Pi̧yȩ ruhuomä mo̧ro̧jä̧ra̧’a̧ ka̧’a̧, pi̧yȩ ruhuomä jȩä̧cua̧’a̧ ttö̧ja̧ pi̧jä̧ rȩjȩnä̧ Diosrötä pä̧huä̧ rö̧jö̧ jȩttö̧nä̧, mo̧ro̧jä̧nä̧ jö̧ ta’anö. Ja̧’hua̧ta̧nö̧ jȩä̧cua̧’a̧ ttö̧ja̧ ji̧nä̧ yo̧mȩtȩ pi̧jä̧ rȩjȩnä̧ eseunu ttö̧ja̧cu̧nä̧. ¿Tta̧’a̧nö̧ ’cuäopäcua’attö pi̧yȩmä̧? Daniel 2:44nä päa’a: “Dios mo̧ro̧jä̧ra̧’a̧ kö̧mä̧, ya’ate ruhuo u̧ju̧nä̧cua̧, pi̧yȩ ruhuomä yoröiso beipächiyäcua’a. [...] Pi̧yȩ ruhuomä o’ca juiyö pi̧yȩ koro ruhuo pä̧i̧cu̧nä̧ i̧nȩpö̧ be’epäjipö icuäcua’a”. Pi̧yȩ ruhuotä ja̧’a̧ ttö̧ja̧rö̧ recuä rö̧jö̧mä̧, yodojinänö täcö rȩbȩhuä̧cua̧’a̧. Pi̧yȩmä̧, ¿adihuä huȩnȩ ja̧’a̧di̧? Mateo 6:9, 10; 24:14 ucuocui.

Ya’ate ruhuonä ya̧tȩ huea pä’ö recuä rö̧ja̧’a̧, ja̧’hua̧nö̧ ja̧’a̧ttö̧ Jeohuamä I̧tti̧ Jesucristorö hue’inö Ru̧hua̧ päi’önä ö̧ja̧ pä’ö Dios Uruhuonä. Apocalipsis 11:15 ucuocui.

Ja̧u̧mä̧ korotörö ppä’ädö, ’cuäopönä jueönätä jȩpö̧ (Mateo 11:28-30). Ja̧’hua̧ta̧nö̧ ujuru ku̧nä̧rö̧ ttö̧ja̧rö̧ adiu ppäda pä’ö, pi̧jä̧ rȩjȩra̧’a̧ hueomenä jȩä̧cua̧ pi̧yȩmä̧ mo̧ro̧jä̧ra̧’a̧ttö̧. Dios, Jesúsru ttoädinö o’ca’amä, Jesúsmä mo̧ro̧jä̧ra̧’a̧ cä’ecuächinö, Jä’o u̧huo̧jua̧’a̧nä̧ pä̧mä̧di̧nö̧do, ju̧huȩnȩ tta̧’ä̧ri̧nö̧do pi̧yȩ ruhuo Jä’o iyome jubö päi’önä (Hebreos 10:12, 13). Dios päinö ta’anö täcö uruhuo iyinäcudo. Lucas 1:32, 33 ucuocui.

Dios umöhuäyotöttö yotöcunä ttö̧ja̧rö̧ ȩmi̧nö̧ mo̧ro̧jä̧ra̧’a̧ huetta pä’ö Jesúscu. Pi̧jä̧ rȩjȩnä̧ ö̧ji̧nö̧ pä̧nä̧mä̧, Jesúsmä u̧huo̧juȩtä̧u̧ttu̧ yotöcunärö ȩmi̧nö̧ umöhuäyotö pätti’a pä’ö, pitömä oinä̧u̧ apóstoles pä’ö. Pitö ji̧na̧’a̧ äcuomenäji mo̧ro̧jä̧ra̧’a̧ huetta pä’ö ȩmi̧nä̧u̧mä̧. Jitä pä̧nä̧ päi’önä Jeohuamä ȩmö̧ u̧mä̧tö̧, nä̧tö̧ tta̧’cua̧ huȩnä̧rä̧tö̧rö̧ mo̧ro̧jä̧ra̧’a̧ huetta pä’ö ä’coji ’chi̧nä̧tö̧cu̧. Jesúsru ttoädinö ta’anö, jahuätörö’inä ’corupätti’ö o’ca’a ttoädä̧u̧ espíritu huotönätä. Juan 14:1-3; 1 Corintios 15:43, 44 ucuocui.

 Mo̧ro̧jä̧ra̧’a̧mä̧, ¿tta̧’a̧nö̧ recuätö tti̧’chä̧cua̧’a̧ttö̧? Jesúsmä mo̧ro̧jä̧ra̧’a̧ huettäcuotö ttötö’cö jähuä ucuocu, u̧huo̧juȩtä̧u̧ru̧ pä’inödo “Ucutumä a̧’u̧cu̧nä̧tä̧jä̧” (Lucas 12:32). Pitö o’ca toi’önämä 144.000nö huotötä ja̧’a̧. Apocalipsis 14:1 ucuocui.

1914 a̧’ȩnä̧ ru̧hua̧ huä̧mä̧di̧nö̧do. Äcuomenäjimä, rä’epö icu Ähuettärö umöhuäyotöcu mo̧ro̧jä̧ra̧’a̧ttö̧ pi̧jä̧ rȩjȩra̧’a̧ do’opö icuinä̧u̧do. * Pi̧yȩ ’cuäopomenä Ähuettämä rö̧ȩnä̧ ra̧huä̧ri̧nö̧do, ja̧u̧nu̧ mo̧ro̧ kä̧mä̧dö̧ pi̧jä̧ pa̧ja̧cu̧nä̧ rö̧ȩnä̧ surojö huȩnȩ ’cuäopönä jȩpö̧do (Apocalipsis 12:7-10, 12). Ja̧’hua̧nö̧ ja̧’a̧ttö̧ ttö̧ja̧mä̧ surojö huȩnȩ ka̧’a̧cu̧ ’chä̧tö̧. Curä’inä, rȩjȩ ttö̧ȩpö̧’i̧nä̧, na̧huä̧chä̧cuä̧huä̧’i̧nä̧, ppä’i ttuhuähuä’inä ’cuäopa’a, Dios I̧huȩnȩ Isä’tänä mo täbocö tti̧huȩyu̧ti̧nö̧ ta’anö ’cuäopa’a. Pi̧yȩmä̧ i̧jȩpa̧’a̧ Dios Uruhuo pi̧jä̧ rȩjȩra̧’a̧ hueäcua’amä täcö tö’cöhuächa’a pä’ö. Lucas 21:7, 10, 11, 31 ucuocui.

Dios Uruhuomä ca̧ca̧ta̧’a̧ pi̧jä̧ pa̧ja̧cu̧nä̧ recuätö ttö̧ja̧rö̧, pi̧yȩ ’cuäopa’a Dios umöhuäyotö I̧huȩnȩ ji’äu cuettächomenä. Recuätö u̧mä̧tö̧’i̧nä̧, nä̧tö̧’i̧nä̧ adihuä isotömä Jesús umöhuäyotö juo’ächä’ijätö. Pitö o’ca toi’önä tta̧’cua̧ri̧’ä̧cuo̧tö̧ Dios Uruhuo ttö̧ja̧ suropätörö si’epö icuomenä. Ja̧’hua̧nö̧ ja̧’a̧ttö̧ ujutu’inä pi̧yȩ ’cuäopomenä tö̧ji̧pa̧ pätöttömä, Jesús päö ta’anö jȩpö̧ teseta pä’ö ja̧’a̧. Apocalipsis 7:9, 14, 16, 17 ucuocui.

Ä’coji Dios päinö ta’anö, Dios Uruhuomä jȩä̧cua̧’a̧ ttö̧ja̧ pi̧jä̧ rȩjȩ a̧’cua̧cuo̧mȩ ttö̧ja̧cua̧ pä’ö, pi̧yȩmä̧ ’cuäopäcua’a ya’ute mil a̧’ȩ jo̧mȩnä̧. Pi̧yȩ ’cuäopö o’ca’a, Jesúsmä uruhuo Jä’orö ppa̧huä̧dä̧cua̧ (1 Corintios 15:24-26). ¿Pi̧yȩ ruhuo ötö’cö jähuä ka̧ra̧rö̧ jicuhuähua päcuhua’a? 2 Pedro 3:13 ucuocui.