HUO̧JUI̧CUÄ̧ 13
Timoteomä ttö̧ja̧rö̧ ppäda pä’ö pä̧huä̧ rö̧ji̧nä̧cu̧do
Mö̧ä̧ya̧ Timoteomä rö̧ȩnä̧ esehuinödo korotörö ppädomenä. Korome pö̧nä̧ ’chä̧’i̧nö̧do korotö ttö̧ja̧rö̧ ppäda pä’ö. Ja̧’hua̧nö̧ ja̧’a̧ttö̧ eseunu ki̧nö̧do. ¿Pide ötö’cö jähuä juhua’a yabocu jidähuacu päcuhua’a?...
Timoteo ja̧ju̧’i̧nä̧, jä̧da̧’i̧nä̧ ttu̧huo̧juȩti̧nä̧cu̧do Jeohua ötö’cö jähuä
Listra ötahuiyättö pöttächinödo Timoteomä. A̧’u̧cuä̧i̧tä̧ päi’önä jä̧da̧ Loida’inä, ja̧ju̧ Eunice’inä Jeohua ötö’cö jähuä ttu̧huo̧juȩtä̧’i̧nä̧cu̧do. Ja̧’hua̧nö̧ ja̧’a̧ttö̧ böo juoö ta’anö ppäda pä̧huä̧ rö̧ji̧nä̧cu̧ ttö̧ja̧ Jeohuarö ttu̧huo̧jua̧ pä’ö.
Timoteo mö̧ä̧ya̧ ö̧jo̧mȩnä̧ Pablo pä’inödo Timoteorö kara’a ti̧’cha̧ Dios I̧huȩnȩ jitähuaja. Timoteomä rö̧ȩnä̧ esehuinödo, “A̧’a̧ ucucu chi̧’cha̧ pä’ösä” pä’inödo, ttö̧ja̧rö̧ ppäda päa’attö.
Timoteomä Pablocu Grecia rȩjȩra̧’a̧ ’chi̧nö̧do, ötahuiyä Tesalónica pä’ö micuome. Tti̧rȩbȩhua̧ pä’ömä oto ji̧na̧’a̧do. Ja̧’hua̧nö̧ ja̧’a̧ttö̧, ttö̧jä̧pö̧nä̧’i̧nä̧, huoi’canä’inä ’chi̧nä̧tö̧do. Recuo ’cuäopinö o’ca’a rȩbȩhui̧nä̧tö̧do, recuätö ttö̧jä̧rö̧ ppäʼädinätödo Jeohuarö ttu̧huo̧jua̧ pä’ö. Ja̧’hua̧nö̧ ja̧’a̧nä̧, korotö pö̧nä̧mä̧ rö̧ȩnä̧ ra̧huä̧rö̧ suronä jȩtta̧ pä’inätödo Pablorö’inä, Timoteorö’inä. Ja̧’hua̧nö̧ ja̧’a̧ttö̧ pitömä kara’a ’chi̧nä̧tö̧do Dios I̧huȩnȩ jittähua pä’ö.
Timoteomä eseunu ki̧nö̧do
Recuätö kä̧hua̧tö̧ ’cuättopäji’ca, Pablomä Timoteorö pä’inödo pä’äji ta’anö Tesalónica ötahuiyära̧’a̧ ppa̧huä̧cha̧ pä’ö, pine ötahuiyänä ka̧cuä̧tö̧ ö̧jä̧hua̧tö̧rö̧ u̧huo̧jua̧ pä’ö. Pine ötahuiyämä ra̧huȩpi̧ji̧na̧’a̧do Jesúsru esetätörö rö̧ȩnä̧ ra̧huä̧rö̧ suronä jȩttä̧’i̧ja̧’a̧ttö̧. Ja̧’hua̧nö̧ ja̧’a̧nä̧, Timoteomä yecuoca’a ’chi̧nö̧do, ö̧jä̧hua̧tö̧ Jesúsru esetätörö a̧’cua̧ roecua’attö. Pablo ö̧ja̧’a̧cu̧ ppa̧huä̧cho̧mȩnä̧ ji’ähuinödo ji̧nä̧ jitä päi’önä Jeohua aditähuänä aditö ka̧cuä̧jä̧tö̧ pä’ö.
Timoteomä Jeohua aditähuänä recuo a̧ʼȩ aditinödo Pablocu. Ja̧’hua̧nö̧ ja̧’a̧ttö̧ ya’atenä Pablomä huȩyu̧ti̧nö̧do Timoteo jö̧’a̧nö̧ hua̧mä̧ toa’a, Congregaciónä ka̧cuä̧tö̧rö̧ ppäda pä’ömä. Timoteomä Jeohuarö’inä, ttö̧ja̧rö̧’i̧nä̧ rö̧ȩnä̧ repe’önö topinödo.
¿Ucu’inä ttö̧ja̧rö̧ repe’önö tocu’a’a ja̧’a̧di̧? ¿Jeohua ötö’cö jähuä ttu̧huo̧jui̧’a̧ pä’ö ppäcuhuäda päcuhua’a?... Pi̧yȩ jȩcu̧’u̧ttu̧mä̧, ucu’inä korotörö ppäcuhuädomenä eseu cu̧jä̧cua̧jä̧, Timoteo esehuinö ta’anö.
DIOS I̧HUȨNȨ ISÄ’TÄNÄ TUCUOCUÄTUCUA
