Samuelmä, a̧’u̧cuä̧i̧tä̧ päi’önä isode isotö tti̧jȩti̧yu̧ttu̧’i̧nä̧, i̧sä̧ta̧ttö̧’i̧nä̧ ’tö̧’ö̧ adicuodenä, Jeohua ojusodenä kä̧nö̧ aditä’inödo. Podenämä ttö̧ja̧ ja̧u̧nu̧ pä̧nä̧mä̧ ’chä̧’i̧nä̧tö̧do isotörö iyö sacerdote huotö ku icu ttiya pä’ö, Diosrö ucuocu ttesehua pä’ö. ¿Tta̧’a̧nö̧ pä’ö Samuelmä pine ö̧ji̧na̧’a̧ttö̧? Äcuomenäji, Samuel ja̧ju̧ kötö’cö jähuä totätucua, Ana pä’ö micuaju.

Anamä ki̧tti̧cua̧ päja’anä, ki̧tti̧mö̧ to’inäjudo. Ja̧’hua̧nö̧ ja̧’a̧ttö̧ ki̧tti̧cua̧ pä’ö pä̧huä̧ rö̧ji̧nä̧cua̧do. Diosrö ucuocu jä’epinäjudo ppädaju pä’ö. Pä’inäjudo: “Chi̧tti̧rö̧ chu̧ju̧nä̧rö̧ttö̧mä̧ huedäcuajusä ucu cuojusodera̧’a̧ kä̧nö̧ adita pä’ö cuojusode jähuä”. Jeohuamä jäjepäji iyinödo, yajumä recuo mo̧ro̧ ’cuäopinö o’ca’a ki̧tti̧rö̧ ku̧nä̧ri̧nä̧ju̧do. Piderö Samuel pä’ö o’inäjudo. Ana päjinö ta’anö jȩpi̧nä̧ju̧do, Samuel täcö pa̧ja̧cuä̧nö̧ a̧’ȩ u̧ju̧nä̧rä̧cua̧’a̧ ä’canä Jeohua ojusodera̧’a̧ ȩpi̧nä̧ju̧do pine adita pä’ö.

Sacerdotes huotö ttu̧ru̧hua̧ Jeohua ojusodenä aditinömä, Elí pä’ö micuinödo. Pidemä Diosrö jä’epö ucuocu pi̧jä̧ ttö̧ja̧rö̧ ppäda pä’ö jȩpö̧ ku̧nä̧hua̧ pi̧nö̧do. Elímä i̧tti̧mö̧ ta̧ju̧ tä̧mö̧rö̧ ku̧nä̧ri̧nö̧do, pitö’inä podenätä aditinätödo. Jeohua ojusodera̧’a̧ ttö̧ja̧ ’chä̧’i̧nä̧tö̧ Diosrö ucuocu ttesehua pä’ö. Ja̧’hua̧nö̧ ja̧’a̧ttö̧, podenä kä̧tö̧mä̧ suronä jȩtto̧ca̧’a̧ adiunätä ttö̧ja̧ pä’ö ji̧na̧’a̧. Ja̧’hua̧nö̧ ja̧’a̧nä̧, Elí i̧tti̧mö̧ rö̧ȩnä̧ surojö jȩtta̧’a̧ Samuel topinödo. ¿Samuel’inä pitö jȩtti̧nö̧ ta’anö suronä jȩi̧na̧’a̧ ja̧’a̧di̧?... Suronä jȩpo̧cö̧ pi̧nö̧do. Jeohuarö pä̧huä̧ rö̧jö̧tä̧ jȩpi̧nö̧do, jä̧’o̧tö̧ ttu̧huo̧juȩti̧nö̧ ta’anö.

Elímä, ¿i̧tti̧mö̧rö̧ ro̧ȩpa̧ pä’ö ji̧na̧’a̧ ja̧’a̧di̧? ¿däje cuamöcuäda’attö?... A̧’a̧, ro̧ȩpa̧ pä’ö ji̧na̧’a̧. Dios ojusodenä ja̧’a̧tä̧ ttadita’anä jaroa pä’ömä jo̧ca̧’a̧ ji̧na̧’a̧. Ja̧’hua̧nö̧ ja̧’a̧nä̧ Elímä i̧tti̧mö̧rö̧ ro̧ȩpo̧cö̧ pi̧nö̧do. Ja̧’hua̧nö̧ ja̧’a̧ttö̧, Jeohuamä piderö’inä, i̧tti̧mö̧rö̧’i̧nä̧ ra̧huä̧rö̧ ro̧ȩpa̧ pä’ö amöcuädinödo.

Ya’ate yodo, Samuel äa’anä ya̧tȩ huoinäcudo “Samuel”. Pi̧yȩ ä̧ju̧cuo̧mȩnä̧ Elí ö̧ja̧’a̧cu̧ ’chi̧nö̧do. Ja̧’hua̧nö̧ ja̧’a̧nä̧ Elímä pä’inödo “ttömä huopocö päjisä”. Pi̧yȩmä̧ todärenä jo̧mȩnä̧ ’cuäopinäcudo. Huäbodäcuä päi’önä ’cuäopomenä, Elí  pä’inödo Samuelrö: “pä’äji ta’anö ucuocua’a cuä̧ju̧cu̧ttu̧mä̧, “Jeohua ji’ähuittö, chä̧ju̧cuä̧cu̧jä̧” pä’ö ädäti”, pä’inödo. Elí hueäji ta’anö jȩo̧mȩnä̧, Jeohua päinäcudo: “Elírö ji’ähui: ucuru’inä, cuahuaruhuärö’inä ro̧dȩpä̧cua̧sä̧ suronä jȩcu̧’ä̧’i̧jä̧tu̧cu̧ ta’anö”. Samuel Elírö pi̧yȩ huȩnȩ jiähua pä’ömä, ¿yecuoca’a ji̧na̧’a̧ ja̧’a̧di̧?... Ye’ecuinödo pi̧yȩ jiähua pä’ömä. Ja̧’hua̧nö̧ ja̧’a̧nä̧ Jeohua hueinö ta’anö jȩpi̧nö̧do. Jeohua päinömä ’cuäopina’a: Elí’inä, i̧tti̧mö̧ ta̧ju̧’i̧nä̧ ’corujuo’ächinätö.

Samuel jȩi̧nö̧ttö̧ rö̧ȩnä̧ tu̧huo̧jui̧’ö̧’a̧nö̧ ja̧’a̧. Korotö ttö̧ja̧ suronä jȩtta̧’a̧nä̧’i̧nä̧, ’cuäopönä Jeohuarö pä̧huä̧ rö̧jö̧tä̧ jȩpö̧ ki̧nö̧do. Ucu’inä, ¿Samuel jȩi̧nö̧ ta’anö jȩcu̧’ä̧cua̧’a̧ ja̧’a̧di̧? ¿Jeohuarö pä̧huä̧ rö̧jö̧tä̧ jȩcu̧’ä̧cua̧’a̧ ja̧’a̧di̧? Ja̧’hua̧nö̧ jȩcu̧’u̧ttu̧mä̧, Jeohuarö’inä, cuä̧’o̧tö̧rö̧’i̧nä̧ tteseunä jȩcu̧’ä̧cua̧jä̧.