¿Ya̧tȩ ucuru korotö ttieru huȩnȩ ji’ähuinö ja̧’a̧di̧?... * Dios I̧huȩnȩ Isä’tä jiähua’a rö̧ȩnä̧ micuäu huȩnȩ Diosttö ichö jähuä, pi̧yȩ huȩnȩ ä’cojimä ya̧tȩ’i̧nä̧ jerupinödo. Ja̧’hua̧nö̧ ja̧’a̧ttö̧ pi’tänä päa’a pi̧yȩ huȩnȩ “ttö̧ja̧ ttieru huȩnȩ” ji̧na̧’a̧. Ángeles huotö’inä pi̧yȩ huȩnȩ ttä̧ju̧cua̧ pä’inätödo. Ucu’inä, ¿pi̧yȩ huȩnȩ cu̧huo̧jua̧ päcuhua’a?...

Mo, mo täbocö, Diosmä äcuomenä ttö̧ja̧ i̧sa̧rö̧’i̧nä̧, äcuomenä ttö̧ja̧ isajuru’inä aditinödo. ¿Tta̧’a̧nö̧ ttimicuina’attö?... Adán’inä, Eva’inä. Pitörö Diosmä ku̧ni̧nö̧ rȩjȩ juiyo a̧’cua̧cuo̧mȩ, Edén pä’ö micuome ttö̧ja̧cua̧ pä’ö. Adán’inä, Eva’inä Dios päö ta’anö jȩtti̧nö̧ttö̧mä̧, ju̧huȩnȩ ’cuäopönätä ttö̧ja̧ pä’ö ji̧na̧’a̧, jahuätö’inä, tti̧tti̧mö̧’i̧nä̧ pi̧jä̧ o’ca juiyönä a̧’cua̧cu̧nä̧ ttaditö’a̧nö̧ ji̧na̧’a̧, jahuätö ttö̧jo̧mȩ jö̧ ta’anö yoräteunä päi’a pä’ö. Ja̧’hua̧nö̧ ja̧’a̧nä̧ pi̧yȩmä̧ ’cuäopoca’a ji̧na̧’a̧. ¿Tta̧’a̧nö̧ pä’ö?

Adán’inä, Eva’inä Diosrö ttesetoca’a ji̧na̧’a̧ttö̧. Ja̧’hua̧nö̧ ja̧’a̧ttö̧, jitä pä̧nä̧mä̧ pi̧jä̧ rȩjȩ a̧’cua̧cuo̧mȩ ko̧co̧tö̧jä̧. Ja̧’hua̧nö̧ ja̧’a̧nä̧, Chutä Dios pä’inö pärotö i̧cuä̧cuȩ pi̧jä̧ rȩjȩ adihuome päi’önä o’ca toi’önä ttö̧ja̧ eseu ’cuäopönätä ttö̧ja̧cua̧ pä’ö. ¿Tta̧’a̧nö̧ jȩä̧cua̧’a̧ttö̧ pi̧yȩmä̧? Recuo mo̧ro̧ ya̧tȩ’i̧nä̧ jerupinö.

Jesús pi̧jä̧ rȩjȩnä̧ ö̧ji̧nö̧ pä̧nä̧mä̧, ja̧u̧ ttieru huȩnȩ ötö’cö jähuämä yabocutä huo̧juȩti̧nö̧do. Pi̧yȩ huȩnȩmä̧ Dios Uruhuo ja̧’a̧ pä’ö huo̧juȩti̧nö̧do. Jesús umöhuäyotörö pä’inödo Diosrö jättepönä Dios Uruhuo ichäcua’a̧nö̧. Pi̧yȩ ruhuotä ja̧’a̧ pi̧jä̧ rȩjȩ a̧’cua̧cu̧nä̧ pärotö icuäcua’amä.

¿Pi̧jä̧ rȩjȩ a̧’cua̧cuo̧mȩ cu̧ja̧ päcuhua’a?... Amöcuädi: ttö̧ja̧ Dios päö ta’anö jȩpä̧tö̧tä̧ pi̧jä̧ rȩjȩnä̧ ttö̧ja̧cuä̧cuo̧tö̧mä̧. Dios I̧huȩnȩ Isä’tänä jiähua’a u̧mä̧tö̧’i̧nä̧, nä̧tö̧’i̧nä̧ Jeohua hueö jȩpi̧nä̧tö̧ ttötö’cö jähuä. Pi’tä ’chu̧cuhuä̧rä̧’tä̧nä̧ tu̧huo̧jui̧’ä̧cuo̧tö̧jä̧ titö ji̧na̧’a̧ttö̧ pitömä, ja̧’hua̧ta̧nö̧ däje tu̧huo̧jui̧’ö̧’a̧nö̧ ja̧’a̧ttö̧ pitöttömä. ¿Pitörö cu̧huo̧jua̧ päcuhua’a?...