WJesús pi̧jä̧ rȩjȩnä̧ ö̧ji̧nö̧ pä̧nä̧mä̧, a̧hua̧ru̧hua̧ Lázaro ’corujuo’ächinödo. Pidemä Jerusalén ötahuiyä tö’cö ki̧nö̧do, Betania pä’ö micuome. Jesús i̧rȩbȩhuo̧mȩnä̧mä̧ täcö pa̧ja̧cua̧nö̧ mo̧ro̧ jo̧mȩ jubö ’cuäopina’ado Lázaro ’corupäi’äja’attömä. Lázaro ubuatö̧cu̧ (Martacu, Maríacu) hua’are huattomecu ’chi̧nö̧do Jesúsmä. Pide i̧’cha̧’a̧ topö recuätö ttö̧ja̧ ca̧ca̧cui̧pi̧nä̧tö̧do totta pä’ö. Jesús Lázarorö ttoäda’a topömä ¿Marta, Maríacumä rö̧ȩnä̧ esehuinätö ja̧’a̧di̧? Juan 11:21-23, 38-44 ucuocui.

Dios I̧huȩnȩ Isä’tä adihuä huȩnȩ i’cächa’attömä, jiähua’a ’corujuo’ächinätö ttottächä̧cuȩ huȩnȩ’i̧nä̧. Yajutä Marta huo̧jui̧nä̧ju̧do Jeohua päinö huȩnȩ, ’corujuo’ächinätörö tto̧ä̧dä̧cua̧ pi̧jä̧ rȩjȩnä̧ pä’äji ta’anö ttö̧ja̧cua̧ pä’ö. Juan 11:24 ucuocui.

O’ca toi’önä ttö̧ja̧mä̧ “redä’ca i̧sa̧pȩttö̧” adicuotöjä (1 Corintios 15:47; Génesis 3:19). Tidepä jacuänä ta̧’cua̧ru̧hua̧ ’corujuo’ächocörö jui’ätöjä. ’Corujuotächomenämä ta̧’cua̧rö̧’i̧nä̧, tidepä’inä ji̧’qui̧cha̧nö̧’i̧nä̧ a̧’cua̧ro̧ca̧’a̧. Tamötehua ’corujuoächomenämä tamöcuädö siähuächa’a. ’Corujuo’ächätömä barau’inä barahuoco̧u̧, eseu’inä esehuocotö. Ja̧’hua̧nö̧ ja̧’a̧ttö̧, Lázaro ttoächäji o’ca’amä koro’inä ji’ähuocö pi̧nö̧do. Dios I̧huȩnȩ Isä’tä päa’a “ ’corujuo’ächinätömä ji̧’qui̧cha̧nö̧’i̧nä̧ yoröiso ttu̧’ȩpä̧ro̧co̧tö̧” (Eclesiastés 9:5, 6, 10).

Yotöcunämä pä’ätö Dios ttö̧ja̧rö̧ ocurä beipocarära̧’a̧ ro̧ȩpa̧ pä’ö hue’ö, ja̧’hua̧nö̧ ja̧’a̧nä̧ pitö pättömä yapare ja̧’a̧. Totäji ta’anö, ’corujuo’ächinätömä yoröiso ttu̧’ȩpä̧ro̧co̧tö̧. Ja̧’hua̧nö̧ ja̧’a̧ttö̧ pitö ttö̧ja̧ ttu̧huo̧juȩtö̧mä̧ yapare ja̧’a̧, Jeohua jȩo̧cö̧ jähuä’inä yapare huo̧juȩtä̧tö̧. Jeohuamä ya’atecutä amöcuädocö ttö̧ja̧rö̧ ocuränä ku icua pä’ömä. Dios I̧huȩnȩ jiäcuähuä i̧sa̧ Jeremías huȩyu̧ti̧nö̧ mo täbocö Israel ttö̧ja̧ jȩtti̧nö̧: “Hinón i̧tti̧ i̧rȩjä̧nä̧, Tófet pä’ö micuome, ku icu iyähuome aditä’ijätö, tti̧tti̧mö̧ u̧mä̧tö̧rö̧’i̧nä̧, nä̧tö̧rö̧’i̧nä̧ ocuränä ku tticua pä’ö, ttömä pi̧yȩ yoröiso hue’ocö pi̧nö̧sä̧, ji̧’qui̧cha̧nö̧’i̧nä̧ amöcuädocö pi̧nö̧sä̧ pi̧yȩ hueda pä’ömä” (Jeremías 7:31) .

’Corujuo’ächätömä ucuocu’inä ucuocuocotö, ä̧ju̧cu̧’i̧nä̧ ä̧ju̧cuo̧co̧tö̧ (Salmo 115:17). Ja̧’hua̧nö̧ ja̧’a̧nä̧, ángeles juiyo suropätö ka̧cuä̧tö̧, pitömä ’corujuo’ächinätö ttucuocua’a a̧’cua̧rö̧nä̧ jȩpö̧ korotö ttö̧ja̧cu̧ ucuocuätö (Judas 6). Jeohuamä ji̧’qui̧cha̧nö̧’i̧nä̧ kö’cocö ’corujuo’ächinätöcu ttucuocua pä’ömä. Dios I̧huȩnȩ Isä’tä päa’a “Ucutucu ö̧ja̧ pä’ömä jo̧ca̧’a̧ [...] ya̧tȩ ’corujuo’ächinätöcu ucuocua pä’ö jȩpö̧mä̧” (Deuteronomio 18:10,  11).

Recuätö ttö̧ja̧ ’corujuo’ächinätömä pi̧jä̧ rȩjȩnä̧ pä’äji ta’anö ttö̧ja̧cuä̧cuo̧tö̧. Pitöttömä, Jeohuarö ttieruhua’attö surojö jȩpi̧nä̧tö̧’i̧nä̧ ttottächäcuotö. Hechos 24:15 ucuocui.

’Corujuo’ächinätö tto’ächätömä iso päi’önä huȩnȩ Dios ötö’cö jähuä ttu̧huo̧jui̧’ä̧cuo̧tö̧, Jesús hueö ta’anö jȩpö̧ tti̧jȩpä̧cuo̧tö̧, Ja̧u̧ru̧tä̧ ta̧’cua̧ huȩnä̧rä̧tö̧jä̧ pä’ö (Apocalipsis 20:11-13). Pi̧yȩ jȩttö̧ttö̧mä̧, ’cuäopönätä pi̧jä̧ rȩjȩnä̧ eseu ttö̧ja̧cuä̧cuo̧tö̧. Juan 5:28, 29 ucuocui.

Jeohuamä ttoädäcuähuänä i̧jȩpi̧nö̧ repeäcuähuä huȩnȩ’i̧nä̧, ppädäcuähuä huȩnȩ’i̧nä̧. Dios I̧tti̧rö̧ hueina’attö, ujuturu ppä’ädö ’corujuo’ächinödo, ja̧’hua̧nö̧ ja̧’a̧ttö̧ yodojinänö ttotächö’a̧nö̧ ja̧’a̧. Ucumä pi̧yȩ ’cuäopö mo̧ro̧mä̧, ¿dirö tocu’a päcuhua’attö? Juan 3:16; Romanos 6:23 ucuocui.