Diosmä pä̧huä̧ rö̧jä̧cu̧ ttö̧ja̧ eseunu ttö̧ji̧ya̧rö̧ pä’ö. Ttö̧ja̧rö̧ repea’attö rȩjȩ’i̧nä̧, o’ca juiyönä rȩjȩnä̧ ka̧cu̧’i̧nä̧ aditinödo. Yodojinänö, ubara ttutunä jȩö̧’i̧nä̧ si’epö i̧cuä̧cua̧, pi̧jä̧ pa̧ja̧cu̧nä̧ ttö̧ja̧ o’ca toi’önä adiunätä ttö̧ja̧cua̧ pä’ö. 1 Timoteo 6:19 ucuocui.

Korotörö ra̧huä̧rö̧ suronä jȩä̧cuä̧huä̧’i̧nä̧, märichei’inä, ’corujuoächäcuähuä’inä, ya̧tȩ ru̧hua̧’i̧nä̧ pi̧yȩ si’epö icu’a̧nö̧ hua̧mä̧ toa’a. Ja̧’hua̧nö̧ ja̧’a̧nä̧, adihuä huȩnȩ ka̧’a̧: yodojinänö ruhuo pi̧jä̧nä̧ ka̧cu̧mä̧ si’epö i̧cuä̧cua̧ Diosmä. Chutä uruhuotä u̧ju̧nä̧cua̧. Dios umöhuäyotötä huȩnȩ juiyönä ttö̧ja̧cuä̧cuo̧tö̧, na̧huä̧chä̧cuä̧huä̧ juiyönä. Apocalipsis 11:15; 21:3, 4 ucuocui.

Ubara ttuhuähuä juiya pä’ö, pi̧jä̧ rȩjȩttö̧ o’ca toi’önä ttö̧ja̧ suropätörö si’epö i̧cuä̧cua̧ Diosmä (2 Tesalonicenses 1:8, 9). ¿Ti̧yȩnö̧ jȩä̧cua̧’a̧ttö̧ pi̧yȩmä̧? Dios I̧huȩnȩ Isä’tämä äcuomenäjitä kä̧mä̧dö̧ ji’äu ku̧ni̧na̧’a̧ jitä mo̧ro̧ ttö̧ja̧ ubara ttuttä̧cuȩmä̧. Pi̧yȩ huȩnȩmä̧ huäjunätä i̧jȩpa̧’a̧ Diosmä yodojinänö si’epö i̧cuä̧cua̧ pä’ö. 2 Timoteo 3:1-5 ucuocui.

Dios I̧huȩnȩ Isä’tä tu̧huo̧jui̧’a̧ pä’ö ja̧’a̧ Dios ötö’cö jähuä tu̧huo̧juä̧chi̧’a̧ pä’ö. Ya̧tȩ ttä’o adihuä i̧sa̧mä̧ i̧tti̧mö̧rö̧ adiu huo̧juȩtö̧, ja̧’hua̧ta̧nö̧ Dios’inä u̧huo̧juȩtä̧u̧jä̧ Chutä I̧huȩnȩ Isä’tänä. Jiähuä̧u̧jä̧ jitä mo̧ro̧ eseu tö̧ja̧ pä’ö’inä, ja̧’hua̧ta̧nö̧ jiähuä̧u̧jä̧ jȩtö̧’a̧nö̧ jö̧ yodojinänö kä̧cuä̧huä̧ i’co tu̧ju̧nä̧ra̧ pä’ö’inä. O’ca toi’önämä esehuocotö ucu Dios I̧huȩnȩ Isä’tä cu̧huo̧jui̧’o̧mȩnä̧mä̧. Ja̧’hua̧nö̧ ja̧’a̧nä̧ cua̧’cua̧ tta̧cuhuȩcuä̧’ pi̧yȩ ’cuäopomenämä, juhua’a yabocu cujuruhuächöttömä rö̧ȩnä̧ adihuä juäi cuȩmä̧cua̧jä̧. Lucas 6:22, 23; Apocalipsis 14:6, 7 ucuocui.