Tamöcuädätucua Jericó ötahuiyänä tö̧ja̧cua̧’a̧, Canaán rȩjȩnä̧. Pine ka̧cuä̧tö̧ ttö̧ja̧mä̧ Jeohuarö esetocotö, pine kä̧ju̧ yajute isaju i̧mi̧cu̧nä̧ amöcuädäju, Rahab pä’ö micuäju.

Rahabmä ka̧’u̧cuä̧i̧tä̧ päi’önä Jeohua jȩi̧nö̧ huȩnȩ ä̧ju̧cui̧nä̧ju̧do. Tuhuora dubora ’quȩ’ȩpö̧ icu Israel ttö̧ja̧ ’cuättopinö huȩnȩ’i̧nä̧, Egipto rȩjȩttö̧ rä’epö icuinö huȩnȩ’i̧nä̧, pitö ttaboiyotöcu ttörohuähuomenä ppädinö huȩnȩ’i̧nä̧ ä̧ju̧cui̧nä̧ju̧do. Jitämä ä̧ju̧cuä̧ju̧ Israel ttö̧ja̧mä̧, yajutä kidepiyu, Jericó ötahuiyä tö’cö ka̧cuä̧tö̧ pä’ö.

Ya’ate yodo, Israel ttö̧ja̧ttö̧ u̧mä̧tö̧ ta̧ju̧ yä̧huä̧i̧nä̧ Jericó ötahuiyä rȩjȩ usäu do’ächätö, Rahab kojusodenä rȩbȩhuä̧tö̧. Ja̧u̧tä̧ yodo ä̧ju̧cu̧ Jericó ttö̧ja̧ ttu̧ru̧hua̧, u̧mä̧tö̧ yä̧huä̧i̧nä̧ ötahuiyänä do’ächäjätö rȩjȩ ttusähua pä’ö, Rahab kojusodenä ka̧cuä̧tö̧. Ja̧’hua̧nö̧ ja̧’a̧ttö̧, pide umöhuäyotörö hue’ö ’chuttäda pä’ö. Rahabmä pitö rȩjȩ usäu ichätörö kojusode huäme dajicuäju, ru̧hua̧ umöhuäyotörö pä’äju: “rȩjȩ usäu ichäjätömä täcö toa’a, i̧huä̧jä̧tö̧. Jahuätö tto’ca’anä cui̧’chä̧tu̧cu̧ttu̧mä̧ cui̧rȩbȩhuä̧cuo̧tö̧jä̧ ’chucuhuädätucua pä’ö”. Rȩjȩ usäu ichäjätörömä, ¿tta̧’a̧nö̧ pä’ö ppäjäda’attö Rahabmä?... Jeohuarö keseta’attö. Jeohuamä Israel ttö̧ja̧rö̧ Jericó ötahuiyä’inä, o’ca juiyö Canaán rȩjȩ’i̧nä̧ i̧yä̧cua̧ pä’ö huo̧juä̧ju̧.

Rȩjȩ usäu ichäjätömä, Rahab kojusodettö rättopächäcua’a ä’canä pä’ätödo: “Jericó ötahuiyä Dios si’epö icuomenä ucu cuahuaruhuäcu cu̧ji̧pä̧cuä̧ju̧jä̧”. Rahab ka̧’cua̧ri̧’a̧ pä’ömä koro jȩja̧ pä’ö ja̧’a̧. ¿Däje jȩja̧ pä’ö ja̧’a̧ttö̧?... rȩjȩ usäu ichäjätömä pä’ätö: “isappä tuhuoppä äcuädö cu̧na̧ pä’ö ja̧’a̧ cuhuäre ventananä, cuahuaruhuärö ca̧ca̧tö̧ cuojusodera̧’a̧ docuhuäda pä’ö ja̧’a̧”. Yajumä, jahuätö huettäji ta’anö jȩpä̧ju̧. ¿Cu̧huo̧jua̧’a̧ ja̧u̧nu̧ o’comenä ’cuäopinömä?...

Recuo mo̧ro̧ ’cuäopäji o’ca’a, Israel u̧mä̧tö̧ Jericó ötahuiyä jäyänä sobötö ’corujuäinä cue’ächätö. Seisnö mo̧ro̧ jo̧mȩnä̧ cue’ächätö, ya’ate mo̧ro̧mä̧ ya’atenätä sobötö cue’ächätö. Ja̧’hua̧nö̧ ja̧’a̧nä̧, ya’ate semana päi’omenä ötahuiyä jäyänä sobötö cue’ächätö sietenö jo̧mȩnä̧. Ja̧u̧nu̧ o’ca’a pä̧i̧cu̧nä̧ huopätö. Ja̧’hua̧nö̧ jȩtto̧mȩnä̧ Jeohuamä pi̧yȩ ötahuiyä ttoecu ma̧ä̧chö̧nä̧ jȩpö̧. ¿Däje ’cuäopäja’attö Rahab kojusodemä?  Ventananä isappä tuhuoppä äcuädäcuähua’a ra̧’a̧ttö̧ podemä ma̧ä̧cho̧ca̧’a̧ ja̧. ¿Pojä isojänä juhuappä isappä tocu’a’a ja̧’a̧di̧?... Ja̧’hua̧nö̧ jȩpö̧ Rahab kahuaruhuäcu a̧’cua̧ri̧nä̧ju̧.

Rahab jȩji̧nö̧ttö̧mä̧, ¿däje tu̧huo̧jui̧’ö̧’a̧nö̧ ja̧’a̧ttö̧?... Rahabmä Dios o’ca juiyö umöhuäyotörö ppädinö ä’coji kä̧ju̧cui̧nö̧nä̧ ppädinäcua Jeohuarö adiu ka̧’cua̧ ku̧huȩnä̧ra̧ pä’ö. Ucu’inä Jeohua ötö’cö jähuä rö̧ȩnä̧ huo̧jui̧pö̧jä̧. Rahab esetö jȩji̧nö̧ ta’anö, ¿ucu’inä esetö jȩcu̧’a̧nö̧ ja̧’a̧?... A̧’a̧, ja̧’hua̧nö̧ jȩcu̧’ä̧cua̧jä̧ pä’ö huo̧juä̧tö̧jä̧.