Jeohua, “Dios eseumä”, adihuä huȩnȩ iyömä, pä̧huä̧ rö̧jä̧cu̧ ttahuaruhuäcu eseu ttö̧ja̧ pä’ö (1 Timoteo 1:11, TNM). Ja̧u̧tä̧ ja̧’a̧ aditinömä äcuomenä ttö̧ja̧ i̧sa̧rö̧, isajuru’inä ji̧nä̧ yo̧mȩtȩ ttö̧ja̧cua̧ pä’ö, irecua päi’önä, kirecuo päi’önä. Hueähuä huȩnȩ hueö ta’anö ttö’cähuomenä ppäda’a ubo irecuacu, isaju kirecuocu eseu ttö̧ja̧ pä’ö, tti̧tti̧mö̧rö̧ adiu ttö’öttäda pä’ö’inä. Dios päö ta’anö jȩtta̧ pä’ätömä ttö’cähuomenä pi̧jä̧ ttö̧ja̧ hueähuä huȩnȩ hueö ta’anö tti̧huȩyu̧cua̧ pä’ö ja̧’a̧. Lucas 2:1, 4, 5 ucuocui.

Diosmä pä̧huä̧ rö̧jä̧cu̧ ya̧tȩ ubo, yajute isajucu ö’cähuomenä, ji̧nä̧ yo̧mȩtȩ ttö̧ja̧ pä’ö ’corujuottächome jubö. Jeohuamä kö’cocö ya̧tȩ ubo irecuarö ku̧nä̧rö̧ karajuru usa pä’ömä, yajute isaju kirecuorö ku̧nä̧rä̧ju̧’i̧nä̧ ka̧ra̧rö̧ kusa pä’ömä (Hebreos 13:4). Jeohuamä “ttirecuarö jaroi’äcuähuä yoröiso kö’cocö” (Malaquías 2:16). Ja̧’hua̧nö̧ ja̧’a̧nä̧, Diosmä jaropö ya̧tȩ irecuarö kö̧ karajucu suronä jȩä̧’chö̧ttö̧mä̧, irecuamä ka̧ra̧cu̧ kö’cäu’a̧nö̧ ja̧’a̧, isaju’inä kirecuorö kä̧ju̧ ka̧ra̧cu̧ suronä jȩjä̧’chö̧ttö̧mä̧, kirecuomä karajucu ö’cäu’a̧nö̧ ja̧’a̧. Mateo 19:3-6, 9 ucuocui.

Jeohuamä aditinö ya̧tȩ uborö yajute isajuru ttö’cähuomenä ta̧ju̧cuäyotö ppättädäcuähua pä’ö (Génesis 2:18). Irecua’inä, i̧tti̧mö̧’i̧nä̧ ttu̧ru̧hua̧ päi’önä kö̧ ubomä, ojusodera̧’a̧ ka̧cuä̧tö̧ ahuaruhuä ttu̧cuȩ iya pä’ö aditö juruhuächi’ö, Dios ötö’cö jähuä’inä ahuaruhuärö u̧huo̧juȩta̧ pä’ö juruhuächi’ö. Irecuarö repea’attö, irecuarö pä̧huä̧ rö̧jö̧ jȩö̧’a̧nö̧ ja̧’a̧. Ta̧ju̧cuäyotö ttucuotäcuähua pä’ö ja̧’a̧, repettäcuähua pä’ö ja̧’a̧. I̧mi̧cu̧nä̧ ttamöcuäda’attö koronö ttö̧ra̧huä̧rö̧’a̧nö̧ ja̧’a̧, pi̧yȩ ’cuäopomenä suronä jȩttö̧ ttunichi’a pä’ö ja̧’a̧. Ja̧’hua̧nö̧ jȩtto̧mȩnä̧ rö̧ȩnä̧ ppäda’a eseu ttö̧ja̧ pä’ö. Efesios 4:31, 32; 5:22-25, 33; 1 Pedro 3:7 ucuocui.

Ya̧tȩ ubo irecuacu surojö huȩnȩ u̧ju̧nä̧ro̧mȩnä̧, ta̧ju̧cuäyotö ttujuruhuächa pä’ö ja̧’a̧ repe’önö tottäcuähua pä’ö (1 Corintios 13:4, 5). Dios I̧huȩnȩ Isä’tämä hueoca’a ya̧tȩ ubo irecuarö jaroi’a pä’ö surojö huȩnȩ u̧ju̧nä̧ro̧mȩnä̧mä̧. Pi̧yȩ jȩö̧ttö̧mä̧ huȩnȩmä̧ siähuächoca’a. 1 Corintios 7:10-13 ucuocui.

Jeohuamä pä̧huä̧ rö̧jä̧cu̧ pitö eseu ttö̧ja̧cua̧ pä’ö. Ja̧’hua̧nö̧ ja̧’a̧ttö̧ huo̧juȩtö̧ adiu ttö̧ja̧cua̧ pä’ö, pä̧huä̧ rö̧jä̧cu̧ ttä̧’o̧tö̧ huo̧ju̧ jittäuttu ttu̧huo̧jui̧’a̧ pä’ö (Colosenses 3:20). Diosmä pä̧huä̧ rö̧jä̧cu̧ pitö tti̧tti̧mö̧ eseu ttö̧ja̧ pä’ö, Dios’inä, Jesucristo’inä huettö jȩpö̧ ttesehua pä’ö. Eclesiastésnä Diosmä möäyotörö pa̧’a̧nö̧ pä’ö: “Esehui, mö̧ä̧ya̧, mö̧ä̧ya̧ cu̧ja̧’a̧ttö̧”, ja̧’hua̧ta̧nö̧ pä’ö “o’ca juiyönä Aditinörömä, Adihuä I̧sa̧rö̧mä̧, amöcuädi mö̧ä̧ya̧ cu̧ja̧’a̧nä̧” (Eclesiastés 11:9–12:1). Mateo 19:13-15; 21:15, 16 ucuocui.

Ttä̧’o̧tö̧mä̧ ttadita pä’ö ja̧’a̧ ttiya pä’ö ttu̧cuȩ’i̧nä̧, ttojusode’inä, ttö̧’ca̧tä̧huä̧ti̧yu̧’i̧nä̧ (1 Timoteo 5:8). Pi̧yȩtä̧ jȩtta̧ pä’ömä jo̧ca̧’a̧. Ttä̧’o̧tö̧mä̧ tti̧tti̧mö̧rö̧ ttu̧huo̧juȩta̧ pä’ö ja̧’a̧ Diosrö repetta pä’ö, Dios ujuturu jȩö̧’a̧nö̧ jȩtta̧ pä’ö (Deuteronomio 6:4-7). Ttä̧’o̧tö̧ iso päi’önä Diosrö repettomenämä, pi̧yȩ tti̧tti̧mö̧rö̧ ppäda’a Diosrö repettönä ttami iso’quinä. Dios I̧huȩnȩ Isä’tättö ȩmö̧ tti̧tti̧mö̧rö̧ ttu̧huo̧juȩto̧mȩnä̧mä̧, ppä’ädätö adiu ttamöcuädönä. Efesios 6:4; 2 Timoteo 3:15 ucuocui.

Tti̧tti̧mö̧ adiunä jȩtto̧mȩnä̧, recuä rö̧jä̧u̧ ttä̧’o̧tö̧ ttesehuatö pä’ö. Ja̧’hua̧nö̧ ja̧’a̧nä̧ koronömä ttö̧tä̧bo̧ta̧ pä’ö ja̧’a̧ suronä jȩtto̧mȩnä̧ adiu jȩttä̧cua̧’a̧nö̧, ttä̧’o̧tö̧ pi̧yȩ jȩtto̧mȩnä̧ ppä’ädätö tti̧tti̧mö̧ pä’äji ta’anö suronä jȩtti̧ya̧ pä’ö (Proverbios 22:15). Ttä̧’o̧tö̧ tti̧tti̧mö̧rö̧ ttö̧tä̧bo̧ta̧’a̧nä̧, pä̧i̧cu̧nä̧ ra̧huä̧rö̧ cuätta pä’ömä jo̧ca̧’a̧. Colosenses 3:21 ucuocui.

Testigo Jeohua huotömä Dios I̧huȩnȩ Isä’tättö ȩmö̧ cuyäru o’tä rä’epätö ttä̧’o̧tö̧rö̧’i̧nä̧, tti̧tti̧mö̧rö̧’i̧nä̧ ppättäda pä’ö. 2 Timoteo 3:16 ucuocui.