöjä. Segunda de Pedro cuyäru isojänä, Pedro huȩyu̧ti̧nö̧do Jeohua mo̧ro̧jä̧ra̧’a̧ttö̧ Jesús ötö’cö jähuä ucuocuinö huȩnȩ: “Pidemä ttö Chi̧tti̧ rȩni̧ʼa̧. Ja̧u̧ru̧ juiyo eseusä”, pä’inödo.

Korotö u̧mä̧tö̧ pine rä’opätömä Jesús ötö’cö jähuä huȩyu̧ti̧nä̧tö̧do. Pitöttö ya̧tȩmä̧ Marcos. Pidetä a̧’cua̧ra̧’a̧ Jesúsru ’chuttädomenä o’ca juiyö ’cuäopa’a topinömä. Ka̧ra̧mä̧ Lucas ji̧na̧’a̧. Pidemä jahuäpö ru̧hua̧ ji̧na̧’a̧, Jesúsru esetinödo. Pidemä Jesús ’corujuoächinö o’ca’a Jesús u̧mö̧huä̧ya̧ juo’inö a̧’cua̧ra̧’a̧.

Jesús amönä ö̧jä̧hua̧tö̧ ta̧ju̧ Chutä ötö’cö jähuä huȩyu̧ti̧nä̧tö̧do. ¿Pitö tti̧mi̧ cu̧huo̧jua̧’a̧?... Micuinätödo Santiago *, Judas. Äcuomenäjitä päi’önä Jesús u̧huo̧juȩtö̧ esetocotö pi̧nä̧tö̧do. Amöcuädinätö Jesúsmä ja̧’a̧tä̧ra̧’a̧ juo’ächö pä’ö. Ja̧’hua̧nö̧ ja̧’a̧nä̧ recuo ’cuäopinö o’ca’a Jesúsru esetätinätödo.

Ka̧ra̧ Dios I̧huȩnȩ Isä’tä huȩyu̧ti̧nö̧mä̧ Pablo ji̧na̧’a̧, pide a̧’cua̧juä̧ pinetä räopa’a. Jesúsru esetäcua’a ä’canä i̧mi̧mä̧ Saulo pä’ö micuinödo. Jesúsru esetätörö a̧’u̧tu̧ rö̧ȩnä̧ surojö jȩpi̧nö̧do. ¿Tta̧’a̧nö̧ pä’ö Pablomä Jesúsru esetö ö̧jä̧mä̧di̧na̧’a̧ttö̧?... Ya’ute mo̧ro̧ Damasco ötahuiyära̧’a̧ i̧’cho̧mȩnä̧, ya̧tȩ mo̧ro̧jä̧ra̧’a̧ttö̧ ucuocua’a ä̧ju̧cui̧nö̧do. Pide ucuocumä Jesucristotä ji̧na̧’a̧do. ¿Tta̧’a̧nö̧ pä’ö ttörö esetätörö cua̧’u̧ta̧’a̧ttö̧? jä’epinödo Pablorö. Pablo ttu̧’ȩpä̧ri̧’i̧nö̧do chöʼärohuächa päʼö ja̧ʼa̧ päʼö. Ja̧hua̧nö̧ ja̧ʼa̧ttö̧ Jesúsru esetö kä̧mä̧di̧nö̧do. Pablomä 14nö jo̧mȩnä̧ Dios I̧huȩnȩ o’tä huȩyu̧ti̧nö̧do, Romanos cuyäru’tättö kä̧mä̧dö̧ Hebreos cuyäru’tä jubö cä’ädinödo.

Dios I̧huȩnȩ Isä’tänä mo̧ro̧ jö̧ ta’anö, ¿däje jȩta̧ pä’ö ja̧’a̧ttö̧?... A̧’a̧, tucuocua pä’ö ja̧’a̧. Pi’tänä tucuocuomenä Jesús ötö’cö jähuä rö̧ȩnä̧ tu̧huo̧juä̧chä̧cuo̧tö̧jä̧. Ucu’inä, ¿Jesús ötö’cö jähuä juhua’a yabocutä cu̧huo̧jui̧’a̧ päcuhua’a?...