Rebecamä adihuä isaju pi̧nä̧ju̧, Jeohuarö repe’inäju. Ja̧’hua̧ta̧nö̧ kirecuo Isaac’inä Jeohuarö repe’inödo. ¿Tta̧’a̧nö̧ tottäcuähuina’attö Rebeca Isaacumä? ¿Tta̧’a̧nö̧ ki̧jȩpi̧na̧’a̧ttö̧ Rebecamä Jeohua eseunä jȩja̧ pä’ömä? Pi̧yȩ ötö’cö jähuä tu̧huo̧jui̧’ä̧tu̧cua̧.

Isaac jä̧’o̧tö̧mä̧ Abrahán’inä, Sara’inä pä’ö micuinätödo. Jahuätömä Canaán rȩjȩnä̧ ka̧cui̧nä̧tö̧do. Pȩnȩ ka̧cuä̧tö̧ ttö̧ja̧mä̧ Jeohuarö esetocotö pi̧nä̧tö̧. Ja̧’hua̧nö̧ ja̧’a̧nä̧, Abrahánmä pä̧huä̧ rö̧ji̧nä̧cu̧ chutä i̧tti̧ irecuarö ȩma̧ pä’ö isaju Jeohuarö esetäjurutä. Ja̧’hua̧nö̧ ja̧’a̧ttö̧ Abrahánmä chutä u̧mö̧huä̧ya̧ru̧ hue’inödo, pide Eliezer pä’ö micuinö a̧’cua̧ra̧’a̧, piderö hue’inö Harán rȩjȩra̧’a̧ chutä Abrahán ahuaruhuä ttö̧ja̧cuo̧mȩttö̧, Isaac irecuarö ö̧’o̧cui̧’a̧ pä’ö.

Eliezermä korotö Abrahán umöhuäyotöcu oto ’chi̧nö̧do. Jahuätömä 10nö ca̧mȩyo̧tö̧rö̧ o’ipinätödo cuäcuähuä’inä, koro juäi mippoönä ttiyä̧cuȩ’i̧nä̧ ttȩpa̧ pä’ö. ¿Tta̧’a̧nö̧ ö̧’o̧cui̧’ä̧cua̧’a̧ ji̧na̧’a̧ttö̧ Isaac irecuarömä? Harán rȩjȩra̧’a̧ Eliezer korotö Abrahán umöhuäyotöcu tti̧rȩbȩhuo̧mȩnä̧mä̧, reju ajiya acuäju ko̧mȩ ’cuä’ächi’ö pä̧mä̧di̧nä̧tö̧do, Eliezer huo̧jui̧nö̧do nä̧tö̧ ajiya huä’ö ttichäcuotö piju rejuttu pä’ö. Ja̧u̧mä̧ Jeohuarö jä’epö pä’inödo: “Yajute möäyajuru jä̧dȩpä̧cua̧sä̧ ajiya kiyattö pä’ö. Ttörö iyö, chä̧ji̧mö̧ ca̧mȩyo̧tö̧rö̧’i̧nä̧ kiyöttömä, pajutä ja̧’a̧ isaju cuȩmä̧cua̧ju̧mä̧”.

Diosrö ucuocu cädäcua’a ä’canämä, Rebeca ichi’inäjudo reju ko̧mȩcu̧. Dios I̧huȩnȩ  Isä’tänä päa’a yaju rö̧ȩnä̧ a̧’cua̧cui̧nä̧ju̧. Eliezermä ajiya ahua pä’ö jäepomenä ädätinäjudo: “Ye, poya ajiyattö ahui, cuä̧ji̧mö̧ ca̧mȩyo̧tö̧rö̧’i̧nä̧ ajiya ttahua pä’ö huä’ö chiyäcuajusä”. Ca̧mȩyo̧tö̧ rö̧ȩnä̧ ttahua a̧di̧ rö̧jo̧mȩnä̧mä̧ rö̧ȩnä̧ ajiya ahuätö, ja̧’hua̧nö̧ ja̧’a̧ttö̧ Rebecamä ajiya rö̧ȩnä̧ ppa̧’ä̧chä̧rö̧ huä’inäju rejuttu. Ä’coji isojä a̧’cua̧juä̧nä̧ räopö topi. ¿Rebeca rö̧ȩnä̧ kadita’a tocu’a’a ja̧’a̧di̧?... Eliezer Jeohuarö jäepäjimä Rebecanä ’cuäopa’a topö, nö̧’ä̧chi̧pö̧ to̧pä̧ri̧nö̧do.

Eliezermä Rebecarö koro juäi rö̧ȩnä̧ a̧’cua̧cu̧ mippoönä iyinödo. Yajumä Eliezerö’inä, Eliezercu ichäjätörö’inä kahuaruhuä ttojusodera̧’a̧ tti̧’cha̧ pä’ö o’ipinäjudo. Ja̧u̧mä̧ jahuätörö ji’ähuinödo “chu̧ru̧hua̧ Abrahán hueäjäcusä po Haránra̧’a̧ chicha pä’ö, Isaac irecuarö chö̧’o̧cui̧’a̧ pä’ö”, ja̧’hua̧ta̧nö̧ “Jeohuarö jädepäji ta’anötä Rebeca jȩja̧’a̧ tochomenä Jeohuamä ädätäjäcusä” pä’ö ji’ähuinödo. Pi̧yȩ ucuocua’a ttä̧ju̧cuo̧mȩnä̧ rö̧ȩnä̧ esehuinätödo. Eliezerö pä’inätödo: “Ȩpi̧ju̧ Isaac irecua päi’önä kö̧ja̧ pä’ö”.

Ja̧’hua̧nö̧ ja̧’a̧nä̧, ¿Rebecamä Isaacu kö’cähua pä’ö kamöcuädina’a ja̧’a̧di̧? ¿däje cuamöcuäda’attö?... Kahuaruhuä pi̧yȩ jättepomenä a̧’a̧ pä’inäju. ¿Tta̧’a̧nö̧ pä’ö? Rebecamä Jeohuatä ja̧’a̧ Eliezerö hue’äjimä pä’ö huo̧jui̧nä̧ju̧do. Ja̧’hua̧nö̧ ja̧’a̧ttö̧, Eliezercu Canaánra̧’a̧ ’chi̧nä̧ju̧do, täcö tti̧rȩbȩhuo̧mȩnä̧ Isaacu ö’cähuinäjudo.

Rebecamä Jeohuarö pä̧huä̧ rö̧jö̧tä̧ jȩpi̧nä̧ju̧do. Ja̧’hua̧nö̧ ja̧’a̧ttö̧ Diosmä yajuru adiu tta̧’ä̧ri̧nö̧do. Pi̧yȩtä̧mä̧ jȩpo̧cö̧ pi̧nö̧do. Ja̧’hua̧ta̧nö̧, yaju kahuaruhuä o’cotöttö ichinö Jesúsmä. Rebeca Jeohuarö pä̧huä̧ rö̧jö̧tä̧ jȩji̧nö̧ ta’anö jȩcu̧’u̧ttu̧mä̧, ucuru’inä adiu tta̧huä̧rä̧cua̧.